મોક્ષોપાય · અધ્યાય 6.111

અથ સૂર્યાંશુરઙ્ગેણ રઞ્જિતે ભુવનોદરે ।
શિખિધ્વજાઙ્ગના ભૂયો મદની કુમ્ભતાં યયૌ ॥

એવં મહેન્દ્રદર્યાં તાવ્ ઉભૌ કુમ્ભશિખિધ્વજૌ ।
સ્વયં વિવાહિતાવ્ ઇષ્ટૌ સમ્પન્નૌ નવદમ્પતી ॥

વિલેસતુર્ વિચિત્રાસુ પ્રત્યહં વનરાજિષુ ।
પ્રપક્વફલભારાસુ પુષ્પપલ્લવિનીષુ ચ ॥

દિવા પ્રિયતરે મિત્રે યામિન્યામ્ ઇષ્ટદમ્પતી ।
પ્રભાદીપાવ્ ઇવ શ્લિષ્ટૌ ન વિયુક્તૌ બભૂવતુઃ ॥

રેમાતે વનકુઞ્જેષુ ગુહાસુ ચ મહીભૃતામ્ ।
તમાલસાલષણ્ડેષુ મન્દારગહનેષુ ચ ॥

સહ્યદર્દુરકૈલાસમહેન્દ્રમલયેષુ ચ ।
ગન્ધમાદનવિન્ધ્યાદ્રિલોકાલોકતટેષુ ચ ॥

દિનૈસ્ ત્રિભિસ્ ત્રિભિર્ ગત્વા નિદ્રાં ગતવતિ પ્રિયે ।
ચૂડાલા રાજકાર્યાણિ કૃત્વા સ્વાન્ય્ આયયૌ પુનઃ ॥

તૌ દિવા સુહૃદૌ રાત્રૌ દમ્પતી કુમ્ભભૂમિપૌ ।
નાનાકુસુમસંવીતૌ તસ્થતુર્ મુદિતૌ મિથઃ ॥

માસમ્ એકં મહેન્દ્રાદ્રિસાનૌ સરલસઙ્કુલે ।
રત્નકુડ્યે ગુહાગેહે પૂજિતૌ સુરકિન્નરૈઃ ॥

હસ્તલભ્યોદિતેન્દૌ ચ મન્દારવનમાલિતે ।
એવં શુક્તિમતઃ પૃષ્ઠે પક્ષં પક્ષં લતાગૃહે ॥

માસદ્વયમ્ ઋક્ષવતો ગિરેર્ દક્ષિણતસ્ તટે ।
પારિજાતવને દેવપુષ્પસ્તબકમણ્ડપે ॥

જમ્બૂષણ્ડતલે મેરોઃ પાદે જમ્બૂનદીતટે ।
જામ્બૂનદમયે માસં જમ્બૂફલરસાવનૌ ॥

દશોત્તરકુરૂણાં ચ મણ્ડલે દિવસાનિ તૌ ।
કૈલાસસ્યોત્તરસ્થેષુ સપ્તવિંશતિવાસરાન્ ॥

એવમ્ અન્યેષુ દેશેષુ વિચિત્રેષુ મહીભૃતામ્ ।
સ્થિતવન્તૌ મહાભાગૌ સુહૃદૌ સ્નિગ્ધદમ્પતી ॥

તતો યાતેષુ માસેષુ શનૈઃ કતિપયેષુ સા ।
ચૂડાલા ચિન્તયામ્ આસ દેવપુત્રકરૂપિણી ॥

સુરોપભોગભારેણ પરીક્ષે ઽહં શિખિધ્વજમ્ ।
મા કદાચન ચેતો ઽસ્ય ભોગેષુ રતિમ્ એષ્યતિ ॥

ઇતિ સઞ્ચિન્ત્ય ચૂડાલા માયયા સ્વામિનો વને ।
આગતં દર્શયામ્ આસ સસુરાપ્સરસં હરિમ્ ॥

ઇન્દ્રમ્ અભ્યાગતં દૃષ્ટ્વા પરિવારસમન્વિતમ્ ।
યથાવત્ પૂજયામ્ આસ વનસંસ્થશ્ શિખિધ્વજઃ ॥

આત્મનઃ કિં કૃતા દૂરાદ્ અભ્યાગમકદર્થના ।
દેવરાજ પ્રસાદાન્ મે યથાવદ્ વક્તુમ્ અર્હસિ ॥

ઇમે વયમ્ ઇહાનીતાસ્ ત્વદ્ગુણાતિશયેન ખાત્ ।
હૃદિ લગ્નેન સૂત્રેણ ખગા દૂરગતા ઇવ ॥

ઉત્તિષ્ઠ સ્વર્ગમ્ આગચ્છ તત્ર સર્વે ત્વદુન્મુખાઃ ।
ત્વદ્ગુણશ્રવણાશ્ચર્યાસ્ સ્થિતા દેવગણાઙ્ગનાઃ ॥

ઇમે રથા ઇદં યાનમ્ અયમ્ ઉચ્ચૈશ્શ્રવા હયઃ ।
અયમ્ ઐરાવણો નાગો યથાભિમતમ્ આશ્રય ॥

પાદુકાગુલિકાખડ્ગરસાદીદમ્ અથાપિ ચ ।
ગૃહીત્વા સિદ્ધમાર્ગેણ સ્વીકુરુ સ્વર્ગમણ્ડલમ્ ॥

આકલ્પં વૈબુધા ભોગાસ્ ત્વયા વિબુધસદ્મનિ ।
જીવન્મુક્તેન ભોક્તવ્યાસ્ તેન ત્વામ્ અહમ્ આગતઃ ॥

વિમાનયન્તિ સમ્પ્રાપ્તાં ન તિરસ્કરણૈશ્ શ્રિયમ્ ।
નાભિવાઞ્છન્તિ ચાપ્રાપ્તાં ત્વાદૃશાસ્ સાધુસાધવઃ ॥

અવિઘ્નમ્ આગતેનાદ્ય સુખં વિહરતા ત્વયા ।
સ્વર્ગઃ પવિત્રતાં યાતુ હરિણેવ જગત્ત્રયમ્ ॥

સ્વર્ગં સ્વર્ગસમાચારં વેદ્મિ દેવાદિનાયક ।
કિં તુ સર્વત્ર મે સ્વર્ગો નિયતો ન તુ કુત્રચિત્ ॥

સર્વત્રૈવ હિ તુષ્યામિ સર્વત્રૈવ રમે પ્રભો ।
અવાઞ્છનત્વાન્ મનસસ્ સર્વત્રાનન્દવાન્ અહમ્ ॥

નિયતં કિઞ્ચિદ્ એકત્ર સ્થિતં સ્વર્ગકમ્ ઈદૃશમ્ ।
શક્ર ગન્તું ન જાનામિ નાજ્ઞાતં ચ કરોમ્ય્ અહમ્ ॥

સાધો વિદિતવેદ્યાનાં પરિપૂર્ણધિયાં સતામ્ ।
સજ્જનાચરિતં યુક્તં મન્યે ભોગોપસેવનમ્ ॥

દેવેશે પ્રોક્તવત્ય્ એવં તૂષ્ણીમ્ એવ સ્થિતે નૃપે ।
કિમ્ એવં નોપયામ્ય્ એવ ત્વામ્ ઇતિ પ્રોક્તવાન્ હરિઃ ॥

બાઢમ્ ઇત્ય્ એવ કાલેન વદતીષચ્ છિખિધ્વજે ।
કલ્યાણં તે ઽસ્તુ કુમ્ભેતિ વદન્ન્ અન્તર્ધિમ્ આયયૌ ॥

તદ્ દેવવૃન્દમ્ અખિલં ત્રિદશેશયુક્તં તત્ર ક્ષણાદ્ અલમ્ અદૃશ્યમ્ અભૂદ્ વિલીનમ્ ।
કલ્લોલજાલમ્ ઇવ વારિનિધૌ પ્રશાન્તવાતે સ્ફુરન્મકરફેનફણીન્દ્રશબ્દમ્ ॥