મોક્ષોપાય · અધ્યાય 6.76

કાલસત્તા નભસ્સત્તા સ્પન્દસત્તા ચ ચિન્મયી ।
શુદ્ધચેતનસત્તાથ સર્વમ્ ઇત્યાદિ પાવનમ્ ॥

પરમાત્મમહાવાયૌ રજસ્ સ્ફુરતિ ચઞ્ચલમ્ ।
કુસુમાન્તર્ ઇવામોદસ્ તદતદ્રૂપકં સ્વતઃ ॥

જગદાખ્યે મહાસ્વપ્ને સ્વપ્નાત્ સ્વપ્નાન્તરં વ્રજેત્ ।
રૂપં ત્યજતિ નો શાન્તં બ્રહ્મ શાન્તત્વબૃંહિતમ્ ॥

સઙ્કલ્પપરિબૃંહેયમ્ અનન્તસ્ફુરણા સ્વતઃ ।
યથા યથાભિબૃંહાભિર્ બૃંહત્ય્ આબૃંહિતા તથા ॥

સઙ્કલ્પશ્ ચ પરાદ્ અસ્માન્ મનાગ્ અપિ ન ભિદ્યતે ।
ચિન્મયત્વાત્ તતઃ કિઞ્ચિન્ ન બૃંહાસ્તિ ન બૃંહણમ્ ॥

રમ્ભાસ્તમ્ભો યથા પત્ત્રમાત્રમ્ એવાન્તરાન્તરા ।
અન્તર્ અન્તસ્ તથેદં હિ વિશ્વં બ્રહ્મ વિવર્ત્ય્ અથ ॥

સબ્રહ્માત્માદિભિશ્ શબ્દૈર્ યદ્ એતૈર્ અભિધીયતે ।
શૂન્યમ્ અવ્યપદેશ્યં તન્ ન નકિઞ્ચિન્ ન કિઞ્ચન ॥

યા યા વિભાવ્યતે સત્તા સા સાનુભવનિર્મિતા ।
રમ્ભાસ્તમ્ભવદ્ એવાતશ્ ચિન્માત્રમ્ અમલં તતમ્ ॥

સૂક્ષ્મત્વાદ્ અપ્ય્ અલભ્યત્વાત્ પરમાત્મા પરો ઽણુકઃ ।
અનન્તત્વાદ્ અસાવ્ એવ પ્રોક્તો મેર્વાદિધૂલિમાન્ ॥

અણોર્ અપ્ય્ અત્યનન્તસ્ય પુરો ઽસ્ય જગદાદ્ય્ અપિ ।
પરમાણુવદ્ આભાતિ પ્રમિતત્વાદ્ અરૂપવત્ ॥

પરો ઽણુર્ એષો ઽલભ્યત્વાત્ પૂરકત્વાન્ મહાગિરિઃ ।
સર્વાવયવરૂપો ઽપિ નિરસ્તાવયવઃ પુમાન્ ॥

અસ્ય વિજ્ઞપ્તિમાત્રસ્ય મજ્જામાત્રં જગત્ત્રયી ।
વિજ્ઞાનમાત્રમધ્યં હિ સાધો વિદ્ધિ જગત્ત્રયમ્ ॥

વિજ્ઞાનમાત્રમ્ અકલાકલિતં જગન્તિ શાન્તં સ્વભાવસુકુમારમ્ અનન્તરૂપમ્ ।
વેતાલબાલક પદં તદ્ અલઙ્ઘનીયમ્ એવંસ્મયસ્ સમનુભાવય શાન્તમ્ આસ્સ્વ ॥