મોક્ષોપાયટીકા · અધ્યાય 2.12

પરિપૂર્ણમના માન્યઃ પ્રષ્ટું જાનાસિ રાઘવ ।
વેત્સિ ચોક્તં ચ તેનાહં પ્રવૃત્તો વક્તુમ્ આદરાત્ ॥

રજસ્તમોભ્યાં રહિતાં શુદ્ધસત્ત્વાનુપાતિનીમ્ °આન્[ઉ]પા° ।
મતિમ્ આત્મનિ સંસ્થાપ્ય જ્ઞાનં શ્રોતું સ્થિરો ભવ ॥

વિદ્યતે ત્વયિ સર્વૈવ પૃચ્છકસ્ય ગુણાવલી ।
વક્તુર્ ગુણાલી ચ મયિ રત્નશ્રીર્ જલધૌ યથા ॥

આત્તવાન્ અસિ વૈરાગ્યં વિવેકાત્ સઙ્ગજં મુનેઃ ।
ચન્દ્રકાન્ત ઇવાર્દ્રત્વં લગ્નચન્દ્રકરોત્કરઃ ॥

ચિરમ્ આ શૈશવાદ્ એવ તવાભ્યાસો ઽસ્તિ સદ્ગુણૈઃ ।
શુદ્ધઃ શુદ્ધસ્ય દીર્ઘૈશ્ ચ પદ્મસ્યેવાતિસંતતૈઃ ॥

અતઃ શૃણુ કથાં વક્ષ્યે ત્વમ્ એવાસ્યા હિ ભાજનમ્ ।
ન હિ ચન્દ્રં વિના શુદ્ધા સવિકાસા કુમુદ્વતી ॥

યે કેચન સમારમ્ભા યાશ્ ચ કાશ્ચન દૃષ્ટયઃ ।
તે ચ તાશ્ ચ પદે દૃષ્ટે નિઃશેષં યાન્તિ વૈ શમમ્ ॥

યદિ વિજ્ઞાનવિશ્રાન્તિર્ ન ભવેદ્ ભવ્યચેતસઃ ।
તદ્ અસ્યાં સંસૃતૌ સાધુશ્ ચિન્તાં સોઢું સહેત કઃ ॥

પરપ્રાપ્ત્યા વિલીયન્તે સર્વા મનનવૃત્તયઃ ।
કલ્પાન્તાર્કગણાસઙ્ગાત્ કુલશૈલશિલા ઇવા ॥

દુઃસહા રામ સંસારવિષાવેશવિષૂચિકા ।
યોગગારુડમન્ત્રેણ પાવનેન પ્રશામ્યતિ ॥

વિકૌતુકા વિગતવિકલ્પવિપ્લવા યથા સ્થિતા હરિહરપદ્મજાદયઃ ।
નરોત્તમાઃ સમધિગતાત્મદીપકાસ્ તથા સ્થિતા જગતિ વિબુદ્ધબુદ્ધયઃ ॥

પરિક્ષીણે મોહે ગલતિ ચ ઘને ઽજ્ઞાનજલદે પરિજ્ઞાતે તત્ત્વે સમધિગત આત્મન્ય્ અભિમતે ।
વિચાર્યાર્યૈઃ સાર્ધં ગલિતવપુષોર્ વૈ સદસતોર્ ધિયા દૃષ્ટે તત્ત્વે રમણમ્ અટનં જાગતમ્ ઇદમ્ ॥

પ્રસન્ને ચિત્તત્ત્વે હૃદિ સવિભવે વલ્ગતિ પરે સમાભોગીભૂતાસ્વ્ અખિલકલનાદૃષ્ટિષુ પુરઃ ।
શમં યાન્તીષ્વ્ અન્તઃકરણઘટનાસ્વ્ આહિતરસં ધિયા દૃષ્ટે તત્ત્વે રમણમ્ અટનં જાગતમ્ ઇદમ્ ॥

રથઃ સ્ફારો દેહસ્ તુરગરચના ચેન્દ્રિયગતિઃ પરિસ્પન્દો વાતાદ્ અહમ્ અકલિતાનન્તવિષમઃ ।
પરો વાર્વા દેહી જગતિ વિહરામીત્ય્ અનઘયા ધિયા દૃષ્ટે તત્ત્વે રમણમ્ અટનં જાગતમ્ ઇદં ॥