મોક્ષોપાય · અધ્યાય 6.19

ઇત્ય્ ઉત્સવે વર્તમાને તાસાં વાહાસ્ ત ઉત્તમાઃ ।
તથૈવ મત્તા જહસુર્ નનૃતુઃ પપુર્ અપ્ય્ અસૃક્ ॥

તત્ર કાન્તાસવોન્મત્તાઃ ક્વચિન્ નનૃતુર્ અમ્બરે ।
રથહંસ્યસ્ સિતા બ્રાહ્મ્યઃ કાકશ્ ચાલમ્બુસારથઃ ॥

નૃત્યન્તીનાં તુ હંસીનાં પિબન્તીનાં તથાસવમ્ ।
વેલેવાબ્ધિતટીનાં તુ રતિસ્ સમ્યગ્ અજાયત ॥

સઞ્જાતરતયો મત્તાસ્ સર્વા હંસ્યઃ ક્રમેણ તાઃ ।
રેમિરે તેન કાકેન ચણ્ડકાખ્યેન વૈ તદા ॥

સપ્તાનાં બાલહંસીનાં દયિતો વાયસસ્ ત્વ્ અસૌ ।
ક્રમેણારમતૈકત્ર યાવદ્ અન્યોઽન્યમ્ ઈપ્સિતમ્ ॥

અથ તા ગર્ભધારિણ્યો બભૂવુર્ અતિતોષિતાઃ ।
દેવ્યશ્ ચ કૃતનૃત્તાસ્ તાઃ પ્રશાન્તમદતાં યયુઃ ॥

દદુર્ ઓદનતાં યાતામ્ ઈશ્વરાય પ્રિયામ્ ઉમામ્ ।
ભોજનાય મહામાયા દેવ્યસ્ તાશ્ શૂલપાણયે ॥

પ્રિયા મે ભોજને દત્તેત્ય્ એવં ચ શશિશેખરઃ ।
બુદ્ધ્વા બભૂવ રુષિતો યદા માતૃગણં પ્રતિ ॥

તદા તાસ્ તાં સમુત્પાદ્ય સ્વાઙ્ગદાનેન વૈ પુનઃ ।
દદુર્ ભૂયોવિવાહેન પાર્વતીમ્ ઇન્દુમૌલયે ॥

તતો દેવ્યો હરશ્ ચૈવ પરિવારસ્ તથૈતયોઃ ।
સર્વે સન્તુષ્ટમનસસ્ સ્વાં સ્વામ્ ઉપયયુર્ દિશમ્ ॥

અન્તર્વત્ન્યો બભૂવુસ્ તા બ્રાહ્મ્યો હંસ્યો મુનીશ્વર ।
વૃત્તાન્તં કથયામ્ આસુર્ બ્રાહ્મ્યા દેવ્યા યથાસ્થિતમ્ ॥

હે વત્સાસ્ સામ્પ્રતં ગર્ભવત્યો મે રથકર્મણિ ।
ન સમર્થા ભવત્યો ઽપિ સ્વૈરં ચરત સામ્પ્રતમ્ ॥

ઇતિ ગર્ભાલસા હંસીર્ મુક્ત્વા દેવી દયાપરા ।
નિર્વિકલ્પે સમાધાને બ્રાહ્મી તસ્થૌ યથાસુખમ્ ॥

અથ નાભિસરોજાતે વૈરિઞ્ચે કમલાકરે ।
ગર્ભાલસા વિચેરુસ્ તા રાજહંસ્યો મુનીશ્વર ॥

એવં વિપક્વગર્ભાસ્ તા નાભીકમલપલ્લવે ।
સુવતે સ્મ મૃદૂન્ય્ અણ્ડાન્ય્ અથ વલ્લ્ય ઇવાઙ્કુરાન્ ॥

તાનિ કાલં સમાસાદ્ય તત્રાણ્ડાન્ય્ એકવિંશતિઃ ।
ગર્ભાક્રાન્ત્યા દ્વિધા જગ્મુર્ બ્રહ્માણ્ડાનીવ સારવં ॥

અણ્ડેભ્યસ્ તેભ્ય એવં હિ જાતા વયમ્ ઇમે મુને ।
ભ્રાતરશ્ ચણ્ડતનયા વાયસા એકવિંશતિઃ ॥

તે સ્મ જાતા ગતા વૃદ્ધિં તસ્મિન્ કમલપલ્લવે ।
સઞ્જાતપક્ષાસ્ સમ્પન્ના ગગનોડ્ડયનક્ષમાઃ ॥

માતૃભિસ્ સહ હંસીભિર્ બ્રાહ્મી ભગવતી તતઃ ।
ચિરમ્ આરાધિતા સમ્યક્ સમાધિવિરતા સતી ॥

પ્રસાદપરયા કાલે ભગવત્યા તતસ્ સ્વયમ્ ।
તથાઙ્ગાનુગૃહીતાસ્ સ્મો યથા મુક્તા વયં સ્થિતાઃ ॥

સન્તૃપ્તમનસશ્ શાન્તા એકાન્તે ધ્યાનસંસ્થિતૌ ।
તિષ્ઠામ ઇતિ નિશ્ચિત્ય પિતુઃ પાર્શ્વં વયં ગતાઃ ॥

આલિઙ્ગિતાસ્ તતઃ પિત્રા પૂજિતાલમ્બુસા વયમ્ ।
તયા દૃષ્ટાઃ પ્રસાદેન સંસ્થિતાસ્ તત્ર સંયતાઃ ॥

પુત્રાઃ કચ્ચિદ્ અપર્યન્તાદ્ વાસનાસૂત્રસૂમ્ભિતાત્ ।
ભવન્તો નિર્ગતા નૂનમ્ અસ્માત્ સંસારજાલકાત્ ॥

નો ચેદ્ વયં ભગવતીં તદ્ ઇમાં ભૃત્યવત્સલામ્ ।
પ્રાર્થયામો યથા યૂયં ભવત જ્ઞાનપારગાઃ ॥

તાત જ્ઞાતમ્ અલં જ્ઞેયં બ્રાહ્મ્યા દેવ્યાઃ પ્રસાદતઃ ।
કિં ત્વ્ એકાન્તસ્થિતેસ્ સ્થાનમ્ અભિવાઞ્છામ ઉત્તમમ્ ॥

શૃણુત વિગતદોષં પાવનં સ્થાનમ્ અગ્ર્યં સ્થિરતરમ્ અયિ પુત્રા નીડકામાઃ પ્રવક્ષ્યે ।
વ્યપગતભયમોહં શાન્તસર્વપ્રચારં નિવસત ચિરતૃપ્તા યત્ર નિશ્શઙ્કમ્ ઉચ્ચૈઃ ॥