મૂલમધ્યમકકારિકા · અધ્યાય 3

દર્શનં શ્રવણં ઘ્રાણં રસનં સ્પર્શનં મનઃ ।
ઇન્દ્રિયાણિ ષડ્ એતેષાં દ્રષ્ટવ્યાદીનિ ગોચરઃ

સ્વમ્ આત્માનં દર્શનં હિ તત્ તમ્ એવ ન પશ્યતિ ।
ન પશ્યતિ યદ્ આત્માનં કથં દ્રક્ષ્યતિ તત્ પરાન્

ન પર્યાપ્તો ઽગ્નિદૃષ્ટાન્તો દર્શનસ્ય પ્રસિદ્ધયે ।
સદર્શનઃ સ પ્રત્યુક્તો ગમ્યમાનગતાગતૈઃ

નાપશ્યમાનં ભવતિ યદા કિં ચન દર્શનમ્ ।
દર્શનં પશ્યતીત્ય્ એવં કથમ્ એતત્ તુ યુજ્યતે

પશ્યતિ દર્શનં નૈવ નૈવ પશ્યત્ય્ અદર્શનમ્ ।
વ્યાખ્યાતો દર્શનેનૈવ દ્રષ્ટા ચાપ્ય્ અવગમ્યતામ્

દ્રષ્ટા નાસ્ત્ય્ અતિરસ્કૃત્ય તિરસ્કૃત્ય ચ દર્શનમ્ ।
દ્રષ્ટવ્યં દર્શનં ચૈવ દ્રષ્ટર્ય્ અસતિ તે કુતઃ

પ્રતીત્ય માતાપિતરૌ યથોક્તઃ પુત્રસંભવઃ ।
ચક્ષૂરૂપે પ્રતીત્યૈવમુક્તો વિજ્ઞાનસંભવઃ

દ્રષ્ટવ્યદર્શનાભાવાદ્ વિજ્ઞાનાદિચતુષ્ટયમ્ ।
નાસ્તીત્ય્ ઉપાદાનાદીનિ ભવિષ્યન્તિ પુનઃ કથમ્

વ્યાખ્યાતં શ્રવણં ઘ્રાણં રસનં સ્પર્શનં મનઃ ।
દર્શનેનૈવ જાનીયાચ્ છ્રોતૃશ્રોતવ્યકાદિ ચ