મોક્ષોપાય · અધ્યાય 3.59

સરસ્વતી તદેત્યુક્ત્વા તત્રૈવાન્તર્ધિમ્ આયયૌ ।
પ્રભાતે પઙ્કજૈસ્ સાર્ધં બુબુધે સકલો જનઃ ॥

આલિલિઙ્ગ ઘનં લીલાં લીલા ચ દયિતં ક્રમાત્ ।
પુનઃ પુનર્ મહાનન્દો મૃતપ્રોજ્જીવિતો નૃપઃ ॥

તદાસીદ્ રાજસદનં મદમન્મથમન્થરં ।
આનન્દમત્તજનતં વાદ્યગેયરવાકુલમ્ ॥

જયમઙ્ગલપુણ્યાહઘોષઘુઙ્ઘુમઘર્ઘરમ્ ।
હૃષ્ટપુષ્ટજનાકીર્ણરાજલોકવૃતાઙ્ગનમ્ ॥

સિદ્ધવિદ્યાધરોન્મુક્તપુષ્પવર્ષસશીત્કૃતમ્ ।
ધ્વનન્મૃદઙ્ગમુરજકાહલાશઙ્ખદુન્દુભિ ॥

ઊર્ધ્વીકૃતબૃહદ્ધસ્તહાસ્તિકસ્તનિતોત્કટમ્ ।
ઉત્તાલતાણ્ડવસ્ત્રૈણપૂર્ણાઙ્ગનલસદ્ધ્વનિ ॥

મિથસ્સઙ્ઘટ્ટનિપતન્નાનોપાયનદન્તુરમ્ ।
પુષ્પશેખરસમ્ભારમયસ્રગ્દામસુન્દરમ્ ॥

વિકીર્ણપાટિતક્ષૌમં મન્ત્રિસામન્તનાગરૈઃ ।
સ્થલપદ્મમયં વ્યોમ રક્તૈસ્ તાણ્ડવિનીકરૈઃ ॥

મત્તસ્ત્રીકન્ધરાવૃત્તલીલાન્દોલિતકુણ્ડલમ્ ।
પ્રનૃત્તપાદસમ્પાતપ્રોન્નમત્પુષ્પકર્દમમ્ ॥

પટવાસશરન્મેઘવિતાનકવિતાનિતમ્ ।
વરાઙ્ગનામુખૈર્ નૃત્યચ્ચન્દ્રલક્ષ્યગૃહાજિરમ્ ॥

પરલોકાદ્ ઉપાનીતો રાજ્ઞાત્મા પતિર્ એવ ચ ।
ઇત્ય્ એવં વૃત્તગાથાભિર્ જગુર્ દેશાન્તરે જનાઃ ॥

પદ્મો ભૂમિપતિશ્ શ્રુત્વા વૃત્તાન્તકથનં મનાક્ ।
ચક્રે સ્નાનં સમાનીતૈશ્ ચતુસ્સાગરવારિભિઃ ॥

તતો ઽભિષિષિચુર્ વિપ્રા મન્ત્રિણો ભૂભુજશ્ શતમ્ ।
લબ્ધોદયમ્ અનન્તેહમ્ અમરેન્દ્રમ્ ઇવામરાઃ ॥

લીલા લીલા ચ રાજાથ જીવન્મુક્તા મહાધિયઃ ।
રેમિરે પૂર્વવૃત્તાન્તકથનૈસ્ સુરતૈર્ ઇવ ॥

સરસ્વત્યાઃ પ્રસાદેન સ્વપૌરુષકૃતેન તત્ ।
પ્રાપ્તં લોકદ્વયં શ્રેયઃ પદ્મેનેતિ મહીભુજા ॥

પ્રજ્ઞપ્તિજ્ઞાનસંબુદ્ધો રાજા લીલાદ્વયાન્વિતઃ ।
ચક્રે વર્ષાયુતાન્ય્ અષ્ટૌ તત્ર રાજ્યમ્ અનિન્દિતમ્ ॥

જીવન્મુક્તો જિતમના જિતપઞ્ચેન્દ્રિયભ્રમઃ ।
અસંસક્તમના મૌની યથાપ્રાપ્તાનુવૃત્તિમાન્ ॥

તસ્ય લાવણ્યજલધેર્ બિન્દુર્ ઇન્દુર્ ઇવોદ્ધૃતઃ ।
તસ્ય પ્રતાપકલ્પાગ્નેર્ ભાનુઃ કણ ઇવોત્થિતઃ ॥

જીવન્મુક્તાસ્ ત ઇત્ય્ એવં રાજ્યં વર્ષાયુતાષ્ટકમ્ ।
કૃત્વા વિદેહમુક્તત્વમ્ આસેદુસ્ સિદ્ધસંવિદઃ ॥

યદ્ ઉદયિ વિશદં વિદગ્ધમુગ્ધં સમુદિતમ્ આત્મહિતં ચ પેશલં ચ ।
તદ્ અખિલજનતોષદં સ્વરાજ્યં ચિરમ્ અનુપાલ્ય સુદમ્પતી વિમુક્તૌ ॥