મૂલમધ્યમકકારિકા · અધ્યાય 13

તન્ મૃષા મોષધર્મ યદ્ ભગવાન્ ઇત્ય્ અભાષત ।
સર્વે ચ મોષધર્માણઃ સંસ્કારાસ્ તેન તે મૃષા

તન્ મૃષા મોષધર્મ યદ્ યદિ કિં તત્ર મુષ્યતે ।
એતત્ તૂક્તં ભગવતા શૂન્યતાપરિદીપકમ્

ભાવાનાં નિઃસ્વભાવત્વમ્ અન્યથાભાવદર્શનાત્ ।
નાસ્વભાવશ્ ચ ભાવો ઽસ્તિ ભાવાનાં શૂન્યતા યતઃ

કસ્ય સ્યાદ્ અન્યથાભાવઃ સ્વભાવશ્ ચેન્ ન વિદ્યતે ।
કસ્ય સ્યાદ્ અન્યથાભાવઃ સ્વભાવો યદિ વિદ્યતે

તસ્યૈવ નાન્યથાભાવો નાપ્ય્ અન્યસ્યૈવ યુજ્યતે ।
યુવા ન જીર્યતે યસ્માદ્ યસ્માજ્ જીર્ણો ન જીર્યતે

તસ્ય ચેદ્ અન્યથાભાવઃ ક્ષીરમ્ એવ ભવેદ્ દધિ ।
ક્ષીરાદ્ અન્યસ્ય કસ્યચિદ્ દધિભાવો ભવિષ્યતિ

યદ્ય્ અશૂન્યં ભવેત્ કિંચિત્ સ્યાચ્ છૂન્યમ્ ઇતિ કિં ચન ।
ન કિંચિદ્ અસ્ત્ય્ અશૂન્યં ચ કુતઃ શૂન્યં ભવિષ્યતિ

શૂન્યતા સર્વદૃષ્ટીનાં પ્રોક્તા નિઃસરણં જિનૈઃ ।
યેષાં તુ શૂન્યતાદૃષ્ટિસ્ તાન્ અસાધ્યાન્ બભાષિરે