મોક્ષોપાય · અધ્યાય 4.34

કદાચિદ્ અથ માર્ગેણ તેન કૈલાસવાહિનીમ્ ।
અહં સ્નાતુમ્ અદૃશ્યાત્મા વ્યોમવીથિગતો ઽગમમ્ ॥

નિર્ગત્ય નભસસ્ સપ્તમુનિમણ્ડલકોટરાત્ ।
રાત્રૌ પ્રાપ્તો ઽસ્મિ સુમતે દાશૂરતરુપૃષ્ઠખમ્ ॥

યાવચ્ છૃણોમિ વિટપકુહરાત્ કાનને વચઃ ।
કુટ્મલામ્ભોજબદ્ધસ્ય ષટ્પદસ્યેવ નિસ્સ્વનમ્ ॥

શૃણુ પુત્ર મહાબુદ્ધે વસ્તુનો ઽસ્ય સમામ્ ઇમામ્ ।
વર્ણયામિ મહાશ્ચર્યામ્ એકામ્ આખ્યાયિકાં તવ ॥

અસ્તિ રાજા મહાવીર્યો વિખ્યાતો ભુવનત્રયે ।
નામ્ના સ્વોત્થ ઇતિ શ્રીમાઞ્ જગદાક્રમણે ક્ષમઃ ॥

યસ્યાનુશાસનં સર્વે ભુવનેષ્વ્ અપિ નાયકાઃ ।
શિરોભિર્ ધારયન્ત્ય્ ઉચ્ચૈશ્ ચૂડામણિમ્ ઇવોત્તમમ્ ॥

યસ્ સાહસૈકરસિકો નાનાશ્ચર્યવિહારવાન્ ।
કેનચિત્ ત્રિષુ લોકેષુ ન મહાત્મા વશીકૃતઃ ॥

યસ્યારમ્ભસહસ્રાણિ સુખદુઃખપ્રદાન્ય્ અલમ્ ।
સઙ્ખ્યાતું નૈવ શક્યન્તે કલ્લોલા જલધેર્ ઇવ ॥

યસ્ય વીર્યં સુવીર્યસ્ય ન શસ્ત્રાસ્ત્રૈર્ ન પાવકૈઃ ।
કેનચિદ્ ભુવને ક્રાન્તમ્ આકાશમ્ ઇવ મુષ્ટિના ॥

યદીયાં વિતતારમ્ભાં લીલાં નિર્માણભાસુરામ્ ।
ન મનાગ્ અનુકુર્વન્તિ શક્રોપેન્દ્રહરા અપિ ॥

ત્રયસ્ તસ્ય મહાબાહો દેહા દિગ્ભરણક્ષમાઃ ।
જગદ્ આકૃષ્ય તિષ્ઠન્તિ ઉત્તમાધમમધ્યમાઃ ॥

વ્યોમન્ય્ એવાતિવિતતે જાતો ઽસૌ ત્રિશરીરકઃ ।
તત્રૈવ ચ સ્થિતિં યાતશ્ શબ્દવાતખપક્ષિવત્ ॥

તત્રૈવાપારગગને નગરં તેન નિર્મિતમ્ ।
ચતુર્દશમહારથ્યં વિભાગત્રયભૂષિતમ્ ॥

વનોપવનમાલાઢ્યં ક્રીડાશિખરિસુન્દરમ્ ।
મુક્તાલતાવિવલિતં વાપીસપ્તકભૂષિતમ્ ॥

શીતલોષ્ણાત્મકાક્ષીણદીપદ્વયવિરાજિતમ્ ।
ઊર્ધ્વાધોગતિરૂપેણ વણિઙ્માર્ગેણ સઙ્કુલમ્ ॥

તસ્મિન્ન્ એવાતિવિપુલે પત્તને તેન ભૂભૃતા ।
સઞ્ચારિણો વિરચિતા મુગ્ધાવવરકા ગણાઃ ॥

ઊર્ધ્વે કેચિદ્ અધઃ કેચિન્ મધ્યે કેચિન્ નિયોજિતાઃ ।
કેચિચ્ ચિરેણ નશ્યન્તઃ કેચિચ્ છીઘ્રવિનાશિનઃ ॥

અસિતચ્છાદનાચ્છન્ના નવદ્વારવિભૂષિતાઃ ।
અનારતવહદ્વાતા બહુવાતાયનાન્વિતાઃ ॥

દીપપઞ્ચકસાલોકાસ્ ત્રિસ્થૂણાશ્ શુક્લદારવઃ ।
મસૃણાલેપમૃદવઃ પ્રતોલીકુલસઙ્કુલાઃ ॥

માયયા રચિતાસ્ તેન રાજ્ઞા તેષુ મહામતે ।
રક્ષિતારો મહાયક્ષા નિત્યમ્ આલોકભીરવઃ ॥

અથાવવરકૌઘેષુ ચલત્સુ સ મહીપતિઃ ।
કરોતિ વિવિધાઃ ક્રીડા નીડેષ્વ્ ઇવ વિહઙ્ગમઃ ॥

ત્રિશરીરસ્ સ તેષ્વ્ અન્તસ્ તૈર્ યક્ષૈસ્ સહ પુત્રક ।
લીલાલસમ્ ઉષિત્વાશુ પુનર્ નિષ્ક્રમ્ય ગચ્છતિ ॥

તસ્યેચ્છા જાયતે વત્સ કદાચિચ્ ચલચેતસઃ ।
પુરં ભવિષ્યન્નિર્માણં કિઞ્ચિદ્ યામીતિ નિશ્ચલા ॥

ભૂતાવિષ્ટ ઇવાવેગાત્ તત ઉત્થાય ધાવતિ ।
પુરં તદ્ અપ્ય્ અવાપ્નોતિ ગન્ધર્વૈર્ ઇવ નિર્મિતમ્ ॥

તસ્યેચ્છા જાયતે નામ કદાચિજ્ જડચેતસઃ ।
વિનાશં સમ્પ્રયામીતિ તેનાશુ સ વિનશ્યતિ ॥

પુનર્ ઉત્પદ્યતે તૂર્ણં ખાન્ મહોર્મિર્ ઇવામ્ભસઃ ।
વ્યવહારં તનોત્ય્ ઉચ્ચૈઃ પુનર્ આરમ્ભમન્થરમ્ ॥

સ્વયૈવ વ્યવહૃત્યાથ કદાચિત્ પરિદૂયતે ।
કિં કરોમીદમ્ અજ્ઞો ઽસ્મિ દુઃખિતો ઽસ્મીતિ શોચતિ ॥

મુદમ્ એત્ય કદાચિચ્ ચ સ્વયમ્ આયાતિ પીનતામ્ ।
પ્રાવૃડ્વર્ષજલોલ્લાસપૂરાદ્ ઇવ નદીરયઃ ॥

પિબતિ વલ્ગતિ ગચ્છતિ જૃમ્ભતે સ્ફુરતિ ભાતિ ન ભાતિ ચ ભાસુરઃ ।
સુત મહામહિમા સ મહીપતિઃ પતિર્ અપામ્ ઇવ વાતરયાકુલઃ ॥