મોક્ષોપાય · અધ્યાય 4.40

અત્રૈવ વસ્તુન્ય્ ઉચિતે શૃણુ રાઘવ પૂર્વજાઃ ।
કચેન ગાથા યા ગીતા બાર્હસ્પત્યેન પાવનીઃ ॥

કસ્મિંશ્ચિન્ મેરુગહને તિષ્ઠન્ સુરગુરોસ્ સુતઃ ।
કદાચિદ્ અભ્યાસવશાદ્ વિશ્રાન્તિં પ્રાપદ્ આત્મનિ ॥

સમ્યગ્જ્ઞાનામૃતાપૂર્ણા મતિર્ નારમતાસ્ય સા ।
પઞ્ચભૂતમયે મ્લાને દૃશ્યે ઽસ્મિન્ પેલવાત્મનિ ॥

તેન નિર્વિણ્ણ ઇવ સ આત્મતત્ત્વાદ્ ઋતે પરમ્ ।
અપશ્યન્ સમુવાચેદમ્ એકો ગદ્ગદયા ગિરા ॥

કિં કરોમિ ક્વ ગચ્છામિ કિં ગૃહ્ણામિ ત્યજામિ કિમ્ ।
આત્મના પૂરિતં વિશ્વં મહાકલ્પામ્બુના યથા ॥

દુઃખમ્ આત્મા સુખં ચૈવ ખમ્ આશાસ્ ત્વમ્ અહં તથા ।
સર્વમ્ આત્મમયં જાતં કષ્ટં નષ્ટો ઽહમ્ આત્મના ॥

સબાહ્યાભ્યન્તરં દેહેષ્વ્ અધ ઊર્ધ્વં ચ દિક્ષુ ચ ।
ઇત આત્મા તથેહાત્મા નાસ્ત્ય્ અનાત્મમયં ક્વચિત્ ॥

સર્વત્રૈવ સ્થિતો હ્ય્ આત્મા સર્વમ્ આત્મનિ સંસ્થિતમ્ ।
સર્વમ્ એવેદમ્ આત્મૈવમ્ આત્મન્ય્ એવ નમામ્ય્ અહમ્ ॥

ન તદ્ અસ્તિ ન યત્રાહં ન તદ્ અસ્તિ ન યન્ મયિ ।
કિમ્ અન્યદ્ અભિવાઞ્છામિ કેવલં પ્રશમામ્ય્ અહમ્ ॥

આત્મનાત્મનિ યેનાહં નમામ્ય્ આપૂરિતાત્મના ।
ઉપશામ્યામિ તેનાન્તઃ ક્વાન્યત્રાભિપતામ્ય્ અહમ્ ॥

અહમ્ અગ્નિર્ અહં વાયુર્ અહં ભૂર્ અહમ્ અમ્બરમ્ ।
યન્ નાહં નાસ્તિ તત્ કિઞ્ચિત્ સર્વમ્ એવાહમ્ આતતમ્ ॥

આપૂરિતાપારનભોમહાભૈરવરૂપવાન્ ।
સર્વસંવિન્મયઃ પૂર્ણસ્ તિષ્ઠામ્ય્ એકાર્ણવોપમઃ ॥

ઇત્ય્ એવં ભાવયન્ ભાવં કનકાચલકુઞ્જકે ।
ઉચ્ચારયન્ન્ અથોઙ્કારં ઘણ્ટાસ્વનમ્ ઇવ ક્રમાત્ ॥

ઓઙ્કારસ્ય કલામ્ અર્ધાં પાશ્ચાત્યાં વાલકોમલામ્ ।
નાન્તરસ્થેન બાહ્યે ન ભાવયન્ પરમે હૃદિ ॥

વ્યપગતકલનાકલઙ્કશુદ્ધો હૃદયનિરન્તરલીનવાતવૃત્તિઃ ।
ગતઘનશરદમ્બરોપમાનઃ કચ ઉપલાચલમૂર્તિમાન્ અતિષ્ઠત્ ॥