મોક્ષોપાય · અધ્યાય 4.2

એતત્ તે કથિતં સર્વં મનોરૂપનિરૂપણે ।
મયા રાઘવ નાન્યેન કેનચિન્ નામ હેતુના ॥

દૃઢનિશ્ચયવચ્ ચેતો યદ્ ભાવયતિ ભૂરિશઃ ।
તત્તાં યાત્ય્ અનલાશ્લેષાદ્ અયઃપિણ્ડો ઽગ્નિતામ્ ઇવ ॥

ભાવાભાવગ્રહોત્સર્ગદૃશશ્ ચિત્તેન કલ્પિતાઃ ।
નાસત્યા નાપિ સત્યાસ્ તા મનશ્ચાપલકારણાઃ ॥

મનો હિ હેતુઃ કર્તૃ સ્યાત્ કારણં ચ જગત્સ્થિતેઃ ।
વિશ્વરૂપતયૈવેદં તનોતિ મલિનં મનઃ ॥

મનો હિ પુરુષો રામ તન્ નિયોજ્યં શુભે પથિ ।
તજ્જયૈકાન્તસાધ્યા હિ સર્વા જગતિ ભૂતયઃ ॥

શરીરં ચેચ્ છરીરં સ્યાત્ કથં શુક્રો મહામતિઃ ।
અગમદ્ વિવિધં ભેદં બહુદેહસમુદ્ભવમ્ ॥

તસ્માચ્ ચિત્તં હિ પુરુષશ્ શરીરં ચિત્તમ્ એવ હિ ।
યન્મયં ચ ભવત્ય્ એતત્ તદ્ અવાપ્નોત્ય્ અસંશયમ્ ॥

યદ્ અતુચ્છમ્ અનાયાસમ્ અનુપાધિ ગતભ્રમમ્ ।
યત્નાત્ તદનુસન્ધાનં કુરુ તત્તાં ચ યાસ્યસિ ॥

અભિપતતિ મનસ્સ્થિતિં શરીરં ન તુ વપુરાચરિતં મનઃ પ્રયાતિ ।
અભિપતતુ તવાત્ર તેન સત્યં સુભગ મનઃ પ્રજહાત્વ્ અસત્યમ્ અન્યત્ ॥