મોક્ષોપાય · અધ્યાય 5.26

ઇતિ સઞ્ચિન્ત્ય ભગવાન્ બડિર્ આમીલિતેક્ષણઃ ।
દધ્યૌ કમલપત્ત્રાક્ષં શુક્રમ્ આકાશમન્દિરમ્ ॥

સર્વસ્થચિન્મયાનન્તનિત્યધ્યાનો ઽથ ભાર્ગવઃ ।
ચેતન્તં જ્ઞાતવાઞ્ શિષ્યં બડિં ગુર્વર્થિનં પુરે ॥

અથ સર્વગતાનન્તચિદાત્મા ભાર્ગવઃ પ્રભુઃ ।
આનિનાય સ દેહં સ્વં રત્નવાતાયનં બડેઃ ॥

ગુરુદેહપ્રભાજાલપરિમૃષ્ટતનુર્ બડિઃ ।
બુબુધે પ્રાતર્ અર્કાંશુસમ્બોધિતમ્ ઇવામ્બુજમ્ ॥

તત્ર રત્નાર્ઘદાનેન મન્દારકુસુમોત્કરૈઃ ।
પાદાભિવન્દનેનૈનં પૂજયામ્ આસ ભાર્ગવમ્ ॥

રત્નાર્ઘપરિકીર્ણાઙ્ગં કૃતમન્દારશેખરમ્ ।
મહાર્હાસનવિશ્રાન્તમ્ અથોવાચ ગુરું બડિઃ ॥

ભગવંસ્ ત્વત્પ્રસાદોત્થા પ્રતિભેયં પુરસ્ તવ ।
નિયોજયતિ માં વક્તું કાર્યં કર્તુમ્ ઇવાર્કભાઃ ॥

ભોગાન્ પ્રતિ વિરક્તો ઽસ્મિ મહાસમ્મોહદાયિનઃ ।
તત્ત્વં વિજ્ઞાતુમ્ ઇચ્છામિ મહાસમ્મોહહારિ યત્ ॥

કિમ્ ઇહાસ્તિ કિયન્માત્રમ્ ઇદં કિમ્મયમ્ એવ વા ।
કો ઽહં કસ્ ત્વં કિમ્ એતે વા લોકા ઇતિ વદાશુ મે ॥

બહુનાત્ર કિમ્ ઉક્તેન ખં ગન્તું યત્નવાન્ અહમ્ ।
સર્વં દાનવરાજેન્દ્ર સારં સઙ્ક્ષેપતશ્ શૃણુ ॥

ચિદ્ ઇહાસ્તિ હિ ચિન્માત્રમ્ ઇદં ચિન્મયમ્ એવ ચ ।
ચિત્ ત્વં ચિદ્ અહમ્ એતે ચ લોકાશ્ ચિદ્ ઇતિ સઙ્ગ્રહઃ ॥

ચિતં નિશ્ચયમ્ આદાય વિલોકય ધિયેદ્ધયા ।
સ્વયમ્ એવાત્મનાત્માનમ્ અનન્તં પદમ્ આપ્સ્યસિ ॥

ભવ્યો ઽસિ ચેત્ તદ્ એતસ્માત્ સર્વમ્ આપ્નોષિ નિશ્ચયાત્ ।
નો ચેત્ તદ્ બહ્વ્ અપિ પ્રોક્તં ત્વયિ ભસ્મનિ હૂયતે ॥

ચિચ્ચેત્યકલના બન્ધસ્ તન્મુક્તિર્ મુક્તિર્ ઉચ્યતે ।
ચિદ્ અચેત્યા કિલાત્મેતિ સર્વસિદ્ધાન્તસઙ્ગ્રહઃ ॥

એતં નિશ્ચયમ્ આદાય વિલોકય ધિયેદ્ધયા ।
સ્વયમ્ એવાત્મનાત્માનમ્ અનન્તં પદમ્ આપ્સ્યસિ ॥

ખં વ્રજામ્ય્ અહમ્ અત્રૈતે મુનયસ્ સપ્ત સઙ્ગતાઃ ।
કેનાપિ સુરકાર્યેણ વર્તવ્યં તત્ર ખે મયા ॥

રાજન્ યાવદ્ અયં દેહસ્ તાવન્ મુક્તધિયામ્ અપિ ।
યથાપ્રાપ્તાર્થસન્ત્યાગો રોચતે ન સ્વભાવતઃ ॥

ઇતિ કથિતવતાથ ભાર્ગવેણ સ્ફુટજલરાશિપથે મહાજવેન ।
પ્લુતમ્ અલિશબલે નભોઽન્તરાલે તરલતરઙ્ગવદ્ આકુલે ગ્રહૌઘૈઃ ॥