મોક્ષોપાય · અધ્યાય 3.75

અથ વર્ષસહસ્રેણ તાં પિતામહ આયયૌ ।
વરં પુત્રિ ગૃહાણેતિ વ્યાજહાર નભસ્તલાત્ ॥

સૂચી કર્મેન્દ્રિયાભાવાજ્ જીવમાત્રકલાવતી ।
ન કિઞ્ચિદ્ વ્યાજહારાસ્મૈ ચિન્તયામ્ આસ કેવલમ્ ॥

પૂર્ણાસ્મિ ગતસન્દેહા કિં વરેણ કરોમ્ય્ અહમ્ ।
શામ્યામિ પરિનિર્વામિ સુખમ્ આસે ચ કેવલમ્ ॥

જ્ઞાતં જ્ઞાતવ્યમ્ અખિલં શાન્તાસ્ સન્દેહજાલિકાઃ ।
સ્વવિવેકો વિકસિતઃ કિમ્ અન્યેન પ્રયોજનમ્ ॥

યથા સ્થિતેયમ્ અસ્મીહ સન્તિષ્ઠેયં તથૈવ હિ ।
સત્યાસત્યકલામ્ એવ ત્યક્ત્વા કિમ્ ઇતરેણ મે ॥

એતાવન્તમ્ અહં કાલમ્ અવિવેકેન બાધિતા ।
સ્વસઙ્કલ્પસમુત્થેન વેતાલેનેવ બાલિકા ॥

ઇદાનીમ્ ઉપશાન્તો ઽસૌ સ્વવિચારણયા સ્વયમ્ ।
ઈપ્સિતાનીપ્સિતૈર્ અર્થઃ કો ભવેત્ કલ્પિતૈર્ મમ ॥

ઇતિ નિશ્ચયયુક્તાં તાં સૂચીં કર્મેન્દ્રિયોજ્ઝિતામ્ ।
તૂષ્ણીં સ્થિતાં સ નિયતેસ્ સમ્પશ્યન્ ભગવાન્ સ્થિતિમ્ ॥

બ્રહ્મા પુનર્ ઉવાચેમાં વીતરાગાં પ્રસન્નધીઃ ।
વરં પુત્રિ ગૃહાણ ત્વં કઞ્ચિત્ કાલં ચ ભૂતલે ॥

ભોગાન્ ભુક્ત્વા તતઃ પશ્ચાદ્ ગમિષ્યસિ પરં પદમ્ ।
અવ્યાવૃત્તિસ્વરૂપાયા નિયતેર્ એષ નિશ્ચયઃ ॥

તપસાનેન સઙ્કલ્પસ્ સફલો ઽસ્તુ તવોત્તમે ।
પીના ભવ પુનસ્ સૈવ હિમકાનનરાક્ષસી ॥

યયા પૂર્વં વિયુક્તાસિ તન્વા જલદરૂપયા ।
બીજાન્તર્વૃક્ષતા પુત્રિ બૃહદ્વૃક્ષતયા યથા ॥

યોગમ્ એષ્યસિ ભૂયસ્ ત્વં તન્વા તદ્બીજરૂપિણી ।
તયૈવ રમસે પુત્રિ લતયેવાઙ્કુરસ્થિતિઃ ॥

બાધાં વિદિતવેદ્યત્વાન્ ન ચ લોકે કરિષ્યસિ ।
અન્તશ્શુદ્ધા શાન્તવાતા શરદીવાભ્રમણ્ડલી ॥

અન્તરધ્યાનવિરતા કદાચિલ્ લીલયા યદિ ।
ભવિષ્યસિ બહીરૂઢા સર્વાત્મધ્યાનરૂપિણી ॥

વ્યવહારાત્મકધ્યાનધારણાધારરૂપિણી ।
વાતસ્વભાવવદ્દેહપરિસ્પન્દવિલાસિની ॥

તદા વિરોધિની પુત્રિ સ્વકર્મસ્પન્દરોધિની ।
ન્યાયેન ક્ષુન્નિવૃત્ત્યર્થં ભૂતબાધાં કરિષ્યસિ ॥

ભવિષ્યસિ ન્યાયવૃત્તિર્ લોકે ત્વં ન્યાયબાધિકા ।
જીવન્મુક્તતયા દેહે સ્વવિવેકૈકપાલિકા ॥

ઇત્ય્ ઉક્ત્વા ગગનતલાજ્ જગામ દેવસ્ સૂચી સા ભવતુ મમેતિ કિં વિરાગઃ ।
રાગો વાબ્જજવચનાર્થધારણે ઽસ્મિન્ન્ ઇત્ય્ અન્તર્ મનનમયી મનાગ્ બભૂવ ॥

પ્રાદેશઃ પ્રથમમ્ અભૂત્ તતો ઽપિ હસ્તો વ્યાસં ચાપ્ય્ અથ વિટપસ્ તતો ઽભ્રમાલા ।
સોદ્યત્સાવયવલતા બભૌ નિમેષાત્ સઙ્કલ્પદ્રુમકણિકાઙ્કુરક્રમેણ ॥

તન્માત્રાણ્ય્ અવિકલશક્તિમન્તિ દેહાદ્ ઉદ્ભૂતાન્ય્ અથ કરણેન્દ્રિયાણિ સમ્યક્ ।
સઙ્કલ્પદ્રુમનવપુષ્પવત્ સમન્તાદ્ બીજે યાન્ય્ અલમ્ અભવંસ્ તિરોહિતાનિ ॥