મોક્ષોપાય · અધ્યાય 6.20

સર્વરત્નગણાધારસ્ સમસ્તસુરસંશ્રયઃ ।
અસ્ત્ય્ અમેયમહોત્સેધો મેરુર્ નામ મહીધરઃ ॥

ચલચ્ચન્દ્રાર્કદીપસ્ય ભૂતવૃન્દકલત્રિણઃ ।
બ્રહ્માણ્ડમણ્ડપસ્યાસ્ય સ્તમ્ભઃ કનકનિર્મિતઃ ॥

સૌવર્ણશ્ ચન્દ્રવીટાર્થં રત્નાઢ્યશ્ શિખરાઙ્ગુલિઃ ।
ધ્વનદ્દ્વીપાબ્ધિવલયો ભુવેવોન્નામિતો ભુજઃ ॥

વૃતઃ કુલાદ્રિસામન્તૈર્ જમ્બુદ્વીપાસને સ્થિતઃ ।
રાજા ચન્દ્રાર્કનયને ભ્રમયઞ્ શૈલસંસદિ ॥

તારૌઘમાલતીમાલ્યો દિગ્દશૈકામ્બરામ્બરઃ ।
નાગદ્વિતયસંસ્થાત્મા નાકનાયકભૂષણઃ ॥

દિગઙ્ગનાભિર્ અભિતો રમ્યાભિઃ પુરભૂષણૈઃ ।
પૃષન્નિષ્ષ્યન્દિભિશ્ શીતૈર્ વીજિતો ઘનચામરૈઃ ॥

ષોડશાસ્ય સહસ્રાણિ યોજનાનામ્ અધઃ ક્ષિતેઃ ।
સ્થિતાઃ પાદાઃ પ્રપૂજ્યન્તે નાનાસુરમહોરગૈઃ ॥

અશીતિસ્ તુ સહસ્રાણિ દેહો ઽસ્યાર્કેન્દુલોચનઃ ।
પૂજ્યતે નાકસદનૈસ્ સુરગન્ધર્વકિન્નરૈઃ ॥

ચતુર્દશવિધાન્ય્ એનં ગૃહસ્થમ્ ઇવ બન્ધવઃ ।
ઉપજીવન્તિ ભૂતાનિ મિથોઽદૃષ્ટપુરાસ્પદમ્ ॥

અસ્ય ત્વ્ ઈશાનદિગ્ભાગે પદ્મરાગમયં બૃહત્ ।
વિદ્યતે શૃઙ્ગમ્ અપરો દિવાકર ઇવોદિતઃ ॥

તસ્યાસ્તિ પૃષ્ઠે ભૂતૌઘવૃતઃ કલ્પતરુર્ મહાન્ ।
જગતશ્ શિખરાદર્શે પ્રતિબિમ્બમ્ ઇવ સ્થિતઃ ॥

તસ્યાસ્તિ દક્ષિણસ્કન્ધે શાખા કનકપલ્લવા ।
રત્નસ્તબકનીરન્ધ્રા ચન્દ્રબિમ્બાભસત્ફલા ॥

તત્ર નીડં મયા પૂર્વં કૃતમ્ આસીત્ સ્ફુરન્મણિ ।
દેવ્યાં ધ્યાનનિષણ્ણાયાં યસ્મિન્ કિલ રમે સુતાઃ ॥

રત્નપુષ્પદલચ્છન્નં રસાયનફલાન્વિતમ્ ।
ચિન્તામણિશલાકાભિર્ વિહિતાલિન્દસંસ્થિતિ ॥

બુદ્ધિપૂર્વસમાચારૈસ્ સમ્પૂર્ણં કાકપુત્રકૈઃ ।
શીતલાભ્યન્તરં હૃદ્યં પૂરિતં કુસુમોત્કરૈઃ ॥

તદ્ ગચ્છત સુતા નીડં દુર્ગં નાકસદામ્ અપિ ।
ભોગં મોક્ષં ચ તત્રસ્થા નિર્વિઘ્નં સમવાપ્સ્યથ ॥

ઇત્ય્ ઉક્ત્વાસ્માન્ પિતા તત્ર ચુચુમ્બાભ્યાલિલિઙ્ગ ચ ।
દદૌ દેવ્યૈ યદ્ આનીતમ્ અસ્મભ્યં ચ તદ્ આમિષમ્ ॥

તદ્ ભુક્ત્વા ચરણૌ દેવ્યાઃ પિતુશ્ ચૈવાભિવન્દ્ય ચ ।
વિન્ધ્યકચ્છાદ્ વયં તસ્માત્ સ્થાનાદ્ આલમ્બુસાત્ પ્લુતાઃ ॥

ક્રમેણાકાશમ્ ઉલ્લઙ્ઘ્ય નિર્ગત્યામ્બુદકોટરૈઃ ।
પવનસ્કન્ધમ્ આરુહ્ય વન્દિતવ્યોમચારિણઃ ॥

પરિહૃત્ય દિનાધીશં લોકાન્તરપુરાદ્ ગતાઃ ।
સ્વર્ગમ્ ઉલ્લઙ્ઘ્ય યાતાસ્ સ્મો બ્રહ્મલોકં મુનીશ્વર ॥

પ્રણામપૂર્વં તત્રૈતદ્ યથાવસ્તુ પિતુર્ વચઃ ।
માત્રે ચ ભગવત્યૈ ચ બ્રાહ્મ્યૈ ચાશુ નિવેદ્ય હ ॥

તાભ્યાં સસ્નેહમ્ આલિઙ્ગ્ય ગચ્છથેત્ય્ આજ્ઞયૈધિતાઃ ।
વયં કૃતનમસ્કારા બ્રહ્મલોકાદ્ વિનિર્ગતાઃ ॥

ઉલ્લઙ્ઘ્ય લોકપાલાનાં પુરીસ્ તપનભાસુરાઃ ।
આકાશગામિનો લોલાઃ પવનસ્કન્ધચારિણઃ ॥

ઇમં કલ્પતરું પ્રાપ્ય નિજં નીડં પ્રવિશ્ય ચ ।
નિરસ્તબાધં તિષ્ઠામો મુને મૌનમ્ અવસ્થિતાઃ ॥

જાતા યથા વયમ્ ઇમે સ્થિતિમ્ આગતાશ્ ચ સમ્પ્રાપ્તબોધમ્ ઉપશાન્તધિયો યથા ચ ।
એતત્ તદ્ ઉક્તમ્ અવિખણ્ડમ્ અલં મયા તે શેષેણ માં સમનુશાધિ મહાનુભાવ ॥