મોક્ષોપાય · અધ્યાય 3.87

પિતામહક્રમે તસ્મિંસ્ તતસ્ તે બદ્ધભાવનાઃ ।
કર્મભિસ્ તૈસ્ સમાક્રાન્તમનસ્કાસ્ તસ્થુર્ આદૃતાઃ ॥

યાવત્ તે દેહકાસ્ તેષાં તાપેન પવનૈસ્ તથા ।
યયુશ્ શોષં યથા ગ્રીષ્મે છિન્નાઃ કમલપલ્લવાઃ ॥

જક્ષુસ્ તાન્ દેહકાંસ્ તત્ર ક્રવ્યાદા વનવાસિનઃ ।
ઇતશ્ ચેતશ્ ચ લુઠિતાસ્ સત્ફલાનીવ મર્કટાઃ ॥

અથ તે શાન્તબાહ્યાર્થા બ્રહ્મત્વે કૃતભાવનાઃ ।
તસ્થુશ્ ચતુર્યુગસ્યાન્તે યાવત્ કલ્પઃ ક્ષયં ગતઃ ॥

ક્ષીયમાણે તતઃ કલ્પે તપત્ય્ આદિત્યસઞ્ચયે ।
પુષ્કરાવર્તકેષૂચ્ચૈર્ વર્ષત્સુ કઠિનારવમ્ ॥

વહત્સુ કલ્પવાતેષુ સ્થિત એવ મહાર્ણવે ।
ક્ષીણેષુ ભૂતવૃન્દેષુ તે તથૈવ વ્યવસ્થિતાઃ ॥

અદ્ય પ્રબુદ્ધે ભવતિ દ્રષ્ટુમ્ ઇચ્છતિ સંસૃતિમ્ ।
સ્વકેનૈવ ક્રમેણોચ્ચૈસ્ તે તથૈવ વ્યવસ્થિતાઃ ॥

ત એતે ભગવન્ બ્રહ્મન્ બ્રહ્મણો બ્રાહ્મણા દશ ।
ત એતે દશ સંસારા મનોવ્યોમનિ સંસ્થિતાઃ ॥

તેષામ્ એકતમસ્યાયમ્ અહમ્ આકાશમન્દિરઃ ।
ભાનુર્ ભુવિ વિભો કાલકલાકર્મણિ યોજિતઃ ॥

એષ તે કથિતસ્ સર્ગો દશાનામ્ અબ્જસમ્ભવ ।
બ્રહ્મણાં સમ્ભવો વ્યોમ્નિ યથેચ્છસિ તથા કુરુ ॥

વિવિધકલ્પનમ્ આવલિતામ્બરં યદ્ ઇદમ્ ઉત્તમજાગતમ્ ઉત્થિતમ્ ।
કિરણજાલકમોહિતમોહનં તદ્ અખિલં નિજચેતસિ વિભ્રમઃ ॥