મોક્ષોપાય · અધ્યાય 5.30

અથેમમ્ અપરં રામ વિજ્ઞાનાધિગમે ક્રમમ્ ।
શૃણુ દૈત્યેશ્વરસ્ સિદ્ધઃ પ્રહ્લાદસ્ સ્વાત્મના યથા ॥

આસીત્ પાતાલજઠરે વિદ્રાવિતસુરો ઽસુરઃ ।
હિરણ્યકશિપુર્ નામ નારાયણપરાક્રમઃ ॥

આક્રાન્તભુવનાભોગસ્ સ જહાર હરેર્ જગત્ ।
ષટ્પદસ્ય બૃહત્પત્ત્રં રાજહંસ ઇવામ્બુજમ્ ॥

ચકાર જગતાં રાજ્યં સમાક્રાન્તસુરાસુરઃ ।
દન્તી નિરસ્તહંસૌઘો નલિન્યામ્ અલિનામ્ ઇવ ॥

અથાસાવ્ અસુરાધીશઃ કુર્વંસ્ ત્રિભુવનેશતામ્ ।
કાલેન સુષુવે પુત્રાન્ અઙ્કુરાન્ ઇવ માધવઃ ॥

તે ઽવર્ધન્તાચિરેણૈવ તેજસ્તર્જિતતારકાઃ ।
દશાર્કાંશુશતાનીવ વ્યોમાક્રાન્તિવિલાસિનઃ ॥

પ્રહ્લાદો નામ ભગવાન્ પ્રધાનાત્મા બભૂવ હ ।
તેષાં મધ્યે મહાર્હાણાં મણીનામ્ ઇવ કૌસ્તુભઃ ॥

તેનારાજત પુત્રેણ હિરણ્યકશિપુર્ ભૃશમ્ ।
સર્વસૌન્દર્યયુક્તેન વસન્તેનેવ વત્સરઃ ॥

અથ પુત્રસહાયો ઽસૌ બલકોશસમન્વિતઃ ।
આજગામ મદં દૈત્યસ્ ત્રિગણ્ડગલિતેભવત્ ॥

તતાપાક્રાન્તિતાપેન ત્રિજગન્તિ વિકાસિના ।
કલ્પાન્તસૂર્યગણવન્ નવયૈવ કરશ્રિયા ॥

અખિદ્યન્તાસ્ય તેનાથ સૂર્યેન્દુપ્રમુખાસ્ સુરાઃ ।
દુર્વિલાસવિલોલસ્ય બાલસ્યેવ સ્વબન્ધવઃ ॥

તે ઽર્થયાં ચક્રિરે શૌરિં દૈત્યેન્દ્રેભપતેર્ વધે ।
ન ક્ષમન્તે મહાન્તો ઽપિ પૌનઃપુણ્યેન દુષ્ક્રિયામ્ ॥

તતઃ પ્રલયપર્યસ્તજગદ્ઘર્ઘરજૃમ્ભિતમ્ ।
દિગ્દન્તિદશનપ્રખ્યનખવજ્રાશ્રિસૂમ્ભિતમ્ ॥

સ્થિરવિદ્યુલ્લતાજાલભાસુરોર્ધ્વજમણ્ડલમ્ ।
દશદિક્કોટરોદ્વાન્તજ્વલજ્જ્વલનકુણ્ડલમ્ ॥

સમસ્તકુલશૈલેન્દ્રપિણ્ડપીઠોદ્ભટોદરમ્ ।
દોર્દ્રુમાધૂનનોદ્ધૂતસ્ફુટદ્બ્રહ્માણ્ડકર્પરમ્ ॥

વદનોદરનિષ્ક્રાન્તવાતોત્સારિતપર્વતં ।
ત્રિજગદ્દહનોદ્યુક્તકોપકલ્પાગ્નિગર્વિતમ્ ॥

સટાવિકટપીનાંસસ્પન્દપ્રેરિતભાસ્કરમ્ ।
રોમકૂપલસદ્વહ્નિપુઞ્જપિઞ્જરપર્વતમ્ ॥

કુલાચલમહાકુડ્યકુટ્ટનોદ્ભટદૃક્પુટમ્ ।
સર્વાવયવનિષ્ઠ્યૂતપટ્ટિસપ્રાસતોમરમ્ ॥

નારસિંહં વપુઃ કૃત્વા માધવો ઽહન્ મહાસુરમ્ ।
લસત્કટકટારાવં તુરઙ્ગમમ્ ઇવ દ્વિપઃ ॥

પુરમ્ આસુરમ્ ઉદ્વાન્તૈર્ દદાહેક્ષણવહ્નિભિઃ ।
સસર્વભૂતં કલ્પાન્તે જગજ્જાલમ્ ઇવાનલઃ ॥

નૃસિંહમારુતે તસ્મિન્ ભૃશં ક્ષોભમ્ ઉપાગતે ।
વિસ્ફૂર્જતિ ઘનાસ્ફોટૈર્ એકાર્ણવ ઇવાકુલે ॥

દુદ્રુવુર્ દાનવૌઘાસ્ તે દિક્ષ્વ્ અલં મષકા ઇવ ।
ઉપાયયુર્ અદૃશ્યત્વં દીપા ઇવ ગતત્વિષઃ ॥

અથ વિદ્રુતદૈત્યેન્દ્રં દગ્ધાન્તઃપુરમણ્ડલમ્ ।
બભૂવ પાતાલતલં કલ્પક્ષુણ્ણજગત્સમમ્ ॥

અકાલકલ્પાન્તવિધૌ શનૈઃ પ્રશમિતે વિભૌ ।
ક્વાપિ યાતે સમાશ્વસ્તસુરસંરમ્ભપૂજિતે ॥

મૃતશિષ્ટા દનુસુતાઃ પ્રહ્લાદપરિપાલિતાઃ ।
દગ્ધં સ્વં દેશમ્ આજગ્મુસ્ સરશ્ શુષ્કમ્ ઇવાણ્ડજાઃ ॥

તત્ર કાલોચિતાં કૃત્વા સ્વનાશપરિદેવનામ્ ।
ઔર્ધ્વદૈહિકસત્કારં ચક્રુઃ પ્રભુષુ બન્ધુષુ ॥

હૃતબન્દીજનં પ્લુષ્ટબન્ધુબાન્ધવમણ્ડલમ્ ।
શનૈર્ આશ્વાસયામ્ આસુર્ મૃતશિષ્ટં સ્વકં જનમ્ ॥

ચિત્રાર્પિતોપમદુરાકૃતયો નિરીહા દીનાશયા હિમહતામ્બુરુહોપમાનાઃ ।
શોકોપતપ્તમનસો ઽસુરનાયકાસ્ તે દગ્ધદ્રુમા ઇવ નિરસ્તવિકાસમ્ આસન્ ॥