મોક્ષોપાય · અધ્યાય 5.63

રાજન્ નૂનં પ્રબુદ્ધો ઽસિ પ્રાપ્તવાન્ અસિ તત્ પદમ્ ।
સંશીતલાન્તઃકરણઃ પૂર્ણેન્દુર્ ઇવ રાજસે ॥

આનન્દમધુસમ્પૂર્ણો લક્ષ્મ્યા ચ પરયા શ્રિતઃ ।
શીતલસ્નિગ્ધમધુરો રાજીવમ્ ઇવ રાજસે ॥

નિર્મલો વિતતઃ પૂર્ણો ગમ્ભીરઃ પ્રકટાશયઃ ।
વેલાનિલબલોલ્લાસમુક્તો ઽબ્ધિર્ ઇવ રાજસે ॥

સ્વચ્છસ્ સ્વાનન્દસમ્પૂર્ણો ગતાહઙ્કારવારિદઃ ।
સ્ફુટં વિસ્તીર્ણગમ્ભીરશ્ શરત્ખમ્ ઇવ રાજસે ॥

સર્વત્ર લક્ષ્યસે સ્વસ્થસ્ સર્વત્ર પરિતુષ્યસિ ।
સર્વત્ર વીતરાગો ઽસિ રાજન્ સર્વત્ર રાજસે ॥

સારાસારપરિચ્છેદપારગસ્ ત્વં મહાધિયા ।
જાનાસિ સર્વમ્ એવેદં યથાસ્થિતમ્ અખણ્ડિતમ્ ॥

ભાવાભાવપરિચ્છેદતત્ત્વજ્ઞ મુદિતાશય ।
સમાસમદશાલૌલ્યમુક્તં તવ વપુસ્ સ્થિતમ્ ॥

વસ્તુનાવસ્તુનૈવાન્તર્ અમૃતેનેવ સાગરઃ ।
અપુનઃપ્રક્ષયાયૈવ પરિતૃપ્તો ઽસિ સુન્દર ॥

ન તદ્ અસ્તિ મુને વસ્તુ યત્રોપાદેયતાસ્તિ નઃ ।
યાવત્ કિઞ્ચિદ્ ઇદં દૃશ્યં તાવદ્ એવ ન કિઞ્ચન ॥

ઉપાદેયસ્ય ચાભાવાદ્ ધેયમ્ અપ્ય્ અસ્તિ કિં કિલ ।
પ્રતિયોગિવ્યવચ્છેદં વિના હેયં કિમ્ ઉચ્યતે ॥

તુચ્છત્વાત્ સર્વભાવાનામ્ અતુચ્છત્વાચ્ ચ કાલતઃ ।
ચિરં મમ પરિક્ષીણે તુચ્છાતુચ્છમનસ્સ્થિતી ॥

દેશકાલવશાદ્ દૃષ્ટ્વા તુચ્છસ્યાતુચ્છતામ્ ઇહ ।
અતુચ્છસ્ય તુ તુચ્છત્વં વર્જ્યે નિન્દાસ્તુતી બુધૈઃ ॥

રાગાન્ નિન્દાસ્તુતી લોકે રાગશ્ ચ પરિવાઞ્છનાત્ ।
વાઞ્છ્યતે ચ મહોદારં વસ્તુ શોભનબુદ્ધિના ॥

ત્રિલોક્યાં ચ સ્ત્રિયશ્ શૈલાસ્ સમુદ્રા વનરાજયઃ ।
ભૂતાનિ ચ સુશૂન્યાનિ સારો નાસ્ત્ય્ ઉત્તમસ્ તતઃ ॥

માંસાર્બુદાભમૃદ્વર્તિમયે જગતિ જર્જરે ।
વાઞ્છનીયવિહીને ઽસ્મિઞ્ શૂન્યે કિમ્ ઇવ વાઞ્છ્યતે ॥

વાઞ્છાયાં વિનિવૃત્તાયાં સઙ્ક્ષયો દ્વેષરાગયોઃ ।
દિનલક્ષ્મ્યાં વ્યતીતાયામ્ આલોકાતપયોર્ ઇવ ॥

અલમ્ અતિવિતતૈર્ વચઃપ્રપઞ્ચૈર્ ઇયમ્ ઉચિતેહ સુખાય દૃષ્ટિર્ એકા ।
સમુપશમિતવાસનં મનો ઽન્તર્ યદિ મુદિતં હિ તદ્ ઉત્તમા પ્રતિષ્ઠા ॥