મોક્ષોપાય · અધ્યાય 6.15

કુસુમાપૂર્ણકલ્પાભ્રકુન્તલે તસ્ય મૂર્ધનિ ।
કલ્પાગમ્ અહમ્ અદ્રાક્ષં શિખાચક્રમ્ ઇવ સ્થિતમ્ ॥

પુષ્પરેણ્વભ્રવલિતં રત્નસ્તબકદન્તુરમ્ ।
ઉત્સેધનિર્જિતાકાશં શૃઙ્ગે શૃઙ્ગમ્ ઇવાર્પિતમ્ ॥

તારાદ્વિગુણપુષ્પૌઘં મેઘદ્વિગુણપલ્લવમ્ ।
રશ્મિદ્વિગુણરેણ્વભ્રં તડિદ્દ્વિગુણપિઞ્જરમ્ ॥

સ્કન્ધેષુ કિન્નરીગીતદ્વિગુણભ્રમરીસ્વનમ્ ।
દોલાલોલાપ્સરોલોકદ્વિગુણીકૃતસલ્લતમ્ ॥

સિદ્ધગન્ધર્વસઙ્ઘાતદ્વિગુણાગ્ર્યવિહઙ્ગમમ્ ।
રત્નકાન્ત્યચ્છનીહારદ્વિગુણત્વગ્વૃતાંશુકમ્ ॥

ચન્દ્રબિમ્બસમાશ્લેષદ્વિગુણાગ્ર્યબૃહત્ફલમ્ ।
મૂકસંલીનકલ્પાભ્રદ્વિગુણીકૃતપર્વકમ્ ॥

સુરસંવલિતસ્કન્ધં પત્ત્રવિશ્રાન્તકિન્નરમ્ ।
નિકુઞ્જકૂજજ્જીમૂતં કચ્છસુપ્તસુરાર્ભકમ્ ॥

સ્વાકારવિપુલાન્ ભૃઙ્ગાન્ ઉત્સાર્ય વલયસ્વનૈઃ ।
અપ્સરોભ્રમરીભિશ્ ચ ગૃહીતકુસુમાન્તરમ્ ॥

સુરકિન્નરગન્ધર્વવિદ્યાધરવરાન્વિતમ્ ।
જગદ્વાર્ક્ષીમ્ ઇવ ગતં દશામ્ આકાશપૂરણીમ્ ॥

નીરન્ધ્રકલિકાજાલં નીરન્ધ્રમૃદુપલ્લવમ્ ।
નીરન્ધ્રવિકસત્પુષ્પં નીરન્ધ્રફલમાલિતમ્ ॥

નીરન્ધ્રમઞ્જરીપુઞ્જં નીરન્ધ્રમણિગુચ્છકમ્ ।
નીરન્ધ્રાંશુકરત્નાઢ્યં લતાવિકસનાકુલમ્ ॥

સર્વર્તુકુસુમાપૂરૈસ્ સર્વર્તુફલપલ્લવૈઃ ।
સર્વામોદરજઃપુઞ્જૈઃ પરં વૈચિત્ર્યમ્ આગતમ્ ॥

તસ્ય કચ્છેષુ કુઞ્જેષુ લતાપત્ત્રેષુ પર્વસુ ।
પુષ્પેષ્વ્ આલયસંલીનાન્ વિહગાન્ દૃષ્ટવાન્ અહમ્ ॥

નિશાનાથકલાખણ્ડમૃણાલશકલૈધિતાન્ ।
અજનાભ્યબ્જિનીકન્દભોજનાન્ બ્રહ્મસારસાન્ ॥

વિરિઞ્ચરથહંસાનાં પોતકાન્ સામગાયિનઃ ।
ઓંકારવેદસુહૃદો બ્રાહ્મપદ્મબિસાશિનઃ ॥

ઉદ્ગીર્ણમન્ત્રનિચયાન્ સ્વાહાકારનિજસ્વનાન્ ।
સુસ્થિરૈકતડિત્પુઞ્જનીલમેઘસમોપમાન્ ॥

દેવાન્ ઇવાજ્યપાન્ નિત્યં યજ્ઞવેદીલતાદલાન્ ।
શુકાન્ કાર્શાનવાઞ્ શ્યામાઞ્ શિશૂઞ્ શિખિશિખાશિખાન્ ॥

ગૌરીરક્ષિતબર્હૌઘાન્ કૌમારાન્ વરબર્હિણઃ ।
સ્કન્દોપન્યસ્તનિશ્શેષશૈવવિજ્ઞાનકોવિદાન્ ॥

વ્યોમ્ન્ય્ એવ જાતનષ્ટાનાં મહતાં વ્યોમપક્ષિણામ્ ।
બન્ધૂન્ આબદ્ધનિલયાઞ્ શરદભ્રસમાકૃતીન્ ॥

વિરિઞ્ચહંસજાન્ અન્યાન્ અન્યાન્ અગ્નિશુકોદ્ભવાન્ ।
કૌમારબર્હિજાન્ અન્યાન્ અન્યાન્ અમ્બરપક્ષિજાન્ ॥

દ્વિતુણ્ડાંશ્ ચાથ ભારુણ્ડાન્ હેમચૂડાન્ વિહઙ્ગમાન્ ।
કલવિઙ્કાન્ બકાન્ ગૃધ્રાન્ કોકિલાન્ ક્રૌઞ્ચકુક્કુટાન્ ॥

ભાસચાષબલાકાદીન્ બહૂન્ અન્યાંશ્ ચ રાઘવ ।
ભૂતૌઘાઞ્ જગતીવાહં દૃષ્ટવાંસ્ તત્ર પક્ષિણઃ ॥

દક્ષિણસ્કન્ધશાખાયાં સ્થિતાયાં ખે દવીયસિ ।
અથાહં દૃષ્ટવાન્ પુષ્ટપત્ત્રાયામ્ અમ્બરસ્થિતઃ ॥

કાલકાકોલવલયં મઞ્જરીજાલમાલિતમ્ ।
લોકાલોકાચલારણ્યે કલ્પાભ્રૌઘમ્ ઇવ સ્થિતમ્ ॥

તત્ર પશ્યામ્ય્ અહં યાવદ્ એકત્ર સ્કન્ધકોટરે ।
વિચિત્રકુસુમાસ્તીર્ણે વિવિધામોદશાલિનિ ॥

શક્રાનિલયમાર્કેન્દુગૃહબલ્યુપજીવિનઃ ।
પુણ્યકૃદ્યોષિતાં સ્વર્ગે પ્રિયસૂચકવાશિતાઃ ॥

અપરિક્ષુભિતાકારાસ્ સભાયાં વાયસાસ્ સ્થિતાઃ ।
વિભેદ્યમેઘા વાતેન સમેનેવ પ્રસારિતાઃ ॥

તેષાં મધ્યે સ્થિતશ્ શ્રીમાન્ ભુસુણ્ડઃ પ્રોન્નતાકૃતિઃ ।
મધ્યે સત્કાચખણ્ડાનામ્ ઇન્દ્રનીલ ઇવોન્નતઃ ॥

પરિપૂર્ણમના માની સમસ્ સર્વાઙ્ગસુન્દરઃ ।
પ્રાણસ્પન્દાવધાનેન નિત્યમ્ અન્તર્મુખસ્ સુખી ॥

ચિરજીવીતિ વિખ્યાતશ્ ચિરજીવિતયા તયા ।
જગદ્વિદિતદીર્ઘાયુસ્ સ ભુસુણ્ડ ઇતિ શ્રુતઃ ॥

યુગાગમાપાયદશાદર્શનપ્રૌઢમાનસઃ ।
પ્રતિકલ્પં ચ ગણયન્ ખિન્નશ્ શક્રપરમ્પરામ્ ॥

જન્મનાં લોકપાલાનાં શૌરિશક્રગરુત્મતામ્ ।
સંસ્મર્તા સમતીતાનાં સુરાસુરમહીભૃતામ્ ॥

પ્રસન્નગમ્ભીરમનાઃ પેશલસ્નિગ્ધમુગ્ધવાક્ ।
અવક્રવક્તા જ્ઞાતા ચ નિર્મમો નિરહઙ્કૃતિઃ ॥

સુહૃદ્ દાન્તસ્ તથા મિત્રં ભૃત્યઃ પુત્રો ગુરુઃ પ્રભુઃ ।
સર્વદા સર્વથા નિત્યં સર્વં સર્વસ્ય સંસ્તવે ॥

સોમ્યઃ પ્રસન્નમધુરો રસવાન્ મહાત્મા હૃદ્યસ્ સરોવર ઇવાન્તર્ અખણ્ડશૈત્યઃ ।
હૃત્પુણ્ડરીકકુહરવ્યવહારવેત્તા ગામ્ભીર્યમ્ અચ્છમ્ અજહત્ પ્રકટાશયશ્રીઃ ॥