મોક્ષોપાય · અધ્યાય 6.156

અહન્તાદેહતાદ્યર્થશ્ ચિરમ્ એવ લયં ગતઃ ।
જીવન્મુક્તસ્ય તેનાસૌ જ્ઞો ઽપિ વ્યોમ્નૈકતાં ગતઃ ॥

અગમ્યા વચસાં સા તુ સા સીમા ભવભૂમિષુ ।
સંસારસરસḫ પારમ્ અપારસ્યેહ સા પરમ્ ॥

કૈશ્ચિત્ સા શિવ ઇત્ય્ ઉક્તા કૈશ્ચિદ્ બ્રહ્મેત્ય્ ઉદાહૃતા ।
કૈશ્ચિજ્ જ્ઞપ્તિર્ ઇતિ પ્રોક્તા કૈશ્ચિચ્ છૂન્યમ્ ઇતિ સ્મૃતા ॥

અર્થ ઇત્ય્ ઊહિતા કૈશ્ચિત્ કૈશ્ચિત્ કાલ ઇતિ શ્રિતા ।
કૈશ્ચિત્ પ્રકૃતિપુંભાવવિભાગ ઇતિ ભાવિતા ॥

અન્યૈર્ અપ્ય્ અન્યથા નાનાભેદૈર્ આત્મવિકલ્પિતૈઃ ।
નિત્યમ્ અવ્યપદેશ્યાપિ કિલાન્યૈવોપદિશ્યતે ॥

વિદેહમુક્તૈર્ એવૈષા વિદેહૈકાન્તમુક્તતા ।
બુધ્યતે તાદૃશૈર્ એવ સમનસ્કૈસ્ તુ નેતરૈઃ ॥

ન સત્ત્વસ્થૈર્ ન ચિત્તસ્થૈẖ કૈશ્ચિદ્ એવાવગમ્યતે ।
વિદેહમુક્તત્વમ્ ઋતે વિદેહા મુક્તતેતિ હિ ॥

અસંસક્તધિયો યે હિ જ્ઞત્વાત્ પ્રક્ષીણવાસનાઃ ।
તૃતીયાં ભૂમિકાં પ્રાપ્તાસ્ તેષાં ચિત્તં ન વિદ્યતે ॥

અજ્ઞત્વે ઘનભાવત્વં ચિત્તમ્ આહુર્ મનીષિણઃ ।
પુનર્જન્માન્તરકરં કારણં ભવભૂરુહામ્ ॥

જ્ઞત્વાત્ ક્ષીણરસં ચિત્તમ્ અજન્મમયવાસનમ્ ।
સત્ત્વમ્ ઇત્ય્ ઉચ્યતે તજ્જ્ઞૈસ્ તત્સ્થાસ્ સત્ત્વપદે સ્થિતાઃ ॥

સત્ત્વસ્થા જ્ઞાનદહનૈર્ દગ્ધવાસનતાં ગતાઃ ।
જીવાẖ ક્ષીણાḫ પ્રયચ્છન્તિ ન સંસારાઙ્કુરં પુનઃ ॥

ચિત્તસ્થૈર્ અથ સત્ત્વસ્થૈર્ એતૈર્ યા નાવબુધ્યતે ।
સપ્તમીભૂમિકા સૈષા વિદેહા મુક્તતોચ્યતે ॥

એતાસ્ તા ભૂમિકાḫ પ્રોક્તા મયા તવ રઘૂદ્વહ ।
આસામ્ અભ્યાસયોગેન ન દુẖખમ્ અનુભૂયતે ॥

એતાસુ ભૂમિષુ પદં કુરુ કારણજ્ઞ કાર્યાન્તરાણ્ય્ અવિકલાનિ નિજાનિ કુર્વન્ ।
જીવન્ વિમુક્ત ઇહ તિષ્ઠ ચિરં તતો ઽન્તે ભૂત્વા વિદેહ ઉદિતં પદમ્ એકમ્ આસ્સ્વ ॥