મોક્ષોપાય · અધ્યાય 6.143

યોગભૂમિકયોત્ક્રાન્તજીવિતસ્ય શરીરિણઃ ।
ભૂમિકાંશાનુસારેણ ક્ષીયતે પૂર્વદુષ્કૃતમ્ ॥

પુરાભૂવમ્ અહં જન્તુર્ મૃતો ઽહં તત્ર બન્ધુષુ ।
ચિરેણેહાહમ્ ઉત્પન્ન ઇતિ પશ્યત્ય્ અસૌ તતઃ ॥

એવં ભાવનયોચ્છૂનં જાતં પશ્યતિ દેહકમ્ ।
સર્વાવયવસમ્પન્નં પઙ્કાદ્ ઇવ વિનિર્મિતમ્ ॥

શરીરમ્ અભિસમ્પન્નં પશ્યન્ પ્રોચ્છૂનવાસનમ્ ।
પરલોકમ્ અથ સ્ફારં ચિનોત્ય્ આશુ ચ પશ્યતિ ॥

તતẖ કતિપયં કાલં શેષં દુષ્કૃતકર્મણામ્ ।
ભુક્ત્વા સુકૃતભોગાય યાતિ પુણ્યવતાં પદમ્ ॥

તત્રોપરિ વિમાનેષુ લોકપાલપુરેષુ ચ ।
મેરૂપવનકુઞ્જેષુ રમતે રમણીસખઃ ॥

મન્દારદલદોલાસુ પુન્નાગગહનેષુ ચ ।
પારિજાતવનાગ્રેષુ રમતે રમણીસખઃ ॥

સન્તાનકવિતાનેષુ પારિભદ્રદ્રુમેષુ ચ ।
કલ્પપાદપકુઞ્જેષુ રમતે રમણીસખઃ ॥

યોગભૂમિગતા યે યે મ્રિયન્તે પુરુષોત્તમાઃ ।
તે ક્ષીણદુષ્કૃતા મત્તા રમન્તે સુરસદ્મસુ ॥

સ્વાસ્તીર્ણકલ્પતરુપલ્લવસંસ્તરેષુ પુષ્પાવનદ્ધમૃદુહેમલતાલયેષુ ।
સમ્યક્ક્રિયાસ્ સુરપુરેષુ સહાપ્સરોભિર્ વિદ્યાધરાસ્ સુરતસારસુખં રમન્તે ॥