મોક્ષોપાય · અધ્યાય 6.32

એતસ્મિન્ સમયે તત્ર યામાર્ધે પ્રથમે ગતે ।
સમાધિં તનુતાં નીત્વા સ્થિતો ઽહં બાહ્યલગ્નદૃક્ ॥

અપશ્યં કાનને તેજો ઝગિત્ય્ એવ સમુત્થિતમ્ ।
મન્દરાહનનોદ્ધૂતક્ષુબ્ધક્ષીરોદભાસુરમ્ ॥

શુભ્રાભ્રશતસઙ્કાશં નૃત્યદિન્દુગણોપમમ્ ।
ચણ્ડાનિલબલોદ્ધૂતં હિમરાશિમ્ ઇવાચલમ્ ॥

યુગાન્તતાપગલિતં સુસ્ફાટિકમ્ ઇવાચલમ્ ।
નાવનીતમ્ ઇવામ્ભોદં કેતકૌઘમ્ ઇવોત્થિતમ્ ॥

શઙ્ખશૌક્લ્યમ્ ઇવોડ્ડીનં શુભ્રાભ્રમ્ ઇવ સમ્ભૃતમ્ ।
ક્ષીરફેનમ્ ઇવોત્ફાલં મુક્તાસારમ્ ઇવોદ્ધતમ્ ॥

ગઙ્ગાતરઙ્ગભરવત્ પ્રવિષ્ટં કન્દરાન્તરમ્ ।
પિણ્ડહાર્યં સુદધિવચ્ છાર્વં હાસમ્ ઇવાતતમ્ ॥

પ્રકટીકૃતદિક્ તેજસ્ તદ્ આલોક્ય મયા સ્મયાત્ ।
અન્તઃપ્રકાશશાલિન્યા બુદ્ધિદૃષ્ટ્યાવલોકિતમ્ ॥

યાવત્ પશ્યામિ તં સાનું લીલયૈવ યદૃચ્છયા ।
વિહરન્ સ્વગિરૌ હૃદ્યે તાવચ્ ચન્દ્રકલાધરઃ ॥

પાશ્ચાત્યગુલ્માન્તરિતગણજાલોપમાલિતઃ ।
ગૌરીકરાર્પિતકરો નન્દિપ્રોત્સારિતાગ્રગઃ ॥

પશ્ચાત્પરિક્રાન્તવૃષસ્ સર્વરાત્રિચરાવૃતઃ ।
કલ્હારદામવલિતો મન્દારકૃતશેખરઃ ॥

જટામૌલીન્દુકલિકો ભોગીન્દ્રકૃતકુણ્ડલઃ ।
ચલત્તુષારશૈલાભસ્ સર્વસઙ્કલ્પિતાર્થદઃ ॥

મનોદૃષ્ટસ્ સ ભગવાન્ મનસૈવ તતો મયા ।
દત્તમન્દારપુષ્પેણ પ્રણતેનાભિવન્દિતઃ ॥

ઇતિ કૃત્વા મયા દેહઃ પર્યઙ્કશયનાદ્ અયમ્ ।
ક્ષણાદ્ ઉત્થાપિતસ્ તસ્માદ્ ભૂતેનેવ મહાશવઃ ॥

શિષ્યાન્ ઉદ્બોધ્ય તત્રસ્થાન્ ગૃહીત્વાર્ઘં સુસંયતઃ ।
અગમં લોકનાથસ્ય દૃષ્ટિપૂતમ્ અહં પુરઃ ॥

તત્ર પુષ્પાઞ્જલિં દત્ત્વા દૂરાદ્ એવ ત્રિલોચનઃ ।
દત્તાર્ઘેણ મયા દેવસ્ સ પ્રણમ્યાભિવન્દિતઃ ॥

તતશ્ ચન્દ્રપ્રભામૃદ્વ્યા ઋજ્વ્યા શીતલયા તયા ।
દૃશા સર્વાર્તિહારિણ્યા સરણ્યા શાશ્વતે પદે ॥

અહમ્ આલોક્ય દેવેન ચન્દ્રાર્ધકૃતમૌલિના ।
પુષ્પસાનૂપવિષ્ટેન પ્રોક્તસ્ સ્મિતસિતાક્ષરમ્ ॥

આનયાર્ઘ્યં તથા પાદ્યં બ્રહ્મન્ સ્વાગતમ્ અસ્તુ તે ।
આશ્રમાતિથયઃ પ્રાપ્તા વયમ્ અદ્ય તવાનઘ ॥

ઘનાભિરામશાલિન્યા સતતં શમશાન્તયા ।
મુદિતોદારયા બ્રહ્મંસ્ તપોલક્ષ્મ્યા વિરાજસે ॥

આગચ્છોપવિશાસ્મિંસ્ ત્વમ્ અકૃત્રિમદલાસને ।
મૃદૌ સાનુસમુદ્ભૂતે પુણ્યસઞ્ચયપાવને ॥

ઇતિ પ્રોક્તવતે તસ્મૈ નિશેશાર્ધાર્ધધારિણે ।
અર્ઘં પુષ્પં તથા પાદ્યં સમુપેત્યાર્પિતં મયા ॥

પાદયોર્ હસ્તયોશ્ ચૈવ તન્વાં ચાસ્ય સ્વયમ્ભુવઃ ।
મન્દારપુષ્પાવલયો વિકીર્ણા બહવઃ પુરઃ ॥

તતો ભગવતી ગૌરી તાદૃશ્યૈવ સપર્યયા ।
સમ્પૂજિતા સખીયુક્તા ગણમણ્ડલિકા તથા ॥

ગૃહીતવન્તૌ તૌ તાં મે સપર્યામ્ આદરાત્ પ્રભૂ ।
ભક્તિપ્રણયિનો રામ પાર્વતીપરમેશ્વરૌ ॥

પૂજાન્તે પૂર્ણશીતાંશુરશ્મિશીતલયા ગિરા ।
તત્રોપવિષ્ટં પ્રોવાચ મામ્ અથેન્દુકલાધરઃ ॥

બ્રહ્મન્ પ્રશમશાલિન્યઃ પ્રાપ્તવિશ્રાન્તયઃ પરે ।
કચ્ચિત્ કલ્યાણકારિણ્યસ્ સંવિદસ્ તે સ્થિતાઃ પદે ॥

કચ્ચિત્ કમલકલ્હારકુમુદાનયનક્ષમાઃ ।
તવાન્તેવાસિનો બ્રહ્મન્ નીરુજસ્ ત્વદનુવ્રતાઃ ॥

બલિભાગભુજાં કચ્ચિદ્ ભગવન્ ભવદાશ્રમે ।
કુશલં મુગ્ધમુગ્ધાનાં મૃગાણાં મત્પ્રિયાદૃશામ્ ॥

કચ્ચિન્ મન્દારકુસુમાન્ય્ એતે મન્દારપાદપાઃ ।
તવાસ્મદાદિપૂજાર્થં સમ્પ્રયચ્છન્તિ સૂન્નતાઃ ॥

કચ્ચિન્ મન્દાકિની પુણ્યં તવ સ્નાનોપયોગિકમ્ ।
એકયા વાહલતયા દદાત્ય્ ઉત્પલપઙ્કજમ્ ॥

અસમઞ્જસચેષ્ટાસુ નિત્યં ચેષ્ટાસુ મે ઽનઘ ।
અપિ મદ્ગણલીલાસુ મુનિનાથ ન ખિદ્યસે ॥

તિષ્ઠન્તમ્ ઇહ શૈલેન્દ્રે વિપિનારણ્યવાસિનઃ ।
અપિ નોદ્વેજયન્તિ ત્વાં ધનેશાનુચરા મુને ॥

દુર્વૃત્તઘનયક્ષૌઘે વિપ્ર લોલનિશાચરે ।
વસતો ઽસ્મિન્ ગિરેઃ કુક્ષાવ્ અપ્ય્ અનુદ્વેગિતાસ્તિ તે ॥

એવંવાદિનિ દેવેશે સર્વલોકૈકકારણે ।
ગિરાનુનયશાલિન્યા મયોક્તં રઘુનન્દન ॥

ત્ર્યક્ષાનુસ્મૃતિકલ્યાણવતામ્ ઇહ મહેશ્વર ।
ન કિઞ્ચિદ્ અપિ દુષ્પ્રાપં ન ચ કાશ્ચન ભીતયઃ ॥

ત્વદનુસ્મરણાનન્દપરિપૂર્ણિતચેતસઃ ।
ન તે સન્તિ જગત્કોશે પ્રણતિં યે ન બિભ્રતિ ॥

તે દેશાસ્ તે જનપદાસ્ તા દિશસ્ તે ચ પર્વતાઃ ।
ત્વદનુસ્મરણૈકાન્તધિયો યત્ર નરાસ્ સ્થિતાઃ ॥

ફલં ભૂતસ્ય પુણ્યસ્ય વર્તમાનસ્ય સેચનમ્ ।
તરોર્ ઇવૈષ્યતો બીજં ત્વદનુસ્મરણં પ્રભો ॥

ભૂતં ભવ્યં ભવિષ્યચ્ ચ સફલં યેન નામ તત્ ।
કાલત્રિતયકલ્યાણં ત્વદનુસ્મરણં પ્રભો ॥

પરમં મનસો મિત્રં સર્વાપત્પ્રસરાપહમ્ ।
સર્વસમ્પલ્લતાસેકસ્ ત્વદનુસ્મરણં પ્રભો ॥

મહામહિમ્નાં મહતાં મહિતાનાં ચ કર્મણામ્ ।
કારણં કારણાનાં વૈ ત્વદનુસ્મરણં પ્રભો ॥

વિવેકપયસામ્ અબ્ધિઃ પુણ્યરત્નાકરઃ પરઃ ।
અજ્ઞાનતિમિરાર્કૌઘસ્ ત્વદનુસ્મરણં પ્રભો ॥

જ્ઞાનામૃતૌઘકલશો ધૃતિજ્યોત્સ્નાનિશાકરઃ ।
અપવર્ગપુરદ્વારં ત્વદનુસ્મરણં પ્રભો ॥

તૃષ્ણાલતાયાઃ પરશુર્ ધૈર્યામ્ભોધરપર્વતઃ ।
દૈન્યદુર્વનદાવાગ્નિસ્ ત્વદનુસ્મરણં પ્રભો ॥

જયત્ય્ આભાસિતાશેષચિત્તસંસારમણ્ડપઃ ।
અપૂર્વઃ પરમો દીપસ્ ત્વદનુસ્મરણં પ્રભો ॥

ત્વદનુસ્મરણોદારચિન્તામણિમતા મયા ।
સર્વાસામ્ આપદાં મૂર્ધ્નિ દત્તં ભૂતપતે પદમ્ ॥

સકલદુઃખભયાપહર પ્રભો ક્ષણમ્ અપીહ મયાસિ ન ચેતસા ।
વરદ વીર મહેશ્વર વિસ્મૃતસ્ સુખમ્ અતો નિવસામિ ભવાન્ ઇવ ॥

ઇત્ય્ ઉક્તવત્ય્ અથ મુનૌ દિવસો જગામ સાયન્તનાય વિધયે ઽસ્તમ્ ઇનો જગામ ।
સ્નાતું સભા કૃતનમસ્કરણા જગામ શ્યામાક્ષયે રવિકરૈશ્ ચ સહાજગામ ॥