મોક્ષોપાય · અધ્યાય 5.25

એતન્ મે કથિતં પૂર્વં પિત્રા ચારુવિચારિણા ।
ઇદાનીં સંસ્મૃતં દિષ્ટ્યા સમ્પ્રબોધમ્ અહં ગતઃ ॥

અદ્યેયં મમ સઞ્જાતા ભોગાન્ પ્રત્ય્ અરતિસ્ સ્ફુટમ્ ।
દિષ્ટ્યા શમસુખં સ્વચ્છં વિશામ્ય્ અમૃતશીતલમ્ ॥

પુનર્ આપૂરયન્ન્ આશાઃ પુનર્ અભ્યાહરન્ ધનમ્ ।
પુનર્ આવર્જયન્ કાન્તાઃ ખિન્નો ઽસ્મિ વિભવસ્થિતૌ ॥

અહો નુ ખલુ રમ્યેયં શમભૂશ્ શીતલાન્તરા ।
સર્વા એવ શમં યાન્તિ સુખદુઃખદૃશશ્ શમે ॥

શામ્યામિ પરિનિર્વામિ સુખમ્ આસે શમે સ્થિતઃ ।
અયમ્ અન્તઃ પ્રહૃષ્યામિ ચન્દ્રબિમ્બ ઇવાર્પિતઃ ॥

ઉત્તાણ્ડવમનોરંહઃપોષિતોરુશરીરકમ્ ।
અનારતપરિક્ષોભં હા દુઃખં વિભવાર્જનમ્ ॥

અઙ્ગમ્ અઙ્ગેન સમ્પીડ્ય માંસં માંસેન ચ સ્ત્રિયાઃ ।
પુરાહમ્ અભવં પ્રીતો યત્ તન્ મોહવિજૃમ્ભિતમ્ ॥

દૃષ્ટાન્તદૃષ્ટયો દૃષ્ટા ભુક્તં ભોક્તવ્યમ્ અક્ષતમ્ ।
આક્રાન્તમ્ અખિલં ભૂતજાતં કિમ્ ઇવ શોભનમ્ ॥

પુનસ્ તાન્ય્ એવ તાન્ય્ એવ તત્રેહાન્યત્ર ચાત્ર ચ ।
ઇતશ્ ચેતશ્ ચ વસ્તૂનિ નાપૂર્વં નામ કિઞ્ચન ॥

સર્વમ્ એવ પરિત્યજ્ય પરિહૃત્ય ધિયા સ્વયમ્ ।
સ્વચ્છ એવાવતિષ્ઠે ઽહં પૂર્ણો ઽર્ણવ ઇવાત્મનિ ॥

પાતાલે ભૂતલે સ્વર્ગે સ્ત્રિયો રત્નોપલાદયઃ ।
સારં તદ્ અપિ તુચ્છેન કાલેનાશુ નિગીર્યતે ॥

એતાવન્તમ્ અહં કાલં ભૃશં બાલો ઽભવં પુરા ।
યઃ કુર્વન્ દ્વેષમ્ અમરૈસ્ તુચ્છયા જગદિચ્છયા ॥

મનોનિર્માણમાત્રેણ જગન્નામ્ના મહાધિના ।
ત્યક્તેનાત્તેન વાર્થસ્ સ્યાત્ ક ઉદારો મહાત્મનઃ ॥

કષ્ટં ચિરતરં કાલમ્ અનર્થો ઽર્થધિયા મયા ।
અજ્ઞાનમદમત્તેન બાલેન શ્વેવ સેવિતઃ ॥

તરત્તરલતૃષ્ણેન કિમ્ ઇવાસ્મિઞ્ જગત્ત્રયે ।
મયા ન કૃતમ્ અજ્ઞેન પશ્ચાત્તાપાભિવૃદ્ધયે ॥

એતયા તદ્ અલં મે ઽસ્તુ તુચ્છયા પૂર્વચિન્તયા ।
પૌરુષં યાતિ સાફલ્યં વર્તમાનચિકિત્સયા ॥

અદ્યાપરિમિતાકારકારણૈકતયાત્મનઃ ।
સર્વતસ્ સુખમ્ અભ્યેમિ રસાયન ઇવાર્ણવે ॥

કો ઽયં તાવદ્ અહં કિં સ્યાદ્ આત્મેત્ય્ આત્માવલોકનમ્ ।
પૃચ્છામ્ય્ ઉશનસં નાથં નૂનમ્ અજ્ઞાનશાન્તયે ॥

સઞ્ચિન્તયામિ પરમેશ્વરમ્ આશુ શુક્રમ્ ઉદ્યત્પ્રસાદમ્ અથ તેન ગિરોપદિષ્ટઃ ।
તિષ્ઠામ્ય્ અનન્તવિભવે સ્વયમ્ આત્મનાત્મન્ય્ અક્ષીણમ્ અર્થમ્ ઉપદેશગિરઃ ફલન્તિ ॥