મોક્ષોપાય · અધ્યાય 6.44

યથાકામં યથારમ્ભં ન કરોષિ કરોષિ યત્ ।
ચિન્માત્રસ્ય શિવસ્યાન્તસ્ તદ્ દેવાર્ચનમ્ આત્મનઃ ॥

તેનૈવાહ્લાદમ્ આયાતિ યાતિ પ્રકટતાં તથા ।
તથાસ્થિતેન રૂપેણ સ્વેનૈવ સ્વયમ્ ઈશ્વરઃ ॥

રાગદ્વેષાદિશબ્દાર્થા નાત્મન્ય્ અન્યતમાશ્ શિવે ।
સમ્ભવન્તિ પૃથગ્રૂપા વહ્નૌ હિમકણા ઇવ ॥

યદ્ યદ્ રાજત્વદીનત્વસુખદુઃખાદિવેદનમ્ ।
આત્મીયં પરકીયં ચ તત્ તદ્ અર્ચનમ્ આત્મનઃ ॥

વિદ્ધિ સંવિત્તિમ્ એવાર્ચાં વેત્ત્ય્ આત્માત્માનમ્ એવ ચ ।
ઘટાદ્યાત્મતયા બ્રહ્મન્ સ્વયમ્ આત્મતયૈવ વા ॥

શિવં શાન્તમ્ અનાભાસમ્ એકં ભાસુરમ્ આતતમ્ ।
જગત્પ્રત્યયવત્ સર્વમ્ આત્મરૂપમ્ ઇદં સ્થિતમ્ ॥

અહો નુ ચિત્રમ્ આત્મૈવ ઘટાદ્ય્ અન્યદ્ અવસ્થિતમ્ ।
જીવાદિસ્ સ્વસ્થ એવાન્તર્ નૂનં વિસ્મૃતવાન્ ઇવ ॥

સર્વાત્મકસ્યાનન્તસ્ય શિવસ્યાન્તઃ કિલાત્મનઃ ।
પૂજ્યપૂજકપૂજાખ્યો વિભ્રમઃ પ્રોદિતો વૃથા ॥

નિયતાકારશાન્તત્વં ન ચ સમ્ભવતીશ્વરે ।
યતસ્ સઙ્કલ્પ્યતે બ્રહ્મન્ પૂજ્યપૂજામયઃ ક્રમઃ ॥

પૂજ્યપૂજાવ્યવચ્છિન્નો દેવો ઽનિત્યો ઽમલાત્મનઃ ।
સર્વશક્તેર્ અનન્તસ્ય નેશ્વરત્વસ્ય ભાજનમ્ ॥

ત્રિજગત્પ્રસૃતાચ્છાચ્છસંવિદ્રૂપસ્ય ચાત્મનઃ ।
નેશ્વરત્વાદ્ ઋતે બ્રહ્મન્ વ્યપદેશો ઽપિ યુજ્યતે ॥

દેશકાલપરિચ્છિન્નો યેષાં સ્યાત્ પરમેશ્વરઃ ।
અસ્માકમ્ ઉપદેશ્યાસ્ તે ન વિપશ્ચિદ્ વિપશ્ચિતઃ ॥

તદીયાં દૃષ્ટિમ્ ઉત્સૃજ્ય તથેમામ્ અવલમ્બ્ય ચ ।
સમસ્ સ્વસ્થમનાશ્ શાન્તો વીતરાગો નિરામયઃ ॥

કાર્યોપહારૈર્ અભિતો યથાપ્રાપ્તૈર્ અખિન્નધીઃ ।
આત્માનમ્ અર્ચયંસ્ તિષ્ઠ સુખદુઃખશુભાશુભૈઃ ॥

અધિગતવતિ સાધાવ્ એવમ્ એવાશુ નૂનં ત્વયિ તરલિતજીવં જન્મદુઃખાદિ કિઞ્ચિત્ ।
ન લગતિ પરિશુદ્ધે સર્વતસ્ સ્ફાટિકાઙ્ગે નવસદન ઇવાન્તર્ નિષ્કલઙ્કે કલઙ્કઃ ॥