મોક્ષોપાય · અધ્યાય 6.28

એતત્ તે કથિતં બ્રહ્મન્ યથાસ્મિ યદ્ ઇહાસ્મિ વા ।
ત્વદાજ્ઞામાત્રસિદ્ધ્યર્થં ધાર્ષ્ટ્યેન જ્ઞાનપારગ ॥

અહો નુ ચિત્રં ભગવન્ ભવતા ભૂષણં શ્રુતેઃ ।
આત્મોદન્તઃ પ્રકથિતઃ પરં વિસ્મયકારણમ્ ॥

ધન્યાસ્ તે યે મહાત્માનમ્ અત્યન્તં ચિરજીવિતમ્ ।
ભવન્તં પરિપૃચ્છન્તિ દ્વિતીયમ્ ઇવ પદ્મજમ્ ॥

વયમ્ અદ્ય ભૃશં ધન્યાસ્ સ્વાત્મોદન્તમ્ અખણ્ડિતમ્ ।
યથાવત્ પાવનં બુદ્ધેસ્ સર્વં કથિતવાન્ અસિ ॥

પ્રભ્રાન્તં દિક્ષુ સર્વાસુ દૃષ્ટા વિબુધભૂમયઃ ।
ભવાન્ ઇવ જગત્ય્ અસ્મિન્ ન મહાન્ અવલોકિતઃ ॥

કથઞ્ચિત્ પ્રાપ્યતે કચ્ચિદ્ ભ્રાન્ત્વેહ હિ મહાજનઃ ।
ન ભવાન્ ઇવ ભવ્યાત્મા સુલભો જગતિ ક્વચિત્ ॥

વંશખણ્ડે હિ કસ્મિંશ્ચિજ્ જાયતે મૌક્તિકં યથા ।
જગત્ખણ્ડે હિ કસ્મિંશ્ચિજ્ જાયતે ત્વાદૃશસ્ તથા ॥

મયા તુ સુમહત્ કાર્યમ્ અદ્ય સમ્પાદિતં શુભમ્ ।
પુણ્યદેહો વિમુક્તાત્મા યદ્ ભવાન્ અવલોકિતઃ ॥

તદ્ અસ્તુ તવ કલ્યાણં પ્રવિશાત્મગુહાં શુભામ્ ।
મધ્યાહ્નસમયો ઽયં મે વ્રજામિ સુરમન્દિરમ્ ॥

ઇત્ય્ આકર્ણ્ય ભુસુણ્ડો ઽસૌ જગ્રાહોત્થાય પાદપાત્ ।
સઙ્કલ્પિતાભ્યાં હસ્તાભ્યાં સુપાત્રં હેમપલ્લવમ્ ॥

કલ્પવૃક્ષલતાપુષ્પકેસરેણ હિમત્વિષા ।
તત્ પાત્રં મૌક્તિકાર્ઘેણ પૂરયામ્ આસ પૂર્ણધીઃ ॥

તેનાર્ઘ્યપાદ્યપાત્રેણ ત્રિનેત્રમ્ ઇવ મામ્ અસૌ ।
આપાદમસ્તકં ભક્ત્યા પૂજયામ્ આસ પૂર્વજઃ ॥

અનુવ્રજ્યાકદર્થેન ખગેન્દ્રાલમ્ ઇતિ બ્રુવન્ ।
વિષ્ટરાદ્ અહમ્ ઉત્થાય તતઃ ખગવદ્ આપ્લુતઃ ॥

વ્યોમ્નિ યોજનમાત્રેણ મદનુવ્રજ્યયા ગતઃ ।
કરં કરેણાવષ્ટભ્ય બલાત્ સંરોધિતઃ ખગઃ ॥

મયિ યાતે તતો દીર્ઘે ગગનાધ્વન્ય્ અદૃશ્યતામ્ ।
નિવૃત્તો ઽસૌ વિહઙ્ગેશો દુસ્ત્યજા સઙ્ગતિસ્ સતામ્ ॥

અન્યોઽન્યં મયિ તસ્મિંશ્ ચ તરઙ્ગક ઇવામ્બુધૌ ।
વ્યોમન્ય્ અદૃશ્યતાં યાતે ગતસ્ સ્મૃત્યા મુનીન્ અહમ્ ॥

સપ્તર્ષિમણ્ડલં પ્રાપ્ય જાયયા પરિપૂજિતઃ ।
વિસ્મયોત્ફુલ્લહૃદયસ્ તતો ઽહં રાઘવાવસમ્ ॥

ભુસુણ્ડો ભવ્યતુણ્ડો ઽસૌ તસ્મિન્ કલ્પલતાલયે ।
સમશ્ શાન્તમના માન્યસ્ સ્વસમાધાનવાન્ અભૂત્ ॥

જીવત્ય્ અદ્યાપિ મતિમાંસ્ તસ્મિન્ન્ એવ લતાદલે ।
તત્રૈવ સંસ્થિતો મેરોસ્ તથૈવ કનકદ્રુમે ॥

યાતે કૃતયુગસ્યાદૌ પુરા વર્ષશતદ્વયે ।
સઙ્ગતો ઽહં ભુસુણ્ડેન મેરૌ શૃઙ્ગદ્રુમે ઽભવમ્ ॥

અદ્ય રામ કૃતે ક્ષીણે ત્રેતા સમ્પરિવર્તતે ।
મધ્યે ત્રેતાયુગસ્યાસ્ય જાતસ્ ત્વં રિપુસૂદન ॥

પુનર્ અદ્યાષ્ટમં વર્ષં તત્રૈવોપરિ ભૂભૃતઃ ।
મિલિતો ઽભૂદ્ ભુસુણ્ડો ઽસૌ તથૈવાજરરૂપવાન્ ॥

ઇતીદં કથિતં ચિત્રં ભુસુણ્ડોદન્તમ્ ઉત્તમમ્ ।
શ્રુત્વા વિચાર્ય ચૈવાન્તર્ યદ્ યુક્તં તત્ સમાચર ॥

ઇતિ સુમુનિભુસુણ્ડસઙ્કથાં યો વિમલમતિઃ પ્રવિચારયિષ્યતીહ ।
ભવભયબહલાં કુસંસૃતિં સ પ્રસભમ્ અસત્સરિતં તરિષ્યતીતિ ॥