મોક્ષોપાય · અધ્યાય 6.174

અનહંવેદનાદ્ એવ શુભાશુભફલપ્રદા ।
સંસારફલિની નૂનમ્ ઇચ્છાન્તર્ ઉપશામ્યતિ ॥

અનહંવેદનાભ્યાસાત્ સમલોષ્ટાશ્મકાઞ્ચનઃ ।
ભૂત્વા શાન્તભવાપીડો ન નરḫ પરિતામ્યતિ ॥

સ્વસત્તાપુટકોડ્ડીનḫ પરબોધબલેરિતઃ ।
અહમિત્યર્થપાષાણો ન જાને ક્વાશુ ગચ્છતિ ॥

અહન્તાપુટકોડ્ડીનો બ્રહ્મવીરબલેરિતઃ ।
શરીરયન્ત્રપાષાણો ન જાને ક્વાશુ ગચ્છતિ ॥

અહમર્થહિમં ત્વ્ અન્તર્ અનહન્તાવિદર્ચિષા ।
ઉડ્ડીયેવ વિલીનં સન્ ન જાને ક્વાશુ ગચ્છતિ ॥

અહંરસો વિલીનો ઽન્તર્ અનહન્તાવિદર્ચિષા ।
શરીરપર્ણાદ્ ઉદ્વર્ણાન્ ન જાને ક્વાશુ ગચ્છતિ ॥

શરીરપર્ણાન્ નિષ્પીતો હ્ય્ અહમ્ભાવરસાસવઃ ।
અનહન્તાર્કમાર્ગેણ પરતામ્ અધિગચ્છતિ ॥

શયને કર્દમે શૈલે ગૃહે વ્યોમ્નિ સ્થલે જલે ।
સ્થૂલા સૂક્ષ્મા નિરાકારા રૂપાન્તરગતાપિ ચ ॥

યત્ર તત્ર સ્થિતા સુપ્તા પ્રબુદ્ધા ભસ્મતાં ગતા ।
મૃતા પીતા નિમગ્ના ચ દૂરસ્થા નિકટા સતી ॥

શરીરવટધાનાન્તસ્સ્થિતાહન્ત્વનવાઙ્કુરા ।
શાખાજાલં તનોત્ય્ ઉચ્ચૈસ્ સંસારાખ્યમ્ ઇદં ક્ષણાત્ ॥

અહન્ત્વવટધાનાન્તસ્સ્થિતો દેહબૃહદ્દ્રુમઃ ।
સંસારશાખાનિવહં યત્ર તત્ર તનોત્ય્ અલમ્ ॥

શાખાશતેદ્ધદલપુષ્પફલો દ્રુમો ઽસ્તિ બીજોદરે ન તુ દૃશા પરિદૃશ્યતે ઽસૌ ।
દેહો ઽપ્ય્ અહન્ત્વકણિકાન્તર્ અશેષદૃશ્યસંવિત્પરીત ઇતિ દૃશ્યદૃશૈવ દૃષ્ટમ્ ॥

દેહાદ્ અહન્ત્વમ્ અનવાપ્તવતો વિચારૈર્ વિદ્વ્યોમમાત્રવપુષો વપુષો ઽથ વોચ્ચૈઃ ।
નાહન્ત્વબીજજઠરાદ્ અસતો ઽભ્યુદેતિ સંસારવૃક્ષ ઇહ બોધમહાગ્નિદગ્ધાત્ ॥