મોક્ષોપાય · અધ્યાય 6.106

ઇતિ તે કથિતં સર્વં શિખિધ્વજ મહીપતે ।
યથેદમ્ ઉત્થિતં સર્વં યથા ચ પ્રવિલીયતે ॥

એતચ્ છ્રુત્વા ચ બુદ્ધ્વા ચ મત્વા ચ મુનિનાયક ।
યથેચ્છસિ તથા તિષ્ઠ દૃષ્ટસ્પષ્ટપદઃ પદે ॥

સ્વર્ગં ગચ્છામ્ય્ અહં તત્ર કાલે ઽસ્મિન્ નારદો મુનિઃ ।
બ્રહ્મલોકાત્ સમાયાતો ભવત્ય્ અમરસંસદમ્ ॥

ન માં પશ્યતિ ચેત્ તત્ર તત્ કોપમ્ ઉપગચ્છતિ ।
નોદ્વેજનીયા ભવ્યેન ગુરવો હિ કદાચન ॥

ત્યક્તસઙ્કલ્પલેખેન ન કિઞ્ચિદ્ અભિવાઞ્છતા ।
ત્વયાત્મન્ય્ એવ વસ્તવ્યં દૃષ્ટિર્ એષૈવ પાવની ॥

ઇતિ યાવત્ પ્રતિવચઃ પુષ્પહસ્તશ્ શિખિધ્વજઃ ।
પ્રણામાય દદાત્ય્ એષ તાવદ્ અન્તર્ધિમ્ આયયૌ ॥

પ્રતિભાસગતં વસ્તુ યથૈવાગ્રે ન દૃશ્યતે ।
ન દૃષ્ટવાંસ્ તથા કુમ્ભમ્ અગ્રે રાજા શિખિધ્વજઃ ॥

ગતે કુમ્ભે મહીપાલઃ પરં વિસ્મયમ્ આયયૌ ।
તદ્ એવ ચિન્તયંશ્ ચિત્રં ચિત્રાર્પિત ઇવાભવત્ ॥

ઇતિ સઞ્ચિન્તયામ્ આસ ચિત્રં વિલસિતં વિધેઃ ।
યત્ કુમ્ભવ્યપદેશેન બોધિતો ઽસ્મિ ચિરાદ્ અયમ્ ॥

ક્વ નારદસુતઃ કુમ્ભઃ ક્વાહં નામ શિખિધ્વજઃ ।
કેવલં કાલયુક્ત્યૈવમ્ અહં સમ્પ્રતિબોધિતઃ ॥

અહો નુ સમ્યક્ કથિતં દેવપુત્રેણ યુક્તિમત્ ।
અહો નુ સમ્પ્રબુદ્ધો ઽસ્મિ મોહનિદ્રાકુલશ્ ચિરાત્ ॥

ક્વાહમ્ આસં વિનિર્મગ્નઃ ક્રિયાજાલકુકર્દમે ।
ઇદં કાર્યમ્ ઇદં નેતિ મિથ્યાવિભ્રમમ્ આચરન્ ॥

અહો નુ શીતલા શુદ્ધા શાન્તેયં પદવી નિજા ।
રસાયનદ્રવાકારા સત્ત્વં શીતયતીવ મે ॥

શામ્યામિ પરિનિર્વામિ સુખમ્ આસે ચ કેવલમ્ ।
ચિન્માત્રમ્ અપિ નેચ્છામિ સંસ્થિતો ઽસ્મિ યથાસ્થિતમ્ ॥

એવં સઞ્ચિન્તયન્ રાજા એવંનિર્વાસનાશયઃ ।
શૈલાદ્ ઇવ સમુત્કીર્ણો મૌનમ્ એવાથ તસ્થિવાન્ ॥

તસ્મિન્ન્ એવ તતો મૌની નિસ્સઙ્કલ્પે નિરામયે ।
પ્રતિષ્ઠાં નિશ્ચલાં પ્રાપ્ય સ તસ્થૌ ગિરિશૃઙ્ગવત્ ॥

સ તત્ર સંશાન્તભયો મહાત્મા ચિરેણ વિશ્રાન્તિમ્ ઇતસ્ સમાત્મા ।
ચિરેણ સમ્પ્રાપ્તનિજામલાત્મા યોગેન સુષ્વાપ તદા ચિદાત્મા ॥