મોક્ષોપાય · અધ્યાય 6.79

અથ તસ્ય ગુરોર્ વક્ત્રાદ્ ઇત્ય્ આકર્ણ્ય ભગીરથઃ ।
મનસ્ય્ આહિતકર્તવ્યસ્ સ્વવ્યાપારપરો ઽભવત્ ॥

તતઃ કતિપયેષ્વ્ એવ વાસરેષુ ગતેષ્વ્ અસૌ ।
અગ્નિષ્ટોમમખં ચક્રે સર્વત્યાગૈકસિદ્ધયે ॥

ગોભૂમ્યશ્વહિરણ્યાદિ દદૌ ધનમ્ અશેષતઃ ।
દ્વિજદેવાર્તબન્ધુભ્યો ગુણ્યગુણ્યવિચારવાન્ ॥

દિવસત્રયમાત્રેણ સર્વમ્ એવં પરિત્યજન્ ।
સ્વવસ્ત્રમાત્રશેષો ઽસાવ્ આસીદ્ રાજા ભગીરથઃ ॥

અથ સર્વાર્થરિક્તં તં ખિન્નપ્રકૃતિપૌરકમ્ ।
સીમાન્તિને તૃણમ્ ઇવ રાજ્યં સ્વમ્ અરયે દદૌ ॥

આક્રાન્તે દ્વિષતા રાજ્યે પુરે સદ્મનિ મણ્ડલે ।
અધોવાસોઽવશેષો ઽસૌ નિર્જગામ સ્વમણ્ડલાત્ ॥

યત્ર ન જ્ઞાયતે નામ્ના યત્ર ન જ્ઞાયતે મુખાત્ ।
તત્ર ગ્રામેષ્વ્ અરણ્યેષુ દૂરેષૂવાસ ધૈર્યવાન્ ॥

ઇત્ય્ અલ્પેનૈવ કાલેન પ્રશાન્તસકલૈષણઃ ।
પરમેણ શમેનાસૌ પ્રાપ વિશ્રાન્તિમ્ આત્મનિ ॥

ભ્રમન્ દ્વીપાનિ ભૂપીઠે કદાચિત્ કાલયોગતઃ ।
ભૂપેન શત્રુણા પ્રાપ્તં સ્વમ્ એવ પ્રાપ તત્ પુરમ્ ॥

તાન્ એવારીંશ્ ચ તત્રાસૌ પ્રવાહાપતિતક્રમમ્ ।
પૌરાંશ્ ચ મન્ત્રિણશ્ ચૈવ શમી ભિક્ષામ્ અયાચત ॥

વિવિદુસ્ તે ઽરયઃ પૌરા મન્ત્રિણશ્ ચ ભગીરથમ્ ।
પૂજયામ્ આસુર્ અથ તં સવિષાદાસ્ સપર્યયા ॥

પ્રભો રાજ્યં ગૃહાણેતિ પ્રાર્થિતો ઽપ્ય્ અરિણા મુનિઃ ।
નાદદે ઽનાદૃતાશેષસ્ તૃણમ્ અપ્ય્ અશનાદ્ ઋતે ॥

કતિચિદ્ દિવસાંસ્ તત્ર નીત્વાન્યત્ર જગામ સઃ ।
ભગીરથો ઽયં હા કષ્ટમ્ ઇતિ લોકેન શોચિતઃ ॥

અથાન્યત્રોપશાન્તાત્મા પરિવિશ્રાન્તધીસ્ સુખી ।
આત્મારામઃ કદાચિત્ તુ સ પ્રાપ ત્ર્યુત્તુલં ગુરુમ્ ॥

સ્વમ્ એવ સ્વાગતં કૃત્વા તેન સાર્ધં ભગીરથઃ ।
કઞ્ચિત્ કાલમ્ ઉવાસાદ્રૌ વને ગ્રામે પુરે જને ॥

સમતામ્ ઉપયાતૌ તૌ ગુરુશિષ્યૌ સમૌ સ્થિતૌ ।
કલયામ્ આસતુસ્ સ્વસ્થૌ વિનોદં દેહધારણમ્ ॥

કિમ્ અયં ધાર્યતે દેહઃ કિમ્ અનેનોજ્ઝિતેન નઃ ।
યથાક્રમં યથાચારં તિષ્ઠત્વ્ એષ યથાસ્થિતમ્ ॥

ઇતિ નિશ્ચિત્ય તિષ્ઠન્તૌ તૌ વનાદ્ વનગામિનૌ ।
નનન્દતુર્ અનાનન્દં ન સુખં ન ચ મધ્યમમ્ ॥

ધનાનિ નારીર્ વિભવાન્ ઐશ્વર્યં ચાષ્ટધોદિતમ્ ।
સિદ્ધૈર્ અપ્ય્ અર્પિતં તુષ્ટૈર્ મેનાતે જર્જરં તૃણમ્ ॥

સ્વકર્મણૈવ દેહો ઽયં યાવદન્તમ્ અનિચ્છયા ।
ધારણીય ઇતિ સ્વેન કર્મણૈવાથ તસ્થતુઃ ॥

અભિનનન્દતુર્ આગતમ્ ઉત્તમૌ નિજસમાચરણક્રમજં મુની ।
સુખમ્ અસૌખ્યમ્ અપીપ્સિતવર્જિતૌ સમસમૌ ખસમૌ શમિનૌ સ્વતઃ ॥