મોક્ષોપાય · અધ્યાય 6.172

યત્રાહન્ત્વં જગત્ તત્ર પૂર્વમ્ આગત્ય તિષ્ઠતિ ।
પરાણ્વન્તર્ અપીન્દ્રસ્ય ત્રસરેણૂદરે યથા ॥

ભ્રમસ્ય જાગતસ્યાસ્ય જાતસ્યાકાશવર્ણવત્ ।
અહમ્ભાવો ઽભિમન્ત્રાત્મા મૂલમ્ આદ્યમ્ ઉદાહૃતમ્ ॥

વાસનારસસંસિક્તાદ્ અહમ્બીજકણાદ્ અયમ્ ।
બ્રહ્માદ્રૌ વ્યોમવિપિને જાયતે ત્રિજગદ્દ્રુમઃ ॥

તારકાપુષ્પનિકરો વિનીલાચલપલ્લવઃ ।
સરિત્સારસિરાપૂરો વાસનાસારસત્ફલઃ ॥

અહન્ત્વસલિલસ્યેદં જગત્ સ્પન્દ ઉદાહૃતઃ ।
ચિચ્ચમત્કરણે સ્વાદુ વાસનાવિસરદ્રસઃ ॥

તારકાશીકરાસારો નભોઽનન્તનિખાતવાન્ ।
ભાવાભાવમહાવર્તો નાનાગિરિતરઙ્ગકઃ ॥

ત્રિલોકીવિલિખલ્લેખો વિલોલાલોકફેનિલઃ ।
બ્રહ્માણ્ડબુદ્બુદોદ્ભેદẖ કવાટાપીડપીવરઃ ॥

ભૂપીઠદૃઢદિણ્ડીરપિણ્ડશ્ ચિદ્ઘનમણ્ડવાન્ ।
ચિત્રાજવઞ્જવીભાવમજ્જનોન્મજ્જનાત્મકઃ ॥

જરામરણમોહાદિવીચીચયચમત્કૃતિઃ ।
ઉત્પન્નધ્વંસદેહાદિબિન્દુવૃન્દૈકમન્દિરઃ ॥

અહન્ત્વપવનસ્પન્દો જગદ્ ઇત્ય્ અવગમ્યતામ્ ।
અહન્ત્વચન્દ્રસૌગન્ધ્યં જગદ્ ઇત્ય્ એવ બુધ્યતામ્ ॥

નાહન્ત્વજગતી ભિન્ને પવનસ્પન્દવત્ સદા ।
પયો દ્રવત્વમ્ ઇવ ચ વહ્નિર્ ઔષ્ણ્યમ્ ઇવાપિ ચ ॥

જગદ્ અસ્ત્ય્ અહમર્થે ઽન્તર્ અહમ્ અસ્તિ જગદ્ધૃદિ ।
અન્યોઽન્યભાવિની હ્ય્ એતે આધારાધેયવત્ સ્થિતે ॥

જગદ્બીજમ્ અહન્ત્વં યો માર્ષ્ટિ બોધાદ્ અવેદનાત્ ।
અલં ચિત્રં જલેનેવ તેન ધૌતં જગન્મલમ્ ॥

અહન્ત્વં નામ તત્ કિઞ્ચિદ્ વિદ્યાધર ન વિદ્યતે ।
અકારણમ્ અવસ્તુત્વાચ્ છશશૃઙ્ગમ્ ઇવોદિતમ્ ॥

બ્રહ્મણ્ય્ અતિતતે ઽનન્તે સકલોલ્લેખવર્જિતે ।
અહન્ત્વં કારણાભાવાન્ ન કદાચન સન્મયમ્ ॥

અવસ્તુન્ય્ ઓતુશૃઙ્ગાદૌ ન સમ્ભવતિ કારણમ્ ।
અતો ઽહન્ત્વાદિ નાસ્ત્ય્ એવ વન્ધ્યાસુત ઇવ ક્વચિત્ ॥

તદભાવાજ્ જગન્ નાસ્તિ ચિત્ત્વં જગદભાવતઃ ।
શિષ્ટં નિર્વાણમ્ એવાતશ્ શાન્તમ્ આસ્સ્વ યથાસુખમ્ ॥

અભાવાદ્ ઉપપત્તિસ્થાદ્ એવં જગદહન્ત્વયોઃ ।
રૂપાલોકમનસ્કારાશ્ શાન્તાસ્ તવ ભવેતરત્ ॥

યન્ નાસ્તિ તત્ તુ નાસ્ત્ય્ એવ શેષં શાન્તમ્ અસિ ધ્રુવમ્ ।
સમ્પ્રબુદ્ધો ઽસિ મા ભૂયો નિર્મૂલાં ભ્રાન્તિમ્ આહર ॥

વ્યપગતકલનાકલઙ્કશુદ્ધશ્ શિવમ્ અસિ શાન્તમ્ અસીશ્વરો ઽસિ નિત્યમ્ ।
ખમ્ ઇવ ભવસિ સર્વતોપમાનં જગદ્ અપિ વા પરમાણુરૂપમ્ એવ ॥