મોક્ષોપાય · અધ્યાય 6.62

નષ્ટો મોહસ્ સ્મૃતિર્ લબ્ધા ત્વત્પ્રસાદાન્ મયાચ્યુત ।
સ્થિતો ઽસ્મિ ગતસન્દેહઃ કરિષ્યે વચનં તવ ॥

વૃત્તયો યદિ બોધેન સંશાન્તા હૃદયે સ્ફુટમ્ ।
તચ્ ચિત્તં શાન્તમ્ એવાશુ વિદ્ધિ સત્ત્વમ્ ઉપાગતમ્ ॥

અત્ર તચ્ ચેત્યરહિતં પ્રત્યક્ચેતનનામકમ્ ।
વસ્તુ શિષ્ટં વિનિર્મુક્તં યત્ સર્વં સર્વતશ્ ચ યત્ ॥

ન કેચન પ્રબાધન્તે તત્ પદં જગદાધયઃ ।
ભૂતલાદ્ ગગનોડ્ડીનં વિહઙ્ગમમ્ ઇવોતવઃ ॥

પ્રત્યક્ચેતનમ્ આભાસં શુદ્ધં સઙ્કલ્પવર્જિતમ્ ।
અગમ્યમ્ એનમ્ આત્માનં વિદ્ધિ દુષ્ટદૃશામ્ ઇહ ॥

સર્વાતીતપદસ્થસ્ય ચિતા શુદ્ધસ્ય વાસના ।
ન શક્નોતિ પદં દ્રષ્ટું જનદૃષ્ટિર્ અહેર્ ઇવ ॥

યત્પ્રાપ્તૌ સર્વ એવેમે ક્ષીણા ઘટપટાદયઃ ।
વરાકી વાસના તત્ર કિં કરોતિ પરે પદે ॥

યથાનલગિરિં પ્રાપ્ય હિમલેશો વિલીયતે ।
શુદ્ધમ્ આસાદ્ય ચિત્તત્ત્વમ્ અવિદ્યા લીયતે તથા ॥

ક્વ વરાકી રજસ્તુચ્છા વાસના ભોગબન્ધની ।
ક્વાપૂરિતજગજ્જાલશ્ ચિત્તત્ત્વવિપુલાનિલઃ ॥

તાવત્ સ્ફુરત્ય્ અવિદ્યેયં નાનાકારવિકારિણી ।
યાવન્ ન સમ્પરિજ્ઞાતશ્ શુદ્ધસ્ સ્વાત્માયમ્ આત્મના ॥

સર્વા દૃશ્યદૃશઃ ક્ષીણાશ્ શુદ્ધતૈવોદિતાતતા ।
નભસીવ પદે તસ્મિન્ સ્વાત્મન્ય્ અખિલપૂરણે ॥

સમગ્રાકારરૂપં તત્ સમગ્રાકારવર્જિતમ્ ।
વાગતીતં પરં વસ્તુ કેન નામોપમીયતે ॥

વિષયવિષવિષૂચિકામ્ અતસ્ ત્વં નિપુણમ્ અહંસ્થિતિવાસનામ્ અપાસ્ય ।
અભિમતપરિહારયત્નયુક્ત્યા ભવ વિરુજો ભુવનૈકનાથમૂર્તિઃ ॥

ઇતિ ગદિતવતિ ત્રિલોકનાથે ક્ષણમ્ ઇવ મૌનમ્ અવસ્થિતે પુરસ્તાત્ ।
અથ મધુપ ઇવાસિતાબ્જષણ્ડે વચનમ્ ઉપૈષ્યતિ તત્ર પાણ્ડુપુત્રઃ ॥

પરિગલિતસમસ્તશોકભાવા પરમ્ ઉદયં ભગવન્ મતિર્ ગતેયમ્ ।
મમ તવ વચનેન લોકભર્તુર્ દિનપતિના પરિબોધિતાબ્જિનીવ ॥

ઇત્ય્ ઉક્ત્વોત્થાય ગાણ્ડીવધન્વા સ હરિસારથિઃ ।
અર્જુનો ગતસન્દેહો રણલીલાં કરિષ્યતિ ॥

કરિષ્યતિ ક્ષતગજવાજિસારથિદ્રુતદ્રવદ્રુધિરમહાનદીં ભુવમ્ ।
શરોત્કરપ્રસરમયાભ્રમણ્ડલીતિરોહિતદ્યુમણિવિલોચનાં દિવમ્ ॥