મોક્ષોપાય · અધ્યાય 6.31

એતાં દૃષ્ટિમ્ અવષ્ટભ્ય નષ્ટકષ્ટેષ્ટચેષ્ટિતઃ ।
તિષ્ઠાષ્ટગુણમ્ ઐશ્વર્યમ્ અપ્ય્ અરિષ્ટમ્ ઇવોત્સૃજન્ ॥

અથેમામ્ અપરાં દૃષ્ટિં મહામોહવિનાશિનીમ્ ।
દુષ્પ્રાપામ્ અપિ સુપ્રાપામ્ અનપાયામ્ અનામયામ્ ॥

શૃણુ યા કથિતા પૂર્વં મમ કૈલાસકન્દરે ।
સંસારદુઃખશાન્ત્યર્થં દેવેનાર્ધેન્દુમૌલિના ॥

અસ્તીન્દુકરસમ્ભારભાસુરઃ પારગો દિવઃ ।
કૈલાસો નામ શૈલેન્દ્રો ગૌરીરમણમન્દિરમ્ ॥

ગઙ્ગાનિર્ઝરનિર્ધૌતો ગણોદ્ગીર્ણગુહાગૃહઃ ।
મન્દાનિલવલચ્ચૂતકદમ્બવનબન્ધુરઃ ॥

લીલાલોલામરગણઃ કૃતકોકકલારવઃ ।
કૌમારબર્હિવલિતખર્જૂરવનપિઞ્જરઃ ॥

તમાલાન્તર્હિતામ્ભોદઃ કદલીતુલિતામ્બુદઃ ।
ચઞ્ચરીજાલજટિલઃ કૂજત્કલકપિઞ્જલઃ ॥

વિદ્યાધરોદ્ગીતગુહઃ કચત્કનકકન્દરઃ ।
કારણ્ડવોડ્ડામરવાગ્ અસઙ્ખ્યકુસુમામ્બુદઃ ॥

વિમુક્તજલદોદ્ગારસ્ સિદ્ધચારણસેવિતઃ ।
ચન્દ્રાવચૂલદયિતસ્ ત્રિલોકીલોકવન્દિતઃ ॥

સત્કલ્પપાદપભુજસ્ સુશિખાશૃઙ્ગકન્ધરઃ ।
રત્નવિદ્યોતનયનો વનાવલિતનૂરુહઃ ॥

કાચકન્દરકેશશ્રીસ્ સ્વવનાવલનાંશુકઃ ।
પવનોદ્ધૂતકિઞ્જલ્કજાલારુણતલામ્બરઃ ॥

તત્રાસ્તે ભગવાન્ દેવો હરશ્ ચન્દ્રકલાધરઃ ।
શૂલપાણિસ્ ત્રિનયનો ગણૌઘપરિવારિતઃ ॥

ભવાનીહૃતદેહાર્ધસ્ સર્વલોકૈકકારણમ્ ।
કન્દર્પદર્પદલનઃ કલાકરકલાધરઃ ॥

ષણ્મુખાનુગતચ્છાયઃ પ્રમત્તવૃષવાહનઃ ।
મત્તેભકૃત્તિવસનશ્ શ્મશાનરમણાલયઃ ॥

તં પૂજયન્ મહાદેવં તસ્મિન્ન્ એવ ગિરૌ પુરા ।
કદાચિદ્ અવસં ગઙ્ગાતટે ઽહં રચિતાશ્રમઃ ॥

તપોઽર્થં તાપસાચારે ચિરાય રચિતસ્થિતિઃ ।
યથાક્રમસદાચારઃ પુણ્યસાનુસમાશ્રયઃ ॥

નિવાસાર્થં કૃતસ્નાનઃ કૃતનીલદલોટજઃ ।
બાલવૃક્ષકબદ્ધાસ્થસ્ સંરોપિતલતાવૃતિઃ ॥

સઞ્ચિતાગ્ર્યવનપ્રાણિર્ ઉપાર્જિતકમણ્ડલુઃ ।
પુષ્પાર્થં સ્યૂતપુટકસ્ સૂમ્ભિતસ્વાક્ષમાલિકઃ ॥

શિષ્યસઙ્ઘાતવલિતઃ કૃતશાસ્ત્રાર્થસઙ્ગ્રહઃ ।
આનીતપુસ્તકવ્યૂહઃ પરિપાલિતસન્મૃગઃ ॥

એવંગુણવિશિષ્ટસ્ય કૈલાસવનકુઞ્જકે ।
તપઃ પ્રચરતો રામ મમ કાલો ઽત્યવર્તત ॥

અથૈકદા કદાચિત્ તુ બહુલસ્યાષ્ટમે દિને ।
ગતે શ્રાવણપક્ષસ્ય રાત્ર્યર્ધે ક્ષયમ્ આગતે ॥

દિક્ષુ સંશાન્તરૂપાસુ કાષ્ઠમૌનસ્થિતાસ્વ્ ઇવ ।
ખડ્ગચ્છેદ્યાન્ધકારેષુ કુઞ્જેષુ ગહનેષુ ચ ॥

અવશ્યાયલસન્મુક્તાહાસે સરતિ મારુતે ।
આલવાલોપધાનેષુ મૃગેષ્વ્ આશ્રમશાયિષુ ॥

અમૃતાંશુકરસ્યન્દમ્ આત્મનઃ પરિવૃદ્ધયે ।
લિહત્સુ શશિરશ્મિભ્યઃ પલ્લવેષ્વ્ અમૃતદ્રવમ્ ॥

કુમુદ્વતીષ્વ્ ઓષધીષુ ચકોરીષુ લતાસુ ચ ।
પિબન્તીષ્વ્ અમૃતસ્યન્દં કરૈર્ આકીર્ણમ્ ઐન્દવમ્ ॥

શૈલવિશ્રાન્તનીલાભ્રપલ્લવસ્ય વિસારિણઃ ।
કૃત્તિકાગુચ્છકે વ્યોમતાપિઞ્છસ્ય ત્રિભાગગે ॥

તારૌઘપ્રતિબિમ્બેન ગિરૌ સ્ફટિકભૂમિષુ ।
વિકાસિપુષ્પપ્રકરે દ્વિગુણત્વમ્ ઉપાગતે ॥

મયિ પલ્લવપલ્યઙ્કગતે મુક્તેહયા ધિયા ।
ચિન્તયત્ય્ અમલાભાસમ્ આત્મતત્ત્વમ્ અવિપ્લુતમ્ ॥

દ્વિતીયમદ્દેહવતિ વ્યોમ્નિ સપ્તર્ષિમણ્ડલે ।
મદર્થમ્ ઇવ તામ્ એવ દિશમ્ આપતતીવ ચ ॥

તારકાત્રિતયે વ્યોમ્નો ગૃહમૂર્ધનિ મધ્યગે ।
મૃગત્રયે કિરાતાત્તે સદા ભ્રમમ્ ઇવાગતે ॥

ઉત્ફુલ્લકુમુદામોદદ્વિગુણોદ્દામમન્મથે ।
ચક્રવાકગણે શૈલસરસીષ્વ્ અન્યતાં ગતે ॥

શિલાશિખોપવિષ્ટાસુ શૈલોત્કીર્ણાસ્વ્ ઇવાભિતઃ ।
પિબન્તીષુ ચકોરીષુ શીતં શશિકરામૃતમ્ ॥

વહતિ મધુરમારુતે વને ઽન્તશ્ શશિકરશીકરવર્ષણૈકશીતે ।
દલચયચલનોત્થશબ્દગીતે કુમુદવધૂપ્રથમાભિસારિણીવ ॥