મોક્ષોપાય · અધ્યાય 5.60

ઇતિ હેમજટાધીશો લેભે પદમ્ અનુત્તમમ્ ।
વિવેકાધ્યવસાયેન બ્રાહ્મણ્યમ્ ઇવ ગાધિજઃ ॥

અનન્તાકારકાર્યાસુ નાસીચ્ ચેષ્ટાસુ ખેદવાન્ ।
ભૂયો ભૂયઃ પ્રયુક્તાસુ દિનમાલાસ્વ્ ઇવેશ્વરઃ ॥

તતઃ પ્રભૃતિ સો ઽતિષ્ઠત્ સર્વેહાવિગતજ્વરમ્ ।
સમાસમે સ્વકે કાર્યે જલૌઘો ઽગ્ર ઇવાનતે ॥

હર્ષામર્ષવિનિર્મુક્તઃ પ્રકૃતં કાર્યમ્ આચરન્ ।
ઉદારગમ્ભીરવપુર્ જહારામ્બુનિધેશ્ શ્રિયમ્ ॥

સુષુપ્તસમધર્મિણ્યા ચિત્તવૃત્ત્યા વ્યરાજત ।
નિષ્કમ્પયા પ્રકાશિન્યા દીપસ્ સ્વશિખયેવ સઃ ॥

ન નિર્ઘૃણો દયાવાન્ નો ન દ્વન્દ્વી નાપ્ય્ અમત્સરઃ ।
ન સુખી નાસુખી નાર્થી નાનર્થી સ બભૂવ હ ॥

સમદર્શનયા નિત્યં વૃત્ત્યા ચામલધીરયા ।
અન્તશ્શીતલયા રેજે પરિપૂર્ણેન્દુબિમ્બવત્ ॥

સર્વં ચિત્તત્ત્વકચનં જગદ્ ઇત્ય્ અવલોક્ય સા ।
પ્રશાન્તસુખદુઃખશ્રીસ્ તસ્ય પૂર્ણા મતિર્ બભૌ ॥

ઉલ્લસન્ વિલસન્ ઘૂર્ણંસ્ તિષ્ઠન્ ગચ્છઞ્ શ્વસન્ સ્વપન્ ।
અભૂત્ સ સ્વસમાધિસ્થઃ પ્રબુદ્ધશ્ ચિલ્લયં ગતઃ ॥

સ કુર્વન્ વિગતાસઙ્ગં રાજ્યં રાજીવલોચનઃ ।
અતિષ્ઠદ્ અક્ષતાકારો ભૂરિવર્ષશતાન્ય્ અથ ॥

સન્નિવેશમ્ ઇમં દેહનામકં તદનુ સ્વયમ્ ।
સ જહૌ તેજસાક્રાન્તો રૂપં હિમકણો યથા ॥

વિવેશ પરમ્ આદ્યં તત્ કારણં કારણેશ્વરમ્ ।
પ્રજ્ઞયા સરિતા વારિપૂરઃ પૂર્ણમ્ ઇવામ્બુધિમ્ ॥

અધિગતવિમલૈકરૂપતેજા ગગનદશાં સમુપેત્ય શાન્તશોકઃ ।
અલમ્ અભવદ્ અસૌ પરં સ્વરૂપં ઘટખમ્ ઇવામ્બરસંયુતં મહાત્મા ॥