મોક્ષોપાય · અધ્યાય 6.16

અથ તસ્યાહમ્ અપતં દીપ્યમાનવપુઃ પુરઃ ।
કિઞ્ચિદ્વિક્ષોભિતસભં ખાન્ નક્ષત્રમ્ ઇવાચલે ॥

ચુક્ષોભ વાયસાસ્થાનનીલોત્પલસરઃ ક્ષણં ।
મત્પાતમન્દવાતેન ભૂકમ્પેનેવ સાગરઃ ॥

અશઙ્કિતમ્ અપિ પ્રાપ્તાદ્ દર્શનાત્ સમનન્તરમ્ ।
ભુસુણ્ડસ્ તુ વસિષ્ઠો ઽયં પ્રાપ્ત ઇત્ય્ અવબુદ્ધવાન્ ॥

પત્ત્રપુઞ્જાત્ સમુત્તસ્થૌ મેઘશાવ ઇવાચલાત્ ।
હે મુને સ્વાગતમ્ ઇતિ પ્રોવાચ મધુરાક્ષરમ્ ॥

સઙ્કલ્પમાત્રજાતાભ્યાં કરાભ્યાં કુસુમાઞ્જલિમ્ ।
મહ્યમ્ આશુ દદૌ બાલમેઘો હૈમમ્ ઇવોત્કરમ્ ॥

ઇદમ્ આસનમ્ ઇત્ય્ ઉક્ત્વા નવં કલ્પતરુચ્છદમ્ ।
ઉપનીતવતિ ત્યક્તભૃત્યે વાયસનાયકે ॥

ભુસુણ્ડાનૂત્થિતેષ્વ્ ઈષચ્ચલપક્ષેષુ પક્ષિષુ ।
ઉપવિષ્ટં મુનિં દૃષ્ટ્વા સ્વાસનોન્મુખદૃષ્ટિષુ ॥

સસભાખગવૃન્દેન ભુસુણ્ડેન સમં તતઃ ।
તસ્મિન્ કલ્પલતાકુઞ્જે ઉપવિષ્ટો ઽહમ્ આસને ॥

અથ પાદ્યાદિ દત્ત્વા સ ભુસુણ્ડસ્ તુષ્ટમાનસઃ ।
મામ્ ઉવાચ મહાતેજાસ્ સૌહાર્દમધુરાક્ષરમ્ ॥

અહો ભગવતાસ્માકં પ્રસાદો દર્શિતશ્ ચિરાત્ ।
દર્શનામૃતસેકેન યત્ સિક્તાસ્ સદ્રુમા વયમ્ ॥

મત્પુણ્યચિરસમ્ભારપ્રેરિતેન ત્વયાધુના ।
મુને માન્યૈકમાન્યેન કુત આગમનં કૃતમ્ ॥

કચ્ચિદ્ અસ્મિન્ મહામોહે ચિરં વિહરતસ્ તવ ।
અખણ્ડિતૈવ સમતા સ્થિતા ચેતસિ પાવને ॥

કિમર્થમ્ અદ્યાગમનક્લેશેનાત્મા કદર્થિતઃ ।
ત્વદ્વચશ્શ્રોતુકામાનામ્ આજ્ઞાં નો દાતુમ્ અર્હસિ ॥

ત્વત્પાદદર્શનાદ્ એવ સર્વં જ્ઞાતં મયા મુને ।
યથાગમનપુણ્યેન વયમ્ આયોજિતાસ્ ત્વયા ॥

ચિરજીવિતચર્ચાભિર્ વયં તે સ્મૃતિમ્ આગતાઃ ।
તેનેમં પાદપં પાદૈસ્ ત્વં પવિત્રિતવાન્ અયમ્ ॥

જ્ઞાતત્વદાગમો ઽપ્ય્ એવં ત્વાં પૃચ્છામીહ યન્ મુને ।
ભવદ્વાક્યામૃતાસ્વાદવાઞ્છા તત્ પ્રવિજૃમ્ભતે ॥

ઇત્ય્ ઉક્તવાન્ અસૌ પક્ષી ભુસુણ્ડશ્ ચિરજીવિતઃ ।
ત્રિકાલામલસંવેદી તત્ર પ્રોક્તમ્ ઇદં મયા ॥

વિહઙ્ગમમહારાજ સત્યમ્ એતત્ ત્વયોચ્યતે ।
દ્રષ્ટુમ્ અભ્યાગતો ઽસ્મ્ય્ અદ્ય ત્વામ્ એવ ચિરજીવિતમ્ ॥

આશીતલાન્તઃકરણો દિષ્ટ્યા કુશલવાન્ અસિ ।
પતિતો ઽસિ ન શુદ્ધાત્મન્ ભીષણાં ભવવાગુરામ્ ॥

તદ્ એતં સંશયં છિન્દ્ધિ ભગવન્ મમ તત્ત્વતઃ ।
કસ્મિન્ કુલે ભવાઞ્ જાતો જ્ઞાતજ્ઞેયઃ કથં ભવાન્ ॥

કિયદ્ આયુશ્ ચ તે સાધો વૃત્તં સ્મરસિ કિં ચ વા ।
કેન વાયં નિવાસસ્ તે નિર્દિષ્ટો દીર્ઘદર્શિના ॥

યત્ પૃચ્છસિ મુને સર્વં તદ્ ઇદં કથયામ્ય્ અહમ્ ।
અનુદ્વેગિતયેયં નઃ કથા શ્રવ્યા મહાત્મના ॥

યુષ્મદ્વિધાસ્ ત્રિભુવનપ્રભુપૂજ્યરૂપા આકર્ણયન્તિ યદ્ ઉદારધિયો મહાન્તઃ ।
તેનાશુભં પ્રકથિતેન વિનાશમ્ એતિ મેઘસ્ય દેહવિભવેન યથાર્કતાપઃ ॥