મોક્ષોપાય · અધ્યાય 6.129

આત્મારામો વીતશોકો નિત્યમ્ અન્તર્મુખસ્ સુખી ।
કુર્વન્ન્ અપિ ચ કર્માણિ તિષ્ઠત્ય્ અપગતભ્રમમ્ ॥

અન્તશ્શીતલયા નિત્યમ્ અનાકુલતયા તથા ।
સોમ્યરૂપતયા પૂર્ણશ્ શશાઙ્ક ઇવ શોભતે ॥

સમશ્ શાન્તમના મૌની ક્ષીણવાદવિચારણઃ ।
કચત્ય્ આત્મનિ ચિત્તત્ત્વે દગ્ધેન્ધન ઇવાનલઃ ॥

યેન કેનચિદ્ આચ્છન્નો યેન કેનચિદ્ આશિતઃ ।
યત્ર ક્વચન શાયી ચ સમ્રાડ્ ઇવ વિરાજતે ॥

વર્ણધર્માશ્રમાચારશાસ્ત્રમન્ત્રામયોજ્ઝિતઃ ।
નિર્ગચ્છતિ જગજ્જાલાત્ પઞ્જરાદ્ ઇવ કેસરી ॥

વાચામ્ અતીતવિષયાં વિષયાશાદશોજ્ઝિતામ્ ।
કામ્ અપ્ય્ ઉપગતશ્ શોભાં શરદીવ નભસ્તલમ્ ॥

ગમ્ભીરશ્ ચ પ્રસન્નશ્ ચ ગિરાવ્ ઇવ મહાહ્રદઃ ।
પરાનન્દરસક્ષીવો રમતે સ્વાત્મનાત્મનિ ॥

યથાભિમતવિસ્તારો યથાભિમતકર્મકૃત્ ।
પરમાં નિર્વૃતિં યાતિ મુક્તશાસ્ત્રાર્થયન્ત્રણઃ ॥

સર્વકર્મફલત્યાગી નિત્યતૃપ્તો નિરાશ્રયઃ ।
ન પુણ્યેન ન પાપેન નેતરેણાપિ લિપ્યતે ॥

સ્ફટિકḫ પ્રતિબિમ્બેન યથા નાયાતિ રઞ્જનામ્ ।
તજ્જ્ઞẖ કર્મફલેનાન્તસ્ તથા નાયાતિ રઞ્જનામ્ ॥

હસન્ રુદન્ન્ અપિ ભૃશં દેહપૂજાવિકર્તનૈઃ ।
દાહાહ્લાદૌ ન જાનાતિ પ્રતિબિમ્બગતાવ્ ઇવ ॥

નિસ્સ્તોત્રો નિર્વષટ્કારḫ પૂજ્યપૂજાવિવર્જિતઃ ।
સંયુક્તશ્ ચ વિયુક્તશ્ ચ સર્વાચારનયક્રમૈઃ ॥

તસ્માન્ નોદ્વિજતે લોકો લોકાન્ નોદ્વિજતે ચ સઃ ।
હર્ષામર્ષભયક્રોધૈર્ મુક્તો યુક્તશ્ ચ દૃશ્યતે ॥

રાગદ્વેષોદયારમ્ભૈસ્ ત્યજ્યતે ઽપિ ચ યુજ્યતે ।
ઈહાનીહાવિલાસેન નાપ્યતે ઽથ ચ ભુજ્યતે ॥

પ્રમેયે કસ્યચિદ્ અપિ નારોહતિ મહાશયઃ ।
પ્રમેયીક્રિયતે વાપિ બાલેનાપ્ય્ અદુરાશયઃ ॥

વિધૂયાનન્તનાનાત્વં યẖ કિલૈકતયોદિતઃ ।
તમ્ અનાદ્યન્તસંવિત્તિં કો વા તુલયિતું ક્ષમઃ ॥

તનું ત્યજતિ તીર્થે વા શ્વપચસ્ય ગૃહે ઽપિ વા ।
મા કદાચન વા રાજન્ વર્તમાને ઽપિ વા ક્ષણે ॥

જ્ઞાનસમ્પ્રાપ્તિસમયે મુક્તો ઽસૌ વિગતામયઃ ।
વીતશોકજરાયાસો યત્ કરોતિ કરોતુ તત્ ॥

અહમ્ભ્રાન્તિર્ હિ બન્ધાય મોક્ષો જાતે હિ તત્ક્ષયે ।
યથા ભવતિ દેહો ઽયં તથા ભવતુ કા ક્ષતિઃ ॥

યત્ કરોતિ યદ્ આદત્તે યત્રોપવિશતિ ક્ષણમ્ ।
યત્ પશ્યતિ સ્પૃશતિ યત્ તસ્મૈ સ્પૃહયતિ પ્રજા ॥

સ પૂજનીયસ્ સ સ્તુત્યો નમસ્કાર્યસ્ સ યત્નતઃ ।
સ મહાત્માભિવાદ્યશ્ ચ વિભૂત્યૈ વિભવૈષિણા ॥

ન યજ્ઞતીર્થૈર્ ન તપḫપ્રદાનૈર્ આસાદ્યતે તત્ પરમં પવિત્રમ્ ।
આસાદ્યતે ક્ષીણભવામયાનાં ભક્ત્યા સતામ્ આત્મવિદાં યદ્ અઙ્ગ ॥