મોક્ષોપાય · અધ્યાય 5.88

એવં કલિતવાન્ અન્તઃ પ્રશાન્તમનનૈષણઃ ।
શનૈર્ ઉચ્ચારયંશ્ ચારુ પ્રણવપ્રાપ્તિભૂમિકઃ ॥

સબાહ્યાભ્યન્તરાન્ સર્વાન્ સૂક્ષ્માન્ સ્થૂલતરાન્ અપિ ।
ત્રૈલોક્યકલ્પિતાંસ્ ત્યક્ત્વા સઙ્કલ્પાન્ કલ્પકલ્પિતાન્ ॥

તિષ્ઠન્ન્ અક્ષુભિતાકારશ્ ચિન્તામણિર્ ઇવાત્મનિ ।
સમ્પૂર્ણ ઇવ શીતાંશુર્ વિશ્રાન્ત ઇવ મન્દરઃ ॥

કુમ્ભકારગૃહે ચક્રં સંરોધિતમ્ ઇવ ભ્રમાત્ ।
અમ્ભોધિર્ ઇવ સમ્પૂર્ણસ્ સ્તિમિતસ્ફારનિર્મલઃ ॥

શાન્તતેજસ્તમઃપુઞ્જં વિગતાર્કેન્દુતારકમ્ ।
અધૂમાભ્રરજસ્ સ્વચ્છમ્ અનન્તં શરદીવ ખમ્ ॥

સહ પ્રણવપર્યન્તદીર્ઘનિસ્સ્વનતન્તુના ।
જહાવ્ ઇન્દ્રિયતન્માત્રજાલં ગન્ધમ્ ઇવાનિલઃ ॥

તતો જહૌ તમોમાત્રં પ્રતિભાતમ્ ઇવાન્તરે ।
ઉત્તિષ્ઠત્ પ્રસ્ફુરદ્રૂપં પ્રાજ્ઞઃ કોપલવં યથા ॥

પ્રતિભાતં તતસ્ તેજો નિમેષાર્ધં વિચાર્ય સઃ ।
જહૌ બભૂવ ચ તદા ન તમો ન પ્રકાશકમ્ ॥

તામ્ અવસ્થામ્ અથાસાદ્ય મનસા તન્ મનસ્તૃણમ્ ।
સ્ફુરિતં ન મનાગ્ એવ નિમેષાર્ધાદ્ અશાતયત્ ॥

તતો ઽઙ્ગસંવિદં સ્વસ્થાં પ્રતિભાસમ્ ઉપાગતામ્ ।
સદ્યોજાતશિશુજ્ઞાનસમામ્ અકલનામલામ્ ॥

નિમેશાર્ધાર્ધભાગેન કાલેનાકલનઃ પ્રભુઃ ।
જહૌ ચિતશ્ ચેત્યદશાં સ્પન્દશક્તિમ્ ઇવાનિલઃ ॥

પશ્યન્તીપદમ્ આસાદ્ય સત્તામાત્રાત્મકં તતઃ ।
સુષુપ્તપદમ્ આસાદ્ય તસ્થૌ મેરુર્ ઇવાચલઃ ॥

તતસ્ સુષુપ્તસંસ્થાનસ્થિત્યા સ્થિત્વા વિભુર્ મનાક્ ।
સુષુપ્તે સ્થૈર્યમ્ આસાદ્ય તુર્યરૂપમ્ ઉપાયયૌ ॥

નિરાનન્દો ઽપિ સાનન્દસ્ સચ્ ચાસચ્ ચાપિ તત્ર સઃ ।
આસીન્ નકિઞ્ચિત્ કિઞ્ચિચ્ ચ પ્રકાશસ્ તિમિરં તથા ॥

અચિન્મયં ચિન્મયં ચ નેતિ નેતિ યદ્ ઉચ્યતે ।
તત્ તતસ્ સમ્બભૂવાસૌ મદ્ગિરામ્ અપ્ય્ અગોચરઃ ॥

તદ્ અસૌ સુષમં સ્થાનં પદં પરમપાવનમ્ ।
સર્વભાવાન્તરગતમ્ અભૂત્ સર્વવિવર્જિતમ્ ॥

યચ્ છૂન્યવાદિનાં શૂન્યં બ્રહ્મ બ્રહ્મવિદાં વરમ્ ।
વિજ્ઞાનમાત્રં વિજ્ઞાનવિદાં યદ્ અમલાત્મકમ્ ॥

પુરુષસ્ સાઙ્ખ્યદૃષ્ટીનામ્ ઈશ્વરો યોગવાદિનામ્ ।
શિવશ્ શશિકલઙ્કાનાં કાલઃ કાલકવાદિનામ્ ॥

આત્માત્મનસ્ તદ્વિદુષાં નૈરાશ્યં તાદૃશાત્મનામ્ ।
મધ્યં માધ્યમિકાનાં ચ સર્વં સુશમચેતસામ્ ॥

યત્ સર્વશાસ્ત્રસિદ્ધાન્તો યત્ સર્વહૃદયાનુગમ્ ।
યત્ સર્વં સર્વદા સાર્વં યત્ સત્ તત્ સદ્ અસૌ સ્થિતઃ ॥

યદ્ અનુત્તમનિષ્ષ્યન્દો દીપં યત્ તેજસામ્ અપિ ।
સ્વાનુભૂત્યેકમાનં યત્ તત્ તત્ તત્ તદ્ અસૌ સ્થિતઃ ॥

યદ્ એકં ચાપ્ય્ અનેકં ચ સાઞ્જનં ચ નિરઞ્જનમ્ ।
યત્ સર્વં ચાપ્ય્ અસર્વં ચ તત્ તત્ તત્ તદ્ અસૌ સ્થિતઃ ॥

અજમ્ અજરમ્ અનાદ્યમ્ આદ્યમ્ એકં પદમ્ અકલં સકલં ચ નિષ્કલં ચ ।
સ્થિત ઇતિ સ તદા નભસ્સ્વરૂપાદ્ અપિ વિમલસ્થિતિર્ ઈશ્વરઃ ક્ષણેન ॥