મોક્ષોપાય · અધ્યાય 5.69

સર્વદા સર્વસંસ્થેન સર્વેણ સહ તિષ્ઠતા ।
સર્વકર્મરતેનાપિ મનઃ કાર્યં વિજાનતા ॥

ન સક્તમ્ ઇહ ચિન્તાસુ ન ચેષ્ટાસુ ન વસ્તુષુ ।
નાકાશે નાપ્ય્ અધોભાગે ન દિક્ષુ ન લતાસુ ચ ॥

ન બહિર્ વિપુલાભોગે ન ચૈવેન્દ્રિયવૃત્તિષુ ।
નાભ્યન્તરે ન ચ પ્રાણે ન મૂર્ધનિ ન તાલુનિ ॥

ન ભ્રૂમધ્યે ન નાસાન્તે ન મુખે ન ખતારકે ।
નાન્ધકારે ન ચાભાસે ન ચાસ્મિન્ હૃદયામ્બરે ॥

ન જાગ્રતિ ન ચ સ્વપ્ને ન સુષુપ્તે ન નિર્મલે ।
નાસિતે ન ચ વા પીતે રક્તાદૌ શબલે ઽપિ ચ ॥

ન સ્થિરે ન ચલે નાદૌ ન મધ્યે નેતરત્ર ચ ।
ન દૂરે નાન્તિકે નાઙ્ગે ન પદાર્થે ન ચાત્મનિ ॥

ન શબ્દસ્પર્શરૂપેષુ ન મોહાનન્દવૃત્તિષુ ।
ન ગમાગમચેષ્ટાસુ ન કાલકલનાસુ ચ ॥

કેવલં ચિતિ વિશ્રમ્ય કિઞ્ચિચ્ ચેત્યાવલમ્બતઃ ।
સર્વત્ર નીરસમ્ ઇવ તિષ્ઠત્વ્ આત્મરસં મનઃ ॥

તત્રસ્થો વિગતાસઙ્ગો જીવો ઽજીવત્વમ્ આગતઃ ।
વ્યવહારમ્ ઇમં સર્વં મા કરોતુ કરોતુ વા ॥

અકુર્વન્ વાપિ કુર્વન્ વા જીવસ્ સ્વાત્મરતિક્રિયામ્ ।
ક્રિયાફલૈર્ ન સમ્બન્ધમ્ આયાતિ ખમ્ ઇવામ્બુદૈઃ ॥

અથ વા તમ્ અપિ ત્યક્ત્વા ચેત્યાંશં શાન્તચિદ્ઘનઃ ।
જીવસ્ તિષ્ઠતુ સંશાન્તં જ્વલન્ મણિર્ ઇવાત્મનિ ॥

નિર્વાણમ્ આત્મનિ ગતસ્ સતતોદિતાત્મા જીવો ભુવિ વ્યવહરન્ન્ અપિ રામભદ્ર ।
નાસઙ્ગમ્ એતિ ગતસઙ્ગતયા ફલેન કર્મોદ્ભવેન હસતીવ ચ દેહમ્ આરાત્ ॥