મોક્ષોપાય · અધ્યાય 3.83

કિરાતમણ્ડલે તસ્મિન્ યે યે સન્તિ મહીભૃતઃ ।
તૈસ્ તૈસ્ સહ પરા મૈત્રી તસ્યાસ્ સમભિજાયતે ॥

સર્વાંસ્ તત્ર મહોત્પાતાન્ પિશાચાદિભયાન્ય્ અપિ ।
રોગાંશ્ ચ યોગસિદ્ધા સા નિવારયતિ રાક્ષસી ॥

બહુવર્ષગણૈર્ નૈષા ધ્યાનાદ્ વિરતિમ્ આગતા ।
તત્રાગત્ય સમશ્નાતિ વધ્યાઞ્ જન્તૂન્ સુસઞ્ચિતાન્ ॥

અદ્યાપિ તત્ર યે વધ્યાસ્ તે તદર્થં મહીભુજા ।
દીયન્તે મિત્રસમ્માને કે હિ નાધ્યવસાયિનઃ ॥

તસ્યાં ધ્યાનનિષણ્ણાયાં કિરાતજનમણ્ડલે ।
અનાયાન્ત્યાં ચિરં કાલં જનદોષપ્રશાન્તયે ॥

સા દેવી કન્દરાનામ્ની મઙ્ગલેતરનામિકા ।
સમ્પ્રસ્થાપિતા પ્રોચ્ચૈઃ પુરે ગહનકોટરે ॥

તતઃ પ્રભૃતિ તત્રાન્યો યો યો ભવતિ ભૂમિપઃ ।
સ કન્દરાં ભગવતીં પ્રતિષ્ઠાપયતિ સ્વયમ્ ॥

યઃ કન્દરાં પ્રતિષ્ઠાં વા ન કરોતિ નૃપો ઽધમઃ ।
તસ્યોપતાપનિચયાઃ પ્રજા નિઘ્નન્તિ યત્નતઃ ॥

તત્પૂજનાદ્ અવાપ્નોતિ જનસ્ તત્રેપ્સિતં ફલમ્ ।
સ્વભાવનાવશોચ્છૂનમ્ અનર્થાયાપ્રપૂજનમ્ ॥

વધ્યલોકોપચારેણ સા દેવી પરિપૂજ્યતે ।
પ્રતિમાયાં સ્થિતાદ્યાપિ ચિત્તસ્થફલદાયિની ॥

સકલલોકસમઙ્ગલકારિણી કવલિતાખિલવધ્યમહાજના ।
જયતિ સાત્ર કિરાતજનાસ્પદા પરમબોધવતી ચિરદેવતા ॥