મોક્ષોપાય · અધ્યાય 6.4

મનો બુદ્ધિર્ અહઙ્કાર ઇન્દ્રિયાદિ તથાનઘ ।
અચેત્યચિન્મયં સર્વં ક્વ તે જીવાદયસ્ સ્થિતાઃ ॥

એકેનૈવાત્મના દત્તા નાનાતા યા મહાત્મના ।
વિદ્ધિ તાં ત્વમ્ અનાનાતાં હેમ્નઃ કટકતામ્ ઇવ ॥

યાવદ્ અજ્ઞાનસમ્મોહસ્ તાવત્ સંસારચિત્તકમ્ ।
અજ્ઞાનસઙ્ક્ષયે જાતે ક્વ ચેત્યં ચિત્તકં ચ વા ॥

અધ્યાત્મવિદ્યાભ્યસનાજ્ જાડ્યમ્ એતિ ક્ષયં તથા ।
હુતાશસેવનાદ્ અન્તર્જાડ્યં જલકૃતં યથા ॥

ભોગતૃષ્ણાવિષાવેશો યદૈવોપશમં ગતઃ ।
તદૈવ નષ્ટમ્ અજ્ઞાનમ્ આન્ધ્યં ધ્વાન્તક્ષયાદ્ ઇવ ॥

અધ્યાત્મશાસ્ત્રમન્ત્રેણ તૃષ્ણાવિષવિષૂચિકા ।
ક્ષીયતે ભાવિતેનાન્તશ્ શરદા મિહિકા યથા ॥

મૌર્ખ્યે ક્ષીણે ક્ષતં વિદ્ધિ ચિત્તં રામ સબાન્ધવમ્ ।
વિલીને ઽમ્બુધરે વ્યોમ્નિ જાડ્યં શામ્યત્ય્ અવિઘ્નતઃ ॥

અચિત્તત્વં ગતે ચિત્તે ક્ષીયતે વાસનાભ્રમઃ ।
હારમુક્તાસમાવેશશ્ છિન્ને તન્તાવ્ ઇવાનઘ ॥

ન ઘનાઘવિઘાતાય શાસ્ત્રાર્થં ભાવયન્તિ યે ।
ક્રિમિકીટત્વભોગાય ચેતસસ્ સમ્મિલન્તિ તે ॥

તવ તામરસાકારકાન્તલોચન લોલતા ।
શાન્તા મૌર્ખ્યકૃતા વાતચલતા સરસો યથા ॥

સ્થિરતામ્ ઉપયાતો ઽસિ ભાવાભાવવિવર્જિતે ।
પદે પરમવિસ્તારે નભસીવ પ્રભઞ્જનઃ ॥

મન્યે મદ્વચનૈર્ બોધમ્ આયાતો ઽસિ રઘૂદ્વહ ।
વિતતાજ્ઞાનનિદ્રાતો નિદ્રાતઃ પટહૈર્ ઇવ ॥

સામાન્યે ઽપિ લગન્ત્ય્ એવ મન્યે કુલગુરોર્ ગિરઃ ।
અત્યુદારમતૌ રામ ન લગન્તિ કથં ત્વયિ ॥

યત્રોપાદેયવાક્યત્વં ભાવિતં સ્વેન ચેતસા ।
તદ્વચો ઽન્તર્ વિશત્ય્ ઉચ્ચૈસ્ તપ્તે ક્ષેત્રે યથા પયઃ ॥

વયમ્ ઇહ હિ મહાનુભાવ નિત્યં કુલગુરવો ગુરવો રઘૂદ્વહાનામ્ ।
તદુદિતમ્ ઇદમ્ આશુ કાર્યમ્ આર્ય સ્ફુટવચનં હૃદિ હારવત્ ત્વયેતિ ॥