મોક્ષોપાય · અધ્યાય 3.68

અત્રૈવોદાહરન્તીમમ્ ઇતિહાસં પુરાતનમ્ ।
રાક્ષસ્યોક્તં મહાપ્રશ્નજાલમ્ આવલિતાખિલમ્ ॥

અસ્તિ કજ્જલપઙ્કાદ્રેર્ ઇવોગ્રા સાલભઞ્જિકા ।
હિમાદ્રેર્ ઉત્તરે પાર્શ્વે કર્કટી નામ રાક્ષસી ॥

વિષૂચિકાભિધાના યા કન્યા સા ન્યાયબાધિકા ।
વિન્ધ્યાટવીવ દેહેન યુક્ત્યા કાર્શ્યમ્ ઉપાગતા ॥

મહાબલાગ્નિનયના રોદોરન્ધ્રાવપૂરિણી ।
નીલામ્બરામ્બરા કૃષ્ણા દેહબદ્ધેવ યામિની ॥

નીહારવસનાચ્છન્ના મેદુરાભ્રશિરઃપટા ।
લમ્બાભ્રબિમ્બોરસિજા નિત્યોર્ધ્વતિમિરોર્ધ્વજા ॥

સ્થિરવિદ્યુલ્લતાનેત્રા તમાલતરુતારકા ।
વૈડૂર્યશૂર્પાગ્રનખી ભસ્મનીહારહાસિની ॥

નિર્માંસનરદેહૌઘપુષ્પસ્રગ્દામભૂષિતા ।
સર્વાઙ્ગોગ્રાન્ત્રસમ્પ્રોતશવમાલાવિરાજિતા ॥

વેતાલાવેશવિવલત્કાલકઙ્કાલકુણ્ડલા ।
અર્કાદાનોત્કદીપ્તાભ્રભીમોગ્રભુજમણ્ડલા ॥

તસ્યા વિપુલકાયત્વાદ્ દુર્લભત્વાન્ નિજાન્ધસઃ ।
અતૃપ્તો ઽર્ણવલેખાયા ઇવાભૂજ્ જાઠરો ઽનલઃ ॥

ન કદાચન સા તૃપ્તિમ્ ઉપાયાતિ મહોદરી ।
વડવાનલજિહ્વેવ ચિન્તયામ્ આસ ચૈકદા ॥

જમ્બુદ્વીપગતાન્ સર્વાન્ નિગિરામિ જનાન્ યદિ ।
અનારતમ્ અનુચ્છ્વાસં જલરાશીન્ ઇવાર્ણવઃ ॥

મેઘેન મૃગતૃષ્ણેવ તન્ મે ક્ષુદ્ ઉપશામ્યતિ ।
અવિરુદ્ધૈવ સા યુક્તિર્ યયાપદિ હિ જીવ્યતે ॥

મન્ત્રૌષધતપોદાનદેવપૂજાદિરક્ષિતમ્ ।
સમમ્ એવ જનં સર્વં નિર્બાધં કઃ પ્રબાધતે ॥

તપઃ કરોમિ પરમમ્ અખિન્નેનૈવ ચેતસા ।
તપસૈવ મહોગ્રેણ યદ્ દુરાપં તદ્ આપ્યતે ॥

ઇતિ સઞ્ચિન્ત્ય સા સર્વજન્તુજાતજિઘત્સયા ।
તપોઽર્થમ્ અથ સસ્માર પ્રદેશં ભૂતદુર્ગમમ્ ॥

આરુરોહ ચ તચ્ છૃઙ્ગં સ્થિરવિદ્યુદ્વિલોચના ।
હસ્તપાદાદિમદ્દેહા શ્યામલેવાભ્રમણ્ડલી ॥

તત્રામ્બરામ્બરા સ્નાતું તપઃ કર્તું કૃતસ્થિતિઃ ।
અતિષ્ઠદ્ એકપાદેન ચન્દ્રાર્કાસ્પન્દલોચના ॥

ક્રમેણ દિવસાઃ પક્ષાસ્ તસ્યા માસર્તવો યયુઃ ।
શીતાતપેષ્વ્ અલોલાયાઃ કૃત્તાયા ઇવ શૈલતઃ ॥

સા બભૂવાભ્રમાલાયાસ્ સમા સંસ્તમ્ભિતાકૃતિઃ ।
કૃષ્ણોત્થિતોર્ધ્વકેશી ખમ્ આહર્તુમ્ ઇવ ચોદ્ભુજા ॥

આલોક્ય તાં પવનજર્જરિતાઙ્ગકત્વક્ક્લીવાં સઝાઙ્કૃતિરણત્પવનાવધૂતૈઃ ।
ઊર્ધ્વસ્થમૂર્ધજતમઃપટલૈર્ દધાનાં તારૌઘમૌક્તિકમ્ અજસ્ સમુપાજગામ ॥