મોક્ષોપાય · અધ્યાય 5.28

અથ તે દાનવાસ્ તત્ર બડેર્ અનુચરાસ્ તદા ।
તદ્ગૃહં સ્ફાટિકં સૌધમ્ ઉચ્ચૈર્ આરુરુહુઃ ક્ષણાત્ ॥

ડિમ્બાદ્યા મન્ત્રિણો વીરાસ્ સામન્તાઃ કુકુહાદયઃ ।
સુરાદ્યાશ્ ચૈવ રાજાનો વૃત્રાદ્યા બલહારિણઃ ॥

હયગ્રીવાદયસ્ સભ્યાશ્ શુકુન્દાદ્યાશ્ ચ બન્ધવઃ ।
લુડઙ્ગાદ્યાશ્ ચ સુહૃદઃ પલ્મૂલાદ્યાશ્ ચ લાલકાઃ ॥

કુબેરયમશક્રાદ્યા ઉપાયનકરાસ્ સુરાઃ ।
યક્ષા વિદ્યાધરા નાગાસ્ સેવાવસરકાઙ્ક્ષિણઃ ॥

રમ્ભાતિલોત્તમાદ્યાશ્ ચ ચામરિણ્યો વરાઙ્ગનાઃ ।
સરિતસ્ સાગરાશ્ શૈલા દિશશ્ ચ વિદિશસ્ તથા ॥

સેવાર્થમ્ આયયુસ્ તસ્ય તં પ્રદેશં તદા બડેઃ ।
અન્યે ચ બહવસ્ સિદ્ધાસ્ ત્રૈલોક્યોદરવાસિનઃ ॥

ધ્યાનમૌનસમાધિસ્થં ચિત્રાર્પિતમ્ ઇવાચલમ્ ।
નમત્કિરીટાવલયો દદૃશુર્ બડિમ્ આદૃતાઃ ॥

તં દૃષ્ટ્વા કૃતકર્તવ્યાઃ પ્રણેમુસ્ તે મહાસુરાઃ ।
વિષાદવિસ્મયાનન્દભયમન્થરતાં યયુઃ ॥

મન્ત્રિણો ઽથ વિચાર્યાત્ર કિં પ્રાપ્તમ્ ઇતિ દાનવાઃ ।
ભાર્ગવં ચિન્તયામ્ આસુર્ ગુરું સર્વવિદાં વરમ્ ॥

ચિન્તનાનન્તરં દૈત્યા ભાર્ગવં ભાસુરં પુરઃ ।
દદૃશુઃ કલ્પિતપ્રાપ્તં ગન્ધર્વનગરં યથા ॥

પૂજ્યમાનો ઽસુરગણૈર્ નિવિષ્ટો ગુરુવિષ્ટરે ।
દદર્શ ધ્યાનમૌનસ્થં ભાર્ગવો દાનવેશ્વરમ્ ॥

વિશ્રમ્ય સ ક્ષણમ્ ઇવ પ્રેમવાન્ અવલોક્ય ચ ।
બડિં વિચારયન્ દૃષ્ટ્યા પરિક્ષીણભવભ્રમમ્ ॥

દેહરશ્મિશતૈર્ દન્તદીપ્તિભિઃ ક્ષીરસાગરે ।
ક્ષિપન્ન્ ઇવ સભામ્ આહ હસન્ વાક્યમ્ ઇદં ગુરુઃ ॥

અહો ચિત્રમ્ ઇદં દૈત્યાસ્ સ્વવિચારણયૈવ યત્ ।
સમ્પ્રાપ્તવિમલાલોકસ્ સિદ્ધો ઽયં ભગવાન્ બડિઃ ॥

અયં તદ્ એવમ્ એવેહ તિષ્ઠન્ દાનવસત્તમાઃ ।
સ્વાત્મનિ સ્થિતિમ્ આપ્નોતુ પદં પશ્યત્વ્ અનામયમ્ ॥

શ્રાન્તો વિશ્રાન્તિમ્ આયાતઃ ક્ષીણચિન્તાભરભ્રમઃ ।
શાન્તસંસારનીહારો બોધનીયો ન દાનવાઃ ॥

સ્વ એવાલોક એતેન સમ્પ્રાપ્તો ઽજ્ઞાનસઙ્ક્ષયે ।
શાન્તે ઽભ્રસમ્ભ્રમે સૌરો દિનેનેવ કરોત્કરઃ ॥

સ્વયમ્ એવ હિ કાલેન પ્રબોધમ્ અયમ્ એષ્યતિ ।
બીજકોશાત્ સ્વસંવિત્ત્યા સુપ્તમૂર્તિર્ ઇવાઙ્કુરઃ ॥

કુરુધ્વં સ્વાનિ કાર્યાણિ સર્વે દાનવનાયકાઃ ।
બડિર્ વર્ષસહસ્રેણ સમાધેર્ બોધમ્ એષ્યતિ ॥

ઇત્ય્ ઉક્તે ગુરુણા તત્ર ભયહર્ષવિષાદજામ્ ।
દૈત્યાશ્ ચિન્તાં જહુશ્ શુષ્કાં મઞ્જરીમ્ ઇવ પાદપાઃ ॥

વૈરોચનિસભાસંસ્થાં વિધાય પ્રાગ્વ્યવસ્થયા ।
સ્વવ્યાપારપરાસ્ તસ્થુસ્ સર્વ એવાસુરાસ્ તતઃ ॥

નરા મહીમ્ અહિપતયો રસાતલં ગ્રહા નભસ્ ત્રિદશગણાસ્ ત્રિવિષ્ટપમ્ ।
દિશો ઽદ્રયો જલપતયશ્ ચ કન્દરાન્ વનેચરા ગગનચરાશ્ ચ ખં યયુઃ ॥