મોક્ષોપાય · અધ્યાય 6.74

જીવો ઽજીવીભવત્ય્ આશુ યાતિ ચિત્તમ્ અચિત્તતામ્ ।
વિચારાદ્ ઇત્ય્ અવિદ્યાન્તો મોક્ષ ઇત્ય્ અભિધીયતે ॥

મૃગતૃષ્ણાજલમ્ ઇવ સર્ગો ઽહન્તાદિ દૃશ્યતે ।
અસદ્ એવ મનાગ્ એવ તદ્ વિચારાત્ પ્રલીયતે ॥

સંસૃતિસ્વપ્નવિશ્રાન્તૌ વેતાલોદાહૃતાન્ ઇમાન્ ।
પ્રશ્નાન્ આકર્ણય શુભાન્ પ્રસઙ્ગાત્ સ્મૃતિમ્ આગતાન્ ॥

અસ્તિ વિન્ધ્યમહાટવ્યાં વેતાલો વિપુલાકૃતિઃ ।
સ કિઞ્ચિન્ મણ્ડલં ગર્ધાદ્ આજગામ જિઘત્સયા ॥

સ વેતાલો ઽવસત્ પૂર્વં કસ્મિંશ્ચિત્ સજ્જનાસ્પદે ।
બહુબલ્યુપહારેણ નિત્યતૃપ્તતયા સુખી ॥

નિર્નિમિત્તં નિરાગસ્કં ન તેનાસૌ પુરોગતમ્ ।
ક્ષુધિતો ઽપિ નરં હન્તિ સઙ્ગો હિ ન્યાયદૈશિકઃ ॥

સ કાલેનાટવીગેહો જગામ નગરાન્તરમ્ ।
ન્યાયયુક્ત્યા જનં ભોક્તું ક્ષુધા સમભિચોદિતઃ ॥

તત્ર પ્રાપ સ ભૂપાલં રાત્રિચર્યાવિનિર્ગતમ્ ।
તમ્ આહ ઘનઘોરેણ શબ્દેનોગ્રનિશાચરઃ ॥

રાજંલ્ લબ્ધો ઽસિ ભીમેન વેતાલેન મયાધુના ।
ક્વ ગચ્છસિ વિનષ્ટો ઽસિ ભવાન્ ભોજનમ્ અદ્ય મે ॥

ભો રાત્રિચર નિર્ન્યાયં માં ચેદ્ અત્સિ બલાદ્ ઇહ ।
તત્ તે સહસ્રધા મૂર્ધા સ્ફુટિષ્યતિ ન સંશયઃ ॥

ન ત્વામ્ અદ્મ્ય્ અહમ્ અન્યાયં ન્યાયો ઽયં તુ મયોચ્યતે ।
રાજાસિ સકલાશાશ્ ચ પૂરણીયાસ્ ત્વયાર્થિનામ્ ॥

મમેમામ્ અર્થિતાં રાજન્ સમ્ભવાર્થં પ્રપૂરય ।
પ્રશ્નાન્ ઇમાન્ મયોક્તાંસ્ ત્વં સમ્યગ્ વ્યાખ્યાતુમ્ અર્હસિ ॥

કસ્ય સૂર્યસ્ય રશ્મીનાં બ્રહ્માણ્ડાન્ય્ અણવઃ કૃશાઃ ।
કસ્મિન્ સ્ફુરન્તિ પવને મહાગગનરેણવઃ ॥

સ્વપ્નાત્ સ્વપ્નાન્તરં ગચ્છઞ્ શતશો ઽથ સહસ્રશઃ ।
ત્યજન્ ન ત્યજતિ સ્વચ્છં કસ્ સ્વરૂપં પ્રભાસુરમ્ ॥

રમ્ભાસ્તમ્ભો યથા પત્ત્રમાત્રમ્ એવ પુનઃ પુનઃ ।
અન્તર્ અન્તસ્ તથાન્તશ્ ચ તથા કો ઽણુસ્ સ એવ હિ ॥

બ્રહ્માણ્ડાકાશભૂતૌઘસૂર્યમણ્ડલમેરવઃ ।
અપરિત્યજતો ઽણુત્વં કસ્યાણોઃ પરમાણવઃ ॥

કસ્યાનવયવસ્યૈવ પરમાણુમહાગિરેઃ ।
શિલાન્તર્ નિબિડૈકાન્તરૂપો મજ્જા જગત્ત્રયી ॥

ઇતિ કથયસિ ચેન્ ન મે દુરાત્મંસ્ તદ્ ઇહ નિગીર્ય ભવન્તમ્ આત્મઘાતિન્ ।
ફલમ્ ઇવ તવ મણ્ડલં ગ્રસેયં પ્રસભમ્ ઉપેત્ય જગદ્ યથા કૃતાન્તઃ ॥