મોક્ષોપાય · અધ્યાય 6.75

ઇત્ય્ ઉક્તવતિ વેતાલે વક્તું પ્રશ્નાન્ વિહસ્ય સઃ ।
ઉવાચ વચનં રાજા દન્તાંશુધવલાનનઃ ॥

અસ્તિ ચિત્તિક્તતાત્મેદં બ્રહ્માણ્ડમરિચં ફલમ્ ।
ઉત્તરોત્તરસંવૃત્તભૂતત્વક્પરિવેષ્ટિતમ્ ॥

તાદૃશાનાં સહસ્રાણિ ફલાનાં યત્ર સન્તિ હિ ।
અસ્ત્ય્ ઉચ્ચૈસ્ તાદૃશી શાખા વિપુલા ચલપલ્લવા ॥

તાદૃશીનાં સહસ્રાણિ શાખાનાં યત્ર સન્ત્ય્ અથ ।
તાદૃશો ઽસ્તિ મહાવૃક્ષો દુર્લક્ષ્યો વિપુલાકૃતિઃ ॥

યત્ર સન્તિ સહસ્રાણિ તાદૃશાનાં મહીરુહામ્ ।
તાદૃશં વનમ્ અસ્ત્ય્ ઉચ્ચૈર્ અનન્તતરુગુલ્મકમ્ ॥

તાદૃશાનાં સહસ્રાણિ વનાનાં યત્ર સન્ત્ય્ અથ ।
તાદૃગ્ અસ્તિ બૃહચ્ છૃઙ્ગમ્ અત્યુચ્ચૈર્ ભરિતાકૃતિ ॥

તાદૃશાનાં સહસ્રાણિ શૃઙ્ગાણાં યત્ર સન્ત્ય્ અથ ।
તાદૃશો ઽસ્તિ મહાશૈલઃ પૂરિતાખિલદિક્તટઃ ॥

તાદૃશાનાં સહસ્રાણિ શૈલાનાં યત્ર સન્ત્ય્ અથ ।
તાદૃશો ઽસ્ત્ય્ અતિવિસ્તીર્ણો દેશો વિપુલકોટરઃ ॥

તાદૃશાનાં સહસ્રાણિ દેશાનાં યત્ર સન્ત્ય્ અથ ।
તાદૃગ્ અસ્તિ બૃહદ્ દ્વીપં મહાહ્રદનદીવૃતમ્ ॥

તાદૃશાનાં સહસ્રાણિ દ્વીપાનાં યત્ર સન્ત્ય્ અથ ।
તાદૃગ્ અસ્તિ મહીપીઠં વિચિત્રરચનાન્વિતમ્ ॥

તાદૃશીનાં સહસ્રાણિ પૃથ્વીનાં યત્ર સન્ત્ય્ અથ ।
તાદૃગ્ અસ્તિ જગત્ સ્ફારં મહાભુવનપઞ્જરમ્ ॥

તાદૃશાનાં સહસ્રાણિ જગતાં યત્ર સન્ત્ય્ અથ ।
તાદૃગ્ અસ્તિ મહચ્ ચાણ્ડં ચણ્ડાડમ્બરપીઠવત્ ॥

તાદૃશાનાં સહસ્રાણિ યત્રાણ્ડાણાં તરઙ્ગકઃ ।
તાદૃશો ઽવિરતસ્પન્દો વિપુલો ઽસ્ત્ય્ અથ સાગરઃ ॥

તાદૃક્સાગરલક્ષ્યાણિ તરઙ્ગો યત્ર પેલવઃ ।
તાદૃશસ્ સ્વવિલાસાત્મા નિર્મલો ઽસ્તિ મહાર્ણવઃ ॥

તાદૃંશ્ય્ અબ્ધિસહસ્રાણિ યસ્યોદરજલાન્ય્ અથ ।
તાદૃશો ઽસ્તિ પુમાન્ કશ્ચિદ્ અત્યુચ્ચૈર્ ભરિતાકૃતિઃ ॥

તાદૃશાનાં નૃણાં લક્ષૈર્ યસ્ય માલોરસિ સ્થિતા ।
પ્રધાનં સર્વસત્તાનાં તાદૃશો ઽસ્ત્ય્ અપરઃ પુમાન્ ॥

તાદૃશાનાં સહસ્રાણિ પુરુષાણાં મહાત્મનામ્ ।
સ્ફુરન્તિ મણ્ડલે યસ્ય સ્વતનૂરુહજાલવત્ ॥

તાદૃશો ઽસ્તિ મહાદિત્યસ્ સ તપત્ય્ આસુ દૃષ્ટિષુ ।
યા એતાઃ કલનાસ્ સર્વાસ્ તા એતાસ્ તસ્ય દીપ્તયઃ ॥

અસ્યાદિત્યસ્ય રશ્મીનાં બ્રહ્માણ્ડં ત્રસરેણુવત્ ।
એષ ચિત્સૂર્ય ઇત્ય્ ઉક્તસ્ સર્વમ્ એતત્ તપત્ય્ અસૌ ॥

વિજ્ઞાનાત્મૈષ પરમો ભાસ્કરો ભાવિભાસનઃ ।
ઇમે યે ભુવનાભોગાસ્ તસ્યૈવ ત્રસરેણવઃ ॥

વિજ્ઞાનપરમાર્કસ્ય ભાસા ભાન્તિ ભવન્તિ ચ ।
ઇમા જગદહર્લક્ષ્મ્યસ્ ત્વ્ અહર્લક્ષ્મ્યો રવેર્ ઇવ ॥

વિજ્ઞાનમાત્રકચિતાત્મનિ જન્તુજાતે ત્રૈલોક્યમણ્ડપગણે ચ વિકાસભાજિ ।
નિર્મજ્જનોદ્ભવનસમ્ભ્રમભાવલેખાસ્ સન્તીવ નેહ હિ મનાગ્ અપિ શાન્તમ્ આસ્સ્વ ॥