મોક્ષોપાય · અધ્યાય 6.80

અથૈકદા પુરશ્રેષ્ઠે કસ્મિંશ્ચિન્ મણ્ડલાન્તરે ।
અનપત્યં નૃપં મૃત્યુર્ અહરત્ સ્વમ્ ઇવામિષમ્ ॥

તત્ર પ્રકૃતયઃ ખિન્ના નષ્ટદેશક્રમા નૃપમ્ ।
અન્વિષ્યન્તિ સ્મ સંયુક્તં ગુણલક્ષ્મ્યા વિશાલયા ॥

તા ભગીરથમ્ આસાદ્ય સ્થિતં ભિક્ષાશનં પુરે ।
પરિજ્ઞાય સમાનીય સૈન્યં ચક્રુર્ મહીપતિમ્ ॥

ભગીરથઃ ક્ષણેનૈવ પ્રાવૃષીવામ્બુના સરઃ ।
ધૂલિતસ્ સેનયા ગુર્વ્યા ઝગિત્ય્ આરોપિતો ગજે ॥

ભગીરથો જગન્નાથો જયતીતિ ઘનારવૈઃ ।
નીરન્ધ્રતામ્ ઉપાજગ્મુર્ ગિરીન્દ્રાણાં મહાગુહાઃ ॥

તત્ર તત્ પાલયન્તં તં રાજ્યં રાજાનમ્ આદૃતાઃ ।
આજગ્મુઃ પ્રાક્પ્રકૃતયઃ પ્રાહુર્ ઇત્થં મૃતાધિપાઃ ॥

રાજન્ન્ અસ્માકમ્ અધિપો યસ્ ત્વયા સ પુરા કૃતઃ ।
મૃત્યુના વિનિગીર્ણો ઽસૌ મત્સ્યેનેવામિષં મૃદુ ॥

તત્ તત્ પાલયિતું રાજ્યં પ્રસાદં કર્તુમ્ અર્હસિ ।
અપ્રાર્થિતોપપન્નાનાં ત્યાગો ઽર્થાનાં તુ નોચિતઃ ॥

ઇતિ સમ્પ્રાર્થિતો રાજા તદ્ અઙ્ગીકૃત્ય તદ્વચઃ ।
સર્વસાગરચિહ્નાયાસ્ સ બભૂવ પતિર્ ભુવઃ ॥

સમશ્ શાન્તમના મૌની વીતરાગો વિમત્સરઃ ।
કાર્યકાર્યૈકકરણરતિર્ આહિતવિસ્મયઃ ॥

પાતાલતલનષ્ટાનાં સાગરાકારકારિણામ્ ।
પિતામહાનાં ગઙ્ગામ્બુ શુશ્રાવોત્તારણક્ષમમ્ ॥

તદા કિલ સ્વર્ગનદી વહતિ સ્મ ન ભૂતલે ।
પિતૄણાં દુર્લભસ્ સો ઽભૂત્ તેન ગઙ્ગાજલાઞ્જલિઃ ॥

ભગીરથેનાથ મહીમ્ અવતારયિતું દિવઃ ।
ગઙ્ગાં ગૃહીતો નિયમસ્ તદા પ્રભૃતિ ભૂભૃતા ॥

તતો રાજ્યં પરિત્યજ્ય મન્ત્રિણાં ભૂપતિશ્ શમી ।
તપસે કાર્યકાર્યેહો જગામ ગહનં વનમ્ ॥

તત્ર વર્ષસહસ્રૈસ્ સ સમારાધ્ય પુનઃ પુનઃ ।
બ્રહ્માણં શઙ્કરં જહ્નું ભુવિ ગઙ્ગામ્ અયોજયત્ ॥

તતઃ પ્રભૃત્ય્ અમલતરઙ્ગભઙ્ગિની જગત્પતેશ્ શશિવિશદાઙ્ગસઙ્ગિની ।
નભસ્તલાન્ નિપતતિ ગાં ત્રિમાર્ગગા મહાત્મનામ્ ઇવ બહુપુણ્યસન્તતિઃ ॥

સ્ફુરત્તરઙ્ગભઙ્ગિની સ્વફેનપુઞ્જહાસિની પ્રસન્નપુણ્યમઞ્જરી દ્રુતેવ ધર્મસન્તતિઃ ।
ભગીરથે મહીપતૌ યશઃપ્રચારવીથિકા તદાદિ સા ત્રિમાર્ગગા મહીતલે બભૂવ હ ॥