મોક્ષોપાય · અધ્યાય 4.32

તમ્ અથાસૌ મહાબુદ્ધિઃ ફલપલ્લવશાલિનમ્ ।
આનન્દમન્થરમનાઃ પુષ્પરૂપાચલોપમમ્ ॥

કદમ્બં રોદસીસ્તમ્ભમ્ આરુરોહ વનસ્થિતમ્ ।
એકાર્ણવગતં શૌરિઃ કલ્પવૃક્ષમ્ ઇવોન્નતમ્ ॥

તત્રાસૌ વ્યોમલગ્નાયાશ્ શાખાયાઃ પ્રાન્તપલ્લવે ।
વિવેશાધિગતાકાશમ્ ઐડૂકપ્રાન્તબુદ્ધવત્ ॥

અથોપવિશ્ય મૃદુનિ નવપલ્લવવિષ્ટરે ।
ક્ષણમ્ આલોકિતાસ્ તેન દિશઃ કૌતુકમન્થરમ્ ॥

સરિદેકાવલીરમ્યાશ્ શૈલેન્દ્રસ્તનકુટ્મલાઃ ।
નિર્મલાકાશકવરા લોલનીલામ્બુદાલકાઃ ॥

નીલશાદ્વલવસનાઃ પુષ્પગૌરવનાઙ્ગિકાઃ ।
ગૃહીતસાગરાપૂર્ણકલશાઃ પુરભૂષણાઃ ॥

ધૃતપ્રફુલ્લપદ્મિન્યસ્ સુગન્ધિમુખમારુતાઃ ।
ગ્રામઘુઙ્ઘુમકાકલ્યો નિર્ઝરારવનૂપુરાઃ ॥

દ્યુમૂર્ધાનો મહીપાદા વનાલીરોમરાજયઃ ।
જઙ્ગલોરુનિતમ્બિન્યશ્ ચન્દ્રાર્કકૃતકુણ્ડલાઃ ॥

શાલિસઞ્ચારકેદારચન્દનસ્થાસકાઙ્કિતાઃ ।
શિખરોરસિજાલગ્નહિમશુભ્રામ્બુદાંશુકાઃ ॥

મહાર્ણવપયઃપૂરનવમણ્ડનદર્પણાઃ ।
વૃક્ષૌઘઘર્મપુલકા ભુવનાન્તઃપુરાન્તરાઃ ॥

આર્તવસ્નાનધારિણ્યો લગ્નસૂર્યાંશુકુઙ્કુમાઃ ।
વિચિત્રકુસુમોપેતાશ્ ચન્દ્રાંશુસિતચન્દનાઃ ॥

ગગનતલલતાદલોપવિષ્ટઃ પ્રસૃતવનાવલિવારિવાહવેષાઃ ।
ત્રિભુવનવનિતા દદર્શ હૃષ્ટઃ કુસુમનિરન્તરમણ્ડિતા દશાશાઃ ॥