મોક્ષોપાય · અધ્યાય 6.5

અહો બત મહચ્ ચિત્રં ભવદ્વાક્યાર્થભાવનાત્ ।
શાન્તં જગજ્જાલમ્ ઇદમ્ અગ્રસ્થમ્ અપિ નાથ મે ॥

પરામ્ અન્તઃ પ્રયાતો ઽસ્મિ સ્વયમ્ આત્મનિ નિર્વૃતિમ્ ।
દીર્ઘાવગ્રહસન્તપ્તં વૃષ્ટ્યેવ વસુધાતલમ્ ॥

શામ્યામિ શીતલાકારસ્ સુખં તિષ્ઠામિ કેવલમ્ ।
પ્રસાદમ્ ઉપયાતો ઽસ્મિ સરો નિર્વારણં યથા ॥

સમ્યક્ પ્રસન્નમ્ અખિલં દિઙ્મણ્ડલમ્ ઇદં મુને ।
યથાભૂતં પ્રપશ્યામિ નિર્નીહારમ્ ઇવાધુના ॥

જાતો ઽસ્મિ ગતસન્દેહશ્ શાન્તાશામૃગતૃષ્ણિકઃ ।
રજોનીહારનિર્મુક્તો વૃષ્ટજઙ્ગલશીતલઃ ॥

આત્મનૈવાન્તર્ આનન્દં તં પ્રાપ્તો ઽસ્મ્ય્ અન્તવર્જિતમ્ ।
રસાયનરસાસ્વાદો યત્ર નાથ તૃણાયતે ॥

અદ્યાયં પ્રકૃતિસ્થો ઽસ્મિ સ્વસ્થો ઽસ્મિ મુદિતો ઽસ્મિ ચ ।
લોકારામો ઽસ્મિ રામો ઽસ્મિ નમો મહ્યં નમો ઽસ્તુ તે ॥

તે સંશયાસ્ તાઃ કલનાસ્ સર્વમ્ અસ્તઙ્ગતં મમ ।
રાત્રિવેતાલસઞ્ચારઃ પ્રભાત ઇવ ભાસ્વરે ॥

નિર્મલે હૃદિ વિસ્તીર્ણે સપદ્મે હિમશીતલે ।
મતિર્ નિર્વૃતિમ્ આયાતા સારસી સરસીવ મે ॥

કલઙ્ક આત્મનઃ કસ્માત્ કથં વેત્યાદિસંશયઃ ।
નૂનં નિર્મૂલતાં યાતો મમાર્કાગ્રે યથા તમઃ ॥

સર્વમ્ આત્મૈવ સર્વત્ર સર્વદા ભાવિતાકૃતિઃ ।
ઇદમ્ અન્યદ્ ઇદં ચાન્યદ્ ઇત્ય્ અસત્કલનાઃ કુતઃ ॥

કો ઽભૂવં પ્રાગ્ અહં તાદૃક્ તૃષ્ણાનિગડયન્ત્રિતઃ ।
અન્તરાત્માનમ્ એવેતિ વિહસામિ વિકાસવાન્ ॥

આમ્ ઇદાનીં સ્મૃતં સમ્યઙ્ મયૈષ સ કિલાસ્મ્ય્ અજઃ ।
યસ્ ત્વદ્વાગમૃતાપૂરસ્નાનેનાયમ્ અહં સ્થિતઃ ॥

અહો નુ વિતતાં ભૂમિમ્ અધિરૂઢો ઽસ્મિ પાવનીમ્ ।
ઇહસ્થ એવ યત્રાર્કો નઃ પાતાલમ્ ઇવાસ્થિતઃ ॥

મહ્યં સત્તામ્ ઉપેતાય વ્યપેતાય ભવાર્ણવાત્ ।
નમો નિત્યનમસ્યાય જયામ્ય્ આત્માત્મનાત્મનિ ॥

અનુભવવશતો હૃદબ્જકોશે સ્ફુટમ્ અલિતાં સમુપાગતેન નાથ ।
તવ વરવચસેહ વીતશોકાં ચિરમ્ ઉદિતાં સ્વદશામ્ ઉપાગતો ઽસ્મિ ॥