મોક્ષોપાય · અધ્યાય 6.40

તતં ચિદ્રૂપમ્ એવૈકં સર્વસત્તાન્તરસ્થિતમ્ ।
સ્વાનુભૂતિમયં શુદ્ધં દેવં રુદ્રેશ્વરા વિદુઃ ॥

બીજં સમસ્તબીજાનાં સારં સંસારસંસૃતેઃ ।
કર્મણાં પરમં કર્મ ચિદ્ધાતું વિદ્ધિ નિર્મલમ્ ॥

કારણં કારણૌઘાનામ્ અકારણમ્ અનાબિલમ્ ।
ભાવનં ભાવનાંશાનામ્ અભાવ્યમ્ અભવાત્મકં ॥

ચેતનં ચેતનૌઘાનાં ચેતનાત્મનિ ચેતિતમ્ ।
અચેત્યચેતનં ચેત્યં પરમં ભૂરિભાસનમ્ ॥

આલોકાલોકમ્ અમલમ્ અનાલોક્યમ્ અલોકજમ્ ।
અબીજં જીવબીજૌઘં ચિદ્ઘનં વિમલં વિદુઃ ॥

અસત્યં સન્મયં શાન્તં સત્યાસત્યવિવર્જિતમ્ ।
મહાસત્તાદિસન્તાનં ચિન્માત્રં વિદ્ધિ નેતરત્ ॥

સ્વયં ભવતિ રાગાત્મા રઞ્જકો રઞ્જનં રજઃ ।
સ્વયમ્ આકાશમ્ અપ્ય્ આશુ કુડ્યં ભવતિ મણ્ડિતમ્ ॥

અસ્મિંશ્ ચિત્તેજસિ સ્ફારે જગન્મરુમરીચયઃ ।
સ્ફુરિતાઃ પ્રસ્ફુરિષ્યન્તિ પ્રસ્ફુરન્તિ ચ કોટિશઃ ॥

સ્વસત્તામાત્રસમ્પન્નમ્ ઇદમ્ અસ્મિન્ સ્વતેજસિ ।
ન કિઞ્ચિદ્ અપિ સમ્પન્નમ્ અન્યદ્ ઔષ્ણ્યાદ્ ઇવાનલે ॥

ગર્ભીકૃતમહામેરું પરમાણુમ્ અમું વિદુઃ ॥

ગર્ભીકૃતમહાકલ્પો નિમેષો ઽયમ્ ઉદાહૃતઃ ।
આક્રાન્તકલ્પેનાનેન ન સન્ત્યક્તા નિમેષતા ॥

વાલાગ્રકાદ્ અપ્ય્ અણુના વ્યાપ્તાનેનાખિલા મહી ।
સપ્તાબ્ધિવલયાપ્ય્ ઉર્વી નાસ્યાન્તમ્ અધિગચ્છતિ ॥

અકુર્વન્ન્ એવ સંસારરચનાં કર્તૃતાં ગતઃ ।
કુર્વન્ન્ એવ મહાકર્મ ન કરોત્ય્ એવ કિઞ્ચન ॥

દ્રવ્યમ્ અપ્ય્ એવ નિર્દ્રવ્યો નિર્દ્રવ્યો ઽપિ હિ દ્રવ્યવત્ ।
અકાયો ઽપિ મહાકાયો મહાકાયો ઽપ્ય્ અકાયવાન્ ॥

અદ્યાપ્ય્ એષ સદા પ્રાતઃ પ્રાતર્ અપ્ય્ અદ્યતાં ગતઃ ।
ન ચાયમ્ અદ્ય ન પ્રાતસ્ ત્વ્ અદ્ય પ્રાતશ્ ચ વા સદા ॥

હુણ્ડુભિલ્લિઘલે મત્તશુલુપિણ્ઠિલિસાલઘે ।
વેલ્લિઘિલ્લિસલાવોલલાસગુગ્ગુલુસુસ્સુની ॥

ઇત્યાદ્ય્ અનર્થકં વાક્યં તથા સત્યં સ એવ ચ ।
ન તદ્ અસ્તિ ન યત્ સ સ્યાન્ ન તદ્ અસ્તિ ન યત્ ત્વ્ અસૌ ॥

યસ્મૈ સર્વં યતસ્ સર્વં યસ્ સર્વં સર્વતશ્ ચ યઃ ।
યશ્ ચ સર્વમયો નિત્યં તસ્મૈ સર્વાત્મને નમઃ ॥

પત્ત્રાન્તરાલગહનેન વિલાસવત્યા હેલાવિલોલઘનગર્જિતયા મલેન ।
મલ્લેન મલ્લપદમાલિતમાલવાનાં લક્ષ્મીલતાવિવલિતા વલિતેવ પુષ્ટિઃ ॥