મોક્ષોપાય · અધ્યાય 3.93

તસ્માત્ સર્વપદાર્થાનાં ત્રૈલોક્યોદરવર્તિનામ્ ।
ઉત્પત્તિર્ બ્રહ્મણો રામ તરઙ્ગાનામ્ ઇવાર્ણવાત્ ॥

કાશ્ચિજ્ જન્મસહસ્રાઢ્યાઃ પતન્તિ વનપર્ણવત્ ।
કર્મવાત્યા પરિભ્રાન્તા લુઠન્તિ ગિરિકુક્ષિષુ ॥

અપ્રમેયભવાઃ કાશ્ચિત્ સન્તતાજ્ઞાનમોહિતાઃ ।
ચિરજાતા ભ્રમન્તીહ બહુકલ્પશતાન્ય્ અપિ ॥

કાશ્ચિત્ કતિપયાતીતમનોરમભવાન્તરાઃ ।
વિહરન્તિ જગત્ય્ અસ્મિઞ્ શુભકર્મપરાયણાઃ ॥

કાશ્ચિદ્ વિજ્ઞાતવિજ્ઞાનાઃ પરમ્ એવ પદં ગતાઃ ।
વાતોદ્ધૂતાઃ પયોમધ્યં સામુદ્રા ઇવ બિન્દવઃ ॥

ઉત્પત્તિસ્ સર્વબીજાનામ્ ઇતિ હિ બ્રહ્મણઃ પદાત્ ।
આવિર્ભાવતિરોભાવભઙ્ગુરા ભવરાગિણી ॥

વાસના વિષવૈષમ્યવૈધુર્યજ્વરધારિણી ।
અનન્તસઙ્કટાનર્થકાર્યસઙ્કરકારિણી ॥

નાનાદિગ્દેશકાલાન્તશૈલકન્દરચારિણી ।
રચિતોત્તમવૈચિત્ર્યા વિહિતાવર્તસમ્ભ્રમા ॥

એષા જગજ્જઙ્ગલજીર્ણવલ્લી સમ્યક્સમાલોકકુઠારકૃત્તા ।
વિલીનવિક્ષુબ્ધમનશ્શરીરા ભૂયો ન સંરોહતિ રામભદ્ર ॥