મૃગેન્દ્રાગમ · અધ્યાય 1.4

સ ઇત્થંવિગ્રહો ઽનેન કરણેનાહતૌજસા
કરોતિ સર્વદા કૃત્યં યદા યદુપપદ્યતે ॥

તત્રાદૌ કેવલાણૂનાં યોગ્યાનાં કુરુતે ઽષ્ટકમ્
વામાદિશક્તિભિર્યુક્તં સપ્તકોટિપરિચ્છદમ્ ॥

તેષામનન્તઃ સૂક્ષ્મશ્ચ તથા ચૈવ શિવોત્તમઃ
એકનેત્રૈકરુદ્રૌ ચ ત્રિમૂર્તિશ્ચામિતદ્યુતિઃ ॥

શ્રીકણ્ઠશ્ચ શિખણ્ડી ચ રાજરાજેશ્વરેશ્વરાઃ
ઈષદપ્રાપ્તયોગત્વાન્ નિયોજ્યાઃ પરમેષ્ઠિનઃ ॥

સર્વજ્ઞત્વાદિયોગે ઽપિ નિયોજ્યત્વં મલાંશતઃ
પરસ્પરં વિશિષ્યન્તે મન્ત્રાશ્ચૈવમધઃ સ્થિતાઃ ॥

તે ચ મન્ત્રેશ્વરવ્યક્ત શિવશક્તિપ્રચોદિતાઃ
કુર્વન્ત્યનુગ્રહં પુંસાં યદા યેષાં સ યુજ્યતે ॥

પ્રયોક્તૃદેહસાપેક્ષં તદર્ધમખિલે ઽધ્વનિ
કૃત્વાધિકારં સ્થિત્યન્તે શિવં વિશતિ સેશ્વરમ્ ॥

વિનાધિકરણેનાન્યત્ પ્રધાનવિકૃતેરધઃ
કૃત્વાધિકારમીશેષ્ટમ્ અપૈતિ સ્વાધ્વસંહૃતૌ ॥

તતો ઽનન્તાદ્યભિવ્યક્તઃ પતીનાં ગ્રન્થિતત્ત્વતઃ
કલાદ્યારબ્ધદેહાનાં કરોત્યષ્ટાદશં શતમ્ ॥

તાનપ્યાવિશ્ય ભગવાન્ સાઞ્જનાન્ ભુવનાધિપાન્
યેભ્યઃ સર્વમિદં યેષાં શક્તિઃ કર્મનિબન્ધના ॥

પ્રણેતૄણ્ પશુશાસ્ત્રાણાં પશૂંસ્તદનુવર્તકાન્
સ્વસાધ્યકારકોપેતાન્ કાલધામાવધિસ્થિતાન્ ॥

સ્થિતૌ સકારકાનેતાન્ સમાક્રમ્ય સ્વતેજસા
યુનક્તિ સ્વાર્થસિદ્ધ્યર્થં ભૂતૈરનભિલક્ષિતઃ ॥

ભોગસાધનમાક્ષિપ્ય કૃત્વા કારણસંશ્રયમ્
તચ્ચ સાત્મકમાક્રમ્ય વિશ્રમાયાવતિષ્ઠતે ॥

ભવિનાં ભવખિન્નાનાં સર્વભૂતહિતો યતઃ
સ્વાપાવસાનમાસાદ્ય પુનઃ પ્રાગ્વત્પ્રવર્તતે ॥

સ્વાપે ઽપ્યાસ્તે બોધયન્બોધયોગ્યાન્ રોધ્યાન્રુન્ધન્પાચયન્ કર્મિકર્મ
માયાશક્તીર્વ્યક્તિયોગ્યાઃ પ્રકુર્વન્ પશ્યન્સર્વં યદ્યથા વસ્તુજાતમ્ ॥