મોક્ષોપાય · અધ્યાય 3.69

અથ વર્ષસહસ્રેણ તાં પિતામહ આયયૌ ।
દારુણં હિ તપસ્ સિદ્ધ્યૈ વિષ્ઠાગ્નિર્ અપિ શીતહા ॥

મનસૈવ પ્રણમ્યૈનં સા તથેતિ સ્થિતા સતી ।
કો વરઃ ક્ષુત્ક્ષયાયાલમ્ ઇતિ ચિન્તાન્વિતાભવત્ ॥

અનાયસી ચાયસી ચ સ્યામ્ અહં જીવસૂચિકા ।
અસ્યોક્ત્યા દ્વિવિધા સૂચીભૂત્વાલક્ષ્યા વિશામ્ય્ અહમ્ ॥

પ્રાણેન સહ સર્વેષાં હૃદયં સુરભિર્ યથા ।
યથાભિમતમ્ એતેન ગ્રસેયં સકલં જનમ્ ॥

ક્રમેણ ક્ષુદ્વિનાશાય ક્ષુદ્વિનાશઃ પરં સુખમ્ ।
ઇતિ સઞ્ચિન્તયન્તીં તામ્ ઉવાચ કમલોદ્ભવઃ ॥

અન્યાદૃષ્ટસ્ તયા દૃષ્ટસ્ ત્વ્ અમૃતાભ્રરવોપમમ્ ।
પુત્રિ કર્કટિકે રક્ષઃકુલશૈલાભ્રમાલિકે ॥

ઉત્તિષ્ઠ ત્વયિ તુષ્ટો ઽસ્મિ ગૃહાણાભિમતં વરમ્ ।
ભગવન્ ભૂતભવ્યેશ સ્યામ્ અહં જીવસૂચિકા ॥

અનાયસી ચાયસી ચ વિકલ્પય ચ મે વરમ્ ।
એવમ્ અસ્ત્વ્ ઇતિ તામ્ ઉક્ત્વા પુનર્ એવ પિતામહઃ ॥

સૂચિકામ્ આહ સર્ગે ત્વં ભવિષ્યસિ વિષૂચિકા ।
સૂક્ષ્મયા માયયા સર્વલોકહિંસાં કરિષ્યસિ ॥

દુર્ભોજના દુરારમ્ભા મૂર્ખા દુસ્સ્થિતયશ્ ચ યે ।
દુર્દેશવાસિનો ધૃષ્ટાસ્ તેષાં હિંસાં કરિષ્યસિ ॥

પ્રવિશ્ય હૃદયં પ્રાણૈઃ પદ્મપ્લીહાદિવેધનાત્ ।
વાતલેખાત્મિકા વ્યાધિર્ ભવિષ્યસિ વિષૂચિકા ॥

સગુણં વિગુણં વાપિ જનમ્ આસાદયિષ્યસિ ।
ગુણિનિ ત્વચ્ચિકિત્સાર્થં મન્ત્રો ઽયં તુ મયોચ્યતે ॥

હિમાદ્રેર્ ઉત્તરે પાર્શ્વે કર્કટી નામ રાક્ષસી ।
વિષૂચિકાભિધાના યા કન્યા સા ન્યાયબાધિકા ॥

ઇતિ મન્ત્રં મહામન્ત્રં ન્યસ્ય વામકરોદરે ।
માર્જયેદ્ આતુરાકારં તેન હસ્તેન સંયતઃ ॥

હિમશૈલાભિમુખ્યેન વિદ્રુતાં તાં વિચિન્તયેત્ ।
કર્કટીં કર્કશાક્રન્દાં મન્ત્રમુદ્ગરચૂર્ણિતામ્ ॥

આતુરં ચિન્તયેચ્ ચન્દ્રે રસાયનહ્રદે સ્થિતમ્ ।
અજરામરણં મુક્તં સર્વાધિવ્યાધિવિભ્રમૈઃ ॥

સાધકો હિ શુચિર્ ભૂત્વા સ્વાચાન્તસ્ સુસમાહિતઃ ।
ક્રમેણાનેન સકલાઃ પ્રોચ્છિનત્તિ વિષૂચિકાઃ ॥

ઇતિ ગગનગતસ્ ત્રિલોકનાથો ગગનગસિદ્ધગૃહીતસિદ્ધમન્ત્રઃ ।
ગત ઇભગતશક્રવન્દ્યમાનો નિજપુરમ્ અક્ષયમ્ અગ્ર્યમ્ ઉજ્જ્વલશ્રિ ॥