મોક્ષોપાય · અધ્યાય 4.10

ઇત્ય્ ઉક્ત્વા ભગવાન્ દેવસ્ તત્રૈવાન્તર્ધિમ્ આયયૌ ।
વેલાવનતટે શબ્દં કૃત્વેવામ્બુતરઙ્ગકઃ ॥

સુરાસ્ ત્વ્ આકર્ણ્ય તદ્વાક્યં જગ્મુસ્ સ્વામ્ અભિતો દિશમ્ ।
કમલામોદમ્ આદાય વનમાલામ્ ઇવાનિલાઃ ॥

દિનાનિ કતિચિત્ સ્વેષુ કાન્તેષુ સ્થિરકાન્તિષુ ।
દ્વિરેફા ઇવ પદ્મેષુ મન્દિરેષુ વિશશ્રમુઃ ॥

કઞ્ચિત્ કાલં સમાસાદ્ય સ્વાત્મોદયકરં શુભમ્ ।
ચક્રુર્ દુન્દુભિનિર્ઘોષં પ્રલયાભ્રરવોપમમ્ ॥

અથ દૈત્યૈસ્ સહ વ્યોમ્નિ તૈઃ પાતાલતલોત્થિતૈઃ ।
કાલક્ષેપકરં ઘોરં પુનર્ યુદ્ધમ્ અવર્તત ॥

વવુર્ અસિશરશક્તિમુદ્ગરૌઘા મુસુલગદાપરશૂગ્રચક્રસઙ્ઘાઃ ।
અશનિગિરિશિલાહુતાશવૃક્ષા અહિગરુડાદિમુખાનિ ચાયુધાનિ ॥

માયાકૃતાયુધમહામ્બુઘનપ્રવાહા ક્ષિપ્રં પ્રતિ પ્રતિદિશં પરિનિર્જગામ ।
પાષાણપર્વતમહીતટવૃક્ષલક્ષક્ષુબ્ધામ્બુપૂરઘનઘોષવતી નદી દ્રાક્ ॥

મધ્યપ્રવાહવહદુલ્મુકશૂલશૈલપ્રાસાસિકુન્તશરતોમરમુદ્ગરેણ ।
ગઙ્ગોપમામ્બુવલિતામરમન્દિરેણ સર્વાસુ દિક્ષ્વ્ અશનિવર્ષણકર્ષણેન ॥

પૃથ્વ્યાદિદારુણશરીરમયી પ્રહારદાનગ્રહે ગગનરશ્મિશરીરકૈવ ।
યા યોપશામ્યતિ સુરાસુરસિદ્ધસેના માયાકૃતા પુનર્ ઉદેતિ રસેન સૈવ ॥

શૈલોપમાયુધવિઘટ્ટિતભૂધરાણિ રક્તામ્બુપૂરપરિપૂર્ણમહાર્ણવાનિ ।
દેવાસુરેન્દ્રસુરશૈલવિરૂઢકુન્તતાલીવનાનિ કકુભાં વદનાન્ય્ અથાસન્ ॥

ઉદ્ગીર્ણકુન્તશરશક્તિગદાસિચક્રા હેલાનિગીર્ણસુરદાનવમુક્તશૈલા ।
કાષક્વણત્ક્રકચદન્તનખોગ્રમાલા જીવાન્વિતાપતદ્ અથાયસસિંહવૃષ્ટિઃ ॥

ઉજ્જ્વાલલોચનવિષજ્વલનાતપોદ્યદ્દિગ્દાહદર્શિતયુગાન્તદિનેશસેના ।
ઉડ્ડીયમાનપરિદીર્ઘમહીમહીધ્રા મત્તાબ્ધિવદ્ વિષધરાવલિર્ ઉલ્લલાસ ॥

ઉન્નાદવજ્રમકરોત્કરકર્કરાન્તરિક્ષાબ્ધિવીચિવલયૈર્ વલિતાચલેન્દ્રૈઃ ।
આસીજ્ જગત્ સકલમ્ એવ સુસઙ્કટાઙ્ગમ્ આવર્તિભિર્ વિવિધહેતિનદીપ્રવાહૈઃ ॥

શૈલાસ્ત્રશસ્ત્રગરુડાચલમાલિતોચ્ચનાગાઙ્ગનાસુરગણાઙ્ગનમ્ અન્તરિક્ષમ્ ।
આસીત્ ક્ષણં જલધિભિઃ ક્ષણમ્ અગ્નિપૂરૈઃ પૂર્ણં ક્ષણં દિનકરૈઃ ક્ષણમ્ અન્ધકારૈઃ ॥

ગરુડગુડગુડાકુલાન્તરિક્ષપ્રવિસૃતહેતિહુતાશપર્વતૌઘૈઃ ।
જગદ્ અભવદ્ અસહ્યકલ્પકાલજ્વલિતસુરાલયભૂતલાન્તરાલમ્ ॥

ઉદપતન્ વસુધાતલતો ઽસુરા ગગનમ્ અદ્રિતટાદ્ ઇવ પક્ષિણઃ ।
અતિબલાદ્ અપતન્ વિબુધા ભુવિ પ્રલયચાલિતશૈલશિલા ઇવ ॥

શરીરરૂઢોન્નતહેતિવૃક્ષવનાવલીલગ્નમહાગ્નિદાહાઃ ।
સુરાસુરાઃ પ્રાપુર્ અથામ્બરાન્તઃ કલ્પાનિલાન્દોલિતશૈલશોભામ્ ॥

સુરાસુરાદ્રીન્દ્રશરીરમુક્તૈ રક્તપ્રવાહૈર્ અભિતો ભ્રમદ્ભિઃ ।
બભાર પૂર્ણં પરિતો ઽમ્બરાબ્ધિસ્ સન્ધ્યારુણોદ્યચ્છતગઙ્ગમ્ અઙ્ગમ્ ॥

ગિરિવર્ષણમ્ અમ્બુવર્ષણં વિવિધોગ્રાયુધવર્ષણં તથા ।
વિષમાશનિવર્ષણં ચ તે શમમ્ અન્યોઽન્યમ્ અથાગ્નિવર્ષણમ્ ॥

અનયન્ નયમાર્ગકોવિદા દલિતાશેષગિરીન્દ્રભિત્તયઃ ।
સસૃજુશ્ ચ સમં સમન્તતઃ કકુબઙ્ગેષ્વ્ ઇવ પુષ્પવર્ષણમ્ ॥

દેવાસુરાસ્ સરસસઙ્ગરસમ્ભ્રમાર્તા અન્યોઽન્યમ્ અઙ્ગદલનાકુલહેતિહસ્તાઃ ।
દામેન્દ્રડિમ્બદહનાઃ પૃથુપીઠપીઠૈઃ કીર્ણાસૃજો નભસિ બભ્રમુર્ આક્ષિપન્તઃ ॥

છિન્નૈશ્ શિરઃકરભુજોરુભરૈર્ ભ્રમદ્ભિર્ આકાશકોશશલભૈર્ અશિવૈસ્ તદાનીમ્ ।
આસીજ્ જગજ્જઠરમ્ અભ્રવરૈર્ ઇવોગ્રૈર્ આભાસ્કરં સ્થગિતદિક્તટશૈલજાલમ્ ॥

મત્તાનલં ક્ષુબ્ધજલાનિલાર્કં દલદ્વનં શીર્ણસુરાસુરૌઘમ્ ।
બ્રહ્માણ્ડમ્ આખણ્ડિતકુડ્યકોણમ્ અકાલકલ્પાન્તકરાલમ્ આસીત્ ॥

ભ્રાન્તં ભૃશં ભ્રમિતદિક્તટમ્ અદ્રિકૂટૈર્ આત્મપ્રમાણઘનહેતિહતૈ રણદ્ભિઃ ।
કૂજદ્ભિર્ આર્તિભિર્ ઇવોગ્રગુહૌઘવાતૈઃ ક્રન્દદ્ભિર્ આપતિતસિંહરવૈર્ અદભ્રૈઃ ॥

માયાનદીજલધિયોધઘનાગ્નિદાહૈર્ વૃક્ષૈસ્ સુરાસુરશવૈર્ અચલૈશ્ શિલૌઘૈઃ ।
ભ્રાન્તં શિરસ્ત્રશરશક્તિગદાસ્ત્રશસ્ત્રૈર્ વાતાવકીર્ણવનપર્ણવદ્ અમ્બરાન્તઃ ॥

અદ્રીન્દ્રપક્ષપરિમાણગમાગમૈકદુર્વારહસ્તતલદારુણતાડનૈર્ દ્રાક્ ।
આસીત્ પતદ્ભટશરીરગિરીન્દ્રઘાતવિભ્રષ્ટદેવપુરપૂર્ણજલાર્ણવૌઘઃ ॥

ઘનઘુઙ્ઘુમપૂરિતાન્તરિક્ષા ક્ષતજાક્ષાલિતભૂધરાન્તરાલા ।
રુધિરહ્રદવૃત્તિવર્તિની વા ભુવનાભોગગુહા તદાકુલાભૂત્ ॥

અનન્તદિક્પ્રસરવિકારકારિણી ક્ષયોદયોન્મુખસુખદુઃખદાયિની ।
રણક્રિયાસુરસુરસઙ્ઘસઙ્કટા તદાભવત્ ખલુ સદૃશીહ સંસૃતેઃ ॥