મોક્ષોપાય · અધ્યાય 6.215

અહો નુ વિતતોદારા વિપુલા વિમલાચલા ।
ભવતા ભગવન્ ભૂત્યૈ ભૂયો દૃષ્ટિર્ ઉદાહૃતા ॥

સર્વથા સર્વદા સાર્વં સર્વં સર્વત્ર સર્વદમ્ ।
સદ્ ઇત્ય્ એવ સ્થિતં સત્યં સમં સમનુભૂતિતઃ ॥

અયમ્ અસ્તિ મમ બ્રહ્મન્ સંશયસ્ તં નિવારય ।
કિમ્ ઇદં ભગવન્ નામ પાષાણાખ્યાનમ્ ઉચ્યતે ॥

સર્વત્ર સર્વદા સર્વમ્ અસ્તીતિ પ્રતિપાદને ।
પાષાણાખ્યાનદૃષ્ટાન્તો મયાયં તવ કથ્યતે ॥

નીરન્ધ્રૈકઘનાઙ્ગસ્ય પાષાણસ્યાપિ કોટરે ।
સન્તિ સર્ગસહસ્રાણિ કથયેતિ પ્રદર્શ્યતે ॥

ભૂતાકાશે મહત્ય્ અસ્મિન્ સ્વં શૂન્યત્વમ્ અનુજ્ઝતિ ।
સન્તિ સર્ગસહસ્રાણિ કથયેતિ પ્રદર્શ્યતે ॥

કુડ્યાદૌ સન્તિ સર્ગૌઘા ઇતિ ચેત્ કથ્યતે મુને ।
તત્ ખે વિભાન્તિ સર્ગૌઘા ઇતિ કિં ન પ્રદર્શ્યતે ॥

એતત્ તે વર્ણિતં રામ મુખ્યમ્ એવ મયાખિલમ્ ।
યો ઽયમ્ આલક્ષ્યતે સર્ગસ્ સર્ગ એવ ખમ્ આસ્થિતમ્ ॥

આદાવ્ એવ હિ નોત્પન્નમ્ અદ્યાપિ ચ ન વિદ્યતે ।
દૃશ્યં યચ્ ચાવભાતીદં તદ્ બ્રહ્મ બ્રહ્મણિ સ્થિતમ્ ॥

નાસ્તિ ભૂર્ અણુમાત્રાપિ સર્ગૈર્ નિર્વિવરા ન યા ।
ન ચ ક્વચન વિદ્યન્તે સર્ગા બ્રહ્મખમ્ એવ તત્ ॥

વારિણો નાણુર્ અપ્ય્ અસ્તિ સર્ગૈર્ નિર્વિવરો ન યઃ ।
ન ચ ક્વચન સર્ગાસ્ તે સન્તિ બ્રહ્મખમ્ એવ તત્ ॥

ન તેજસો ઽણુર્ અપ્ય્ અસ્તિ સર્ગૈર્ નિર્વિવરો ન યઃ ।
ન ચ ક્વચન વિદ્યન્તે સર્ગા બ્રહ્મખમ્ એવ તત્ ॥

ન વાયોર્ અણુર્ અપ્ય્ અસ્તિ સર્ગૈર્ નિર્વિવરો ન યઃ ।
ન ચ ક્વચન સર્ગાસ્ તે સન્તિ બ્રહ્મખમ્ એવ તત્ ॥

ખં નાણુમાત્રમ્ અપ્ય્ અસ્તિ સર્ગૈર્ નિર્વિવરં ન યત્ ।
ન ચ ક્વચન વિદ્યન્તે સર્ગા બ્રહ્મખમ્ એવ તત્ ॥

ન સા મહાભૂતતાસ્તિ સર્ગૈર્ નિર્વિવરા ન યા ।
ન ચ ક્વચન વિદ્યન્તે સર્ગા બ્રહ્મખમ્ એવ તે ॥

પ્રાણ્યઙ્ગો નાણુર્ અપ્ય્ અસ્તિ સર્ગૈર્ નિર્વિવરો ન યઃ ।
ન ચ ક્વચન સર્ગાસ્ તે સન્તિ બ્રહ્મખમ્ એવ તત્ ॥

શૈલાનાં નાણુર્ અપ્ય્ અસ્તિ સ સર્ગૈર્ યો ન નિર્ઘનઃ ।
ન ચ ક્વચન વિદ્યન્તે સર્ગા બ્રહ્મખમ્ એવ તત્ ॥

બ્રહ્મણો નાણુર્ અપ્ય્ અસ્તિ સર્ગૈર્ નિર્વિવરો ન યઃ ।
ન ચ ક્વચન સર્ગાસ્ તે સન્તિ બ્રહ્મખમ્ એવ તત્ ॥

સર્ગેષુ નાણુર્ અપ્ય્ અસ્તિ ન બ્રહ્માત્મૈવ યસ્ સદા ।
બ્રહ્મ સર્ગસ્ તથા ત્વ્ એષ વાચિ ભેદો ન વસ્તુનિ ॥

સર્ગ એવ પરં બ્રહ્મ પરં બ્રહ્મૈવ સર્ગતા ।
મનાગ્ અપ્ય્ અસ્તિ ન દ્વૈતમ્ અત્રાગ્ન્યર્કૌષ્ણ્યયોર્ ઇવ ॥

ઇમે સર્ગા ઇદં બ્રહ્મ ચેત્ય્ એતા વાક્યદૃષ્ટયઃ ।
વિદાર્યદારુરવવદ્ ભાન્ત્ય્ અર્થપરિવર્જિતાઃ ॥

દ્વૈતમ્ ઐક્યં ચ યત્રાસ્તિ ન મનાગ્ અપિ તત્ર તે ।
સર્ગબ્રહ્માદિશબ્દાર્થાẖ કથં કસ્યેવ ભાન્તુ તે ॥

શાન્તમ્ એકમ્ અનાદ્યન્તમ્ ઇદમ્ અચ્છમ્ અનામયમ્ ।
વ્યવહારવતો ઽપ્ય્ અઙ્ગ જ્ઞસ્ય મૌનં શિલાઘનમ્ ॥

નિર્વાણમ્ એવમ્ અખિલં નભ એવ દૃશ્યં ત્વં ચાહમ્ અદ્રિનિચયાશ્ ચ સુરાસુરાશ્ ચ ।
તાદૃગ્ જગત્ સમવલોકય યાદૃગ્ અઙ્ગ સ્વપ્ને ઽન્યજન્તુમનસિ વ્યવહારજાલમ્ ॥