મોક્ષોપાય · અધ્યાય 6.114

તતસ્ સમુદિતે સૂર્યે વિતમસ્ય્ અમ્બરે સ્થિતે ।
સમુદ્ગકાદ્ ઇવ જગન્મણાવ્ અસ્મિન્ વિનિર્ગતે ॥

વિકસત્ય્ અરુણોપાન્તે ચક્ષુષીવામ્બુજાકરે ।
આચારેષ્વ્ ઇવ લોકેષુ પ્રસૃતેષ્વ્ અર્કરશ્મિષુ ॥

દમ્પતી તૌ સમુત્થાય કૃતસન્ધ્યાક્રમૌ સ્થિતૌ ।
પત્ત્રાસને મૃદુસ્નિગ્ધે કાન્તૌ કાઞ્ચનકન્દરે ॥

અથોત્થાયાત્ર ચૂડાલા રત્નકુમ્ભં કરસ્થિતમ્ ।
.. .. .. .. .. .. .. .. .. .. .. .. .. .. .. .. ॥

.. .. .. .. .. .. .. .. .. .. .. .. .. .. .. .. ।
ભાર્યા ભર્તારમ્ એકાન્તે સ્વરાજ્યે ઽભિષિષેચ સા ॥

સઙ્કલ્પોપનતે સૈંહે સ્વભિષિક્તં સુવિષ્ટરે ।
સ્થિતં પ્રોવાચ તન્વી સા ચૂડાલા દેવરૂપિણી ॥

કેવલં મૌનમ્ ઉત્સૃજ્ય તેજશ્ શાન્તમ્ ઇદં પ્રભો ।
અષ્ટાનાં લોકપાલાનાં તેજાંસ્ય્ આહર્તુમ્ અર્હસિ ॥

ચૂડાલયેતિ સ પ્રોક્તો વને રાજા શિખિધ્વજઃ ।
વદન્ન્ એવં કરોમીતિ મહારાજત્વમ્ આયયૌ ॥

અથ પ્રતીહારપદે તિષ્ઠન્તીમ્ આહ માનિનીમ્ ।
મહાદેવીપદે રાજ્ઞિ ત્વાં કરોમ્ય્ અભિષેકિનીમ્ ॥

ઇત્ય્ ઉક્ત્વાસન આસ્થાપ્ય મહાદેવીપદે તદા ।
અભિષિક્તાં નૃપઃ કૃત્વા મેઘવાગ્ આહ તાં પ્રિયામ્ ॥

પ્રિયે કમલપત્ત્રાક્ષિ ક્ષણાત્ સઙ્કલ્પસમ્ભવમ્ ।
મહાવિભવમ્ ઉદ્દામં સૈન્યમ્ આહર્તુમ્ અર્હસિ ॥

ઇતિ કાન્તવચશ્ શ્રુત્વા ચૂડાલા વરવર્ણિની ।
સૈન્યં સઙ્કલ્પયામ્ આસ પ્રાવૃડ્ઘનમ્ ઇવોદ્ભટમ્ ॥

સૈન્યં દદૃશતુસ્ તત્ તૌ વાજિવારણસઙ્કુલમ્ ।
પતાકાપૂરિતાકાશનીરન્ધ્રીકૃતકાનનમ્ ॥

તૂર્યારવધ્વનચ્છૈલગુહં ગહનકોટરમ્ ।
મત્તસામન્તવલિતં વિદ્રવદ્વનવારણમ્ ॥

ઉદ્યન્નાદમહાસિંહવિદારકરણોદ્ભટમ્ ।
વનેભમદનિષ્ષ્યન્દગન્ધોદ્ગર્જજ્જયદ્વિપમ્ ॥

વિમાનરથસઙ્ઘટ્ટચક્રચીત્કારપીવરમ્ ।
મૌલિરત્નઘનોદ્દ્યોતભગ્નધૂલિતમઃપટમ્ ॥

તત્ર ગન્ધદ્વિપવરે કૃતપાર્થિવમન્દિરે ।
રક્ષિતે દૃપ્તસામન્તૈર્ આરૂઢૌ નૃપદમ્પતી ॥

તતશ્ શિખિધ્વજો રાજા મહિષ્યા સમમ્ ઇષ્ટયા ।
પદાતિરથસમ્બાધં કર્ષન્ન્ અતિબલો બલમ્ ॥

ચચાલાચલચાલિન્યા સેનયા રભસેનયા ।
ભિનન્ત્યા તરસા શૈલાન્ વાત્યયેવાશુ તોયદાન્ ॥

તસ્માન્ મહેન્દ્રશૈલેન્દ્રાચ્ ચલિતસ્ સ મહીપતિઃ ।
પથિ પશ્યન્ ગિરીન્ દેશાન્ નદીર્ ગ્રામાન્ સજઙ્ગલાન્ ॥

દર્શયંશ્ ચ પ્રિયાયાસ્ તમ્ આત્મવૃત્તાન્તસઞ્ચયમ્ ।
પ્રાપાલ્પેનૈવ કાલેન સ્વાં પુરીં સ્વર્ગશોભનામ્ ॥

તત્ર તે તસ્ય સામન્તાસ્ તદાગમનમ્ આદૃતાઃ ।
વિવિદુર્ જયશબ્દેન નિર્જગ્મુશ્ ચોદિતાશયાઃ ॥

એકતાં સમ્પ્રયાતેન તારતૂર્યનિનાદિના ।
બલદ્વયેન તેનાસૌ વિવેશ નગરં નૃપઃ ॥

લાજપુષ્પાઞ્જલિવ્રાતૈર્ આવૃષ્ટઃ પૌરયોષિતામ્ ।
વણિઙ્માર્ગગતો ઽપશ્યત્ પુરં પરમભૂષિતમ્ ॥

પતાકાધ્વજસમ્બાધં મુક્તાજાલમનોરમમ્ ।
નૃત્તગીતપરસ્ત્રીકં સ્વર્ગં ભૂમાવ્ ઇવ ચ્યુતમ્ ॥

પ્રવિશ્યાથ ગૃહં તૈસ્ તૈસ્ સંયુતં નૃપમઙ્ગલૈઃ ।
સમ્યક્ સમ્માનયામ્ આસ પ્રણતં પ્રકૃતિવ્રજમ્ ॥

પુરોત્સવં ભૃશં કૃત્વા દિનસપ્તકમ્ ઉત્તમમ્ ।
અકરોદ્ રાજકાર્યાણિ માનિતાન્તઃપુરો નૃપઃ ॥

દશવર્ષસહસ્રાણિ રાજ્યં કૃત્વા મહીતલે ।
સહ ચૂડાલયા રાજા વિરતો દેહધારણાત્ ॥

દેહમ્ ઉત્સૃજ્ય નિર્વાણમ્ અસ્નેહ ઇવ દીપકઃ ।
અપુનર્જન્મને રામ જગામેતિ મહામતિઃ ॥

દશવર્ષસહસ્રાણિ સમદૃષ્ટિતયા તયા ।
રાજ્યં તથાનુશિષ્યાસૌ નિર્વાણપદમ્ આપ્તવાન્ ॥

વિગતભયવિષાદો માનમાત્સર્યમુક્તઃ પ્રકૃતસહજકર્મા સક્તનીરાગબુદ્ધિઃ ।
ઇતિ સ સુસમદૃષ્ટિર્ મૃત્યુમ્ આર્યો ઽથ જિત્વા દશશિશિરસહસ્રાણ્ય્ એકરાજ્યં ચકાર ॥

ભુક્ત્વા ભોગાન્ અનન્તાન્ ભુવિ સકલમહી પાલચૂડામણિત્વે સ્થિત્વા વૈ દીર્ઘકાલં પરમ્ અમૃતપદં પ્રાપ્તવાંસ્ તદ્ યથૈષઃ ।
એવં રામાગતં ત્વં પ્રકૃતમ્ અનુસરન્ કાર્યજાતં વિશોકસ્ તિષ્ઠોત્તિષ્ઠ સ્વયત્નાત્ પ્રસભમ્ અનુભવન્ ભોગમોક્ષાગ્ર્યલક્ષ્મીમ્ ॥